बझाङमा जीप दुर्घटना : गाउँपालिका उपाध्यक्षसहित ९ जना घाइते

वसन्तप्रताप सिंह

बझाङ — बझाङको खप्तडछान्ना गाउँपालिकाको लामाखेतमा जीप दुर्घटना भएको छ । दुर्घटनामा गाउँपालिकाकी उपाध्यक्ष पाउसरा थापासहित ९ जना घाइते भएका छन् । गाउँपालिकाको कार्यालयबाट वडा नम्बर ७  मा पर्ने गडरायतर्फ जाँदै गरेको से १ ज १२२० नम्बरको जीप लामाखेतमा दुर्घटना भएको थियो । 


गडरायको महेश्वरी माध्यमिक विद्यालयमा भइरहेको अध्यक्ष कप खेलकुदमा सहभागी हुने विद्यार्थी, शिक्षक र जनप्रतिनिधि बोकेर गएको जीप दुर्घटनामा परी अन्य ९ जना घाइते भएको र दुईजनाको अवस्था गम्भीर रहेको प्रहरी चौकी छान्नाका इन्चार्ज भुवनसिहं बोहराले बताए।


खप्तड छान्ना गाउँपालिकामा दुर्घटनाग्रस्त भएको जिप। तस्बिर सौजन्यः रामबहादुर सिंह।


गम्भीर घाइते हुनेमा विद्यार्थी नरेन्द्र उपाध्याय र सुमन विक रहेका छन्। जीपमा झण्डै १३ जना सवार रहेका र जसमा अधिकांश विद्यार्थी रहेको बोहराको भनाइ छ। घाइतेको जिल्ला अस्पताल चैनपुरमा उपचार भइरहेको छ। क्षमताभन्दा दोब्बर बढी यात्रु बोकेका कारण जीप पल्टिएको हुन सक्ने प्रहरीको अनुमान छ।


जीप चालकलाई नियन्त्रणमा लिएर दुर्घटनाको बारेमा अनुसन्धान भइरहेको प्रहरीको भनाइ छ। प्रकाशित : फाल्गुन ८, २०७६ १६:१४

प्रतिक्रिया
पठाउनुहोस्
ADVERTISEMENT

सेक्युरिटी प्रेस खरिद प्रकरण : कांग्रेसको अवरोधपछि संसद्‍ स्थगित

कान्तिपुर संवाददाता

काठमाडौँ — प्रमुख प्रतिपक्षी दल नेपाली कांग्रेसको अवरोधपछि प्रतिनिधिसभाको बैठक मंगलबारसम्मका लागि स्थगित भएको छ । सञ्‍चार तथा सूचना प्रविधिमन्त्री गोकुल बाँस्कोटालाई बर्खास्त गर्नुपर्ने माग गर्दै कांग्रेसले बैठक अवरुद्ध गरेपछि सभामुख अग्‍निप्रसाद सापकोटाले बैठक फागुन १३ गते दिउँसो १ बजेसम्मका लागि स्थगित गरेका हुन् ।

बैठकको सुरुमा बोल्दै कांग्रेस संसदीय दलका सचेतक पुष्पा भुसालले बाँस्कोटाको बर्खास्तीसँगै कारबाही प्रक्रिया अगाडि बढाउन माग गरिन्। उनले उक्त घटनामा प्रधानमन्त्री स्वयम्‌ले संसदमा जवाफ दिनुपर्ने मागसमेत गरिन्। उनले भनिन्, ‘बर्खास्त गरेर मात्रै यो विषयले विश्राम लिँदैन। कांग्रेस बर्खास्तीले मात्रै चुप बस्दैन। यो विषयमा सत्य-तथ्य कुराहरु जानकारी गराउन पनि माग गर्न चाहन्छ। प्रधानमन्त्रीले सबैले सुन्‍ने गरी संसदमा आएर चित्तबुझ्दो जवाफ दिनुपर्छ।’

'नयाँ संविधान जारी भइसकेपछि बनेको नयाँ सरकार र प्रधानमन्त्रीले उद्घोष गर्नुभएको थियो म आफू पनि भ्रष्टाचार गर्दिनँ र भ्रष्टाचार गर्नेको अनुहार पनि हेर्दिनँ भन्‍नुहुन्थ्यो तर सञ्‍चारमन्त्री गोकुल बाँस्कोटालाई ७० करोडको कमिसनबारे छलफल गरेको अडियो सार्वजनिक भएको छ। नेपाली जनताले सुशासन आर्थिक समृद्धि खोजेका थिए तर भ्रष्टाचारका विभिन्न माध्यमबाट बाहिरिएकोमा कांग्रेसको ध्यानाकर्षण भएको छ,' उनले भनिन्। सेक्युरिटी प्रेसबारे सञ्‍चारमन्त्री र विजयप्रकाश मिश्र शर्माबीच भएको संवाद आम नेपाली जनताले बुझ्ने भाषामा बाहिर आएको छ। प्रधानमन्‍त्रीले यो विषयलाई कसरी लिनुहुन्छ भन्‍नेबारे हामी जवाफ चाहन्छौं।'

'मेरो सञ्‍चारमन्‍त्री अब्‍बल दर्जाको छ भन्‍नुहुन्थ्यो यस्तै भ्रष्टाचार गर्नेमा उपमा दिनुभएको हो भन्‍ने प्रश्‍न उठेको छ', सचेतक भुसालले भनिन्,'भ्रष्टाचार गर्ने जोसुकैलाई कारबाही गर्छु भनेर प्रधानमन्त्रीको अभिव्यक्ति आएको केही दिन पनि भएको छैन। गोकुल बाँस्कोटालाई मन्त्रिपरिषद्‍बाट तत्काल बर्खास्त गर्नुपर्ने हुन्छ।' सञ्‍चारमन्‍त्री बाँस्कोटाले भने राजीनामा दिइसकेका छन्।

कांग्रेसले बालुवाटार प्रकरणमा जग्गा फिर्ता गरेकाले कारबाही नभएको भन्दै सञ्चारमन्त्रीले राजीनामा दिएका कारण कारबाही हुँदैन भन्‍न नपाइने बताएको छ। कांग्रेसले आफ्ना मागहरु पूरा नभएसम्म सदन चल्न नदिने बताएको छ। सभामुख सापकोटाले बास्कोटाले मन्त्री पदबाट राजीनामा दिएको अनौपचारिक जानकारी प्राप्त भएकाले नियमित कारबाही अगाडि बढाउन माग गरे पनि कांग्रेसका सांसदहरुले उठेर विरोध गरेका थिए।

दिउँसो १ बजेका लागि बोलाइएको बैठक ३ बजेमात्रै सुरु भएको थियो।

प्रकाशित : फाल्गुन ८, २०७६ १५:४६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×