तातोपानीमा सधैं भीड

कान्तिपुर संवाददाता

बझाङ — हाडजोर्नी, नशा, चर्म रोग लगायत निको हुने विश्वासका साथ बझाङको तलकोट गाउँपालिका–१ स्थित तपोवनमा रहेको तातोपानीमा नुहाउन आउनेको संख्या बढेको छ । यस क्षेत्रमा घुम्न आउने आन्तरिक पर्यटक समेत तातोपानीमा नुहाएर फर्किने गरेका स्थानीय बताउँछन् ।

सडक यातायातको पहुँच पुगेसँगै ओझेलमा परेका तातोपानीका प्राकृतिक मुहान र कुण्डमा नुहाउन आउनेको संख्या बढेको सुनिकोटकी सुन्दरी कुँवरले बताइन् । ‘कतिपय त परिवारसहित गाडी रिजर्भ गरेरै नुहाउन आउँछन् । धेरैजसो भने मोटरसाइकलमै आउने गरेका छन्,’ उनले भनिन् । यसअघि माघे संक्रान्ति, श्रीपञ्चमीजस्ता चाडपर्वमा श्रद्धालुको उपस्थिति रहने गरेकोमा हाल अन्य समयमा समेत नुहाउनकै लागि पर्यटकहरू आउने गरेका तपोवन–१ का वडाध्यक्ष गोपालबहादुर धामीले बताए ।


‘पहिले चाडपर्वमा मात्रै नुहाउन आउँथे । अहिले त जाडोयाममा समेत धेरैजना नुहाउन आए,’ उनले भने, ‘अहिले दैनिक ५०–५५ जनासम्म आउने गरेका छन् ।’ दैनिक कति संख्यामा तातोपानीमा नुहाउन आउँछन्, गाउँपालिकाले कुनै तथ्यांक राखेको छैन । यसका लागि वडाले तयारी गरिरहेको उनले बताए । तातोपानीमा नुहाउन आउनेको संख्या बढेसँगै स्थानीयको आयआर्जनमा समेत सहयोग पुगेको उनको भनाइ छ । ‘यहाँ आउनेले गाउँबाट कुनै न कुनै स्थानीय उत्पादन किनेर लैजान्छन्,’ उनले भने, ‘पर्यटक लक्षित गरी गाउँमा चिया, नास्ता पसलहरू पनि सञ्चालन भएका छन् ।’ उनका अनुसार सेतीको माछा, माछाको सुकुटी, गाउँघरमा उत्पादन भएको तरकारी, घिउ, स्थानीय फलफूललगायतको बिक्रीसमेत बढेको छ । ओझेलमा रहेको यस क्षेत्रलाई मुख्य पर्यटकीय गन्तव्यको रुपमा विकास गर्न गाउँपालिकाले गुरुयोजना बनाएर काम अघि बढाएको उनले बताए ।


सदरमुकाम चैनपुरबाट करिब आधा घण्टाको सवारीमा पुग्न सकिन्छ तपोवन । चैनपुर आएका बेला तातोपानीमा नुहाउन पुगेका डोल्पाका दिपेन्द्र शाहीले भने, ‘प्राकृतिक रुपमा आउने तातोपानीमा नुहाएको मेरो पहिलो अनुभव हो । निकै आनन्द र रोमाञ्चक अनुभूति भयो ।’ प्राकृतिक रुपमै बनेका तातोपानीका कुण्डमा डुबुल्की मार्दा सहरी क्षेत्रमा पाइने ‘साउना बाथ’ को भन्दा फरक आनन्द र अनुभूति हुने उनले अनुभव सुनाए ।


धार्मिकरुपमा यस क्षेत्रको विशेष महत्व छ । सेती नदीको किनार वारिपारि गरेर यहाँ १० भन्दा बढी तातोपानीका मुहानहरू छन् । यस क्षेत्रमा विवाह, व्रतबन्ध जस्ता धार्मिक अनुष्ठानका लागि बझाङ, डोटी, अछाम र सुदूरपश्चिमका पहाडी जिल्लाबाट श्रद्धालुहरू पुग्ने गर्दछन् । ‘तपोवन धार्मिक हिसाबले मात्र नभएर प्राकृतिक उपचारका लागि पनि महत्वपूर्ण ठाउँ हो,’ तलकोट गाउँपालिकाका अध्यक्ष लालबहादुर विष्टले भने, ‘यसको व्यवस्थापन र प्रचारप्रसार गरेर पर्यटन प्रवर्द्धन गर्ने योजना बनाएका छौं ।’ उनका अनुसार तपोवन क्षेत्र विकास कार्यक्रमलाई गाउँपालिकाले गौरवको योजनामा समावेस गरेको छ ।


सेती किनारमा रहेका तातोपानीका मुहानहरू नदी कटानका कारण जोखिममा रहेकाले यसको संरक्षण गर्न गाउँपालिकाले पहल थालेको उनको भनाइ छ । कार्यपालिकाको बैठकले नदी किनारमा तटबन्ध बनाउने, सोलार लििटङबाट तातोपानी तानेर नुहाउन र पौडी खेल्न मिल्ने पोखरी र धारा निर्माण गर्ने, तपोवन क्षेत्रलाई घेरबार गर्नेलगायतका निर्णय गरेको उनले जानकारी दिए ।


यहाँ रात बिताउन चाहनेका लागि पाहुना घर, योग तथा ध्यान केन्द्र लगायत निर्माणको तयारी थालिएको गाउँपालिकाका प्रमुख प्रशासकीय अधिकृत सिद्धराज भण्डारीले बताए । प्रकाशित : फाल्गुन ३, २०७६ ०९:२२

ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

सप्तरीमा इस्लामिक सम्मेलन सुरु

अवधेशकुमार झा

राजिवराज — मुस्लिम समुदायको धार्मिक सम्मेलन इज्तिमा शनिबारबाट सप्तरीको बोदेबरसाइन नगरपालिका–५ जाजरमा सुरु भएको छ । करिब २ लाख मुसलमान सहभागी हुने बताइएको उक्त इस्लामिक सम्मेलनमा नेपाल तथा भारतका विभिन्न धर्मगुरुहरुले सम्बोधन गर्ने कार्यक्रम छ ।

आयोजकले सुरुमा नेपाल सरकारलाई नेपाल तथा भारतका सहभागी मात्र हुने बताएर अनुमति लिएको र पछि तेश्रो मुलुकका पनि सहभागी आएपछि सम्मेलन विवादित बनेको थियो ।

पाकिस्तान, बंगलादेश, साउदी अरेबिया, मलेसिया र थाइल्यान्डलगायतका मुलुकबाट आएका सहभागीहरुलाई शुक्रबार साँझ आयोजकले फिर्ता पठाएपछि शनिबारबाट सम्मेलन सुरु भएको हो । यद्यपि सप्तरी सदरमुकाम राजविराजका एक होटेलमा अझै पनि केही पाकिस्तानी नागरिकहरु रहेको सुरक्षा स्रोतले जानकारी दिएको छ । ३ दिनसम्म चल्ने सम्मेलनका लागि खड्ग नदी किनारस्थित जाजरमा ठूलो पण्डाल लर्गाएको छ ।

शनिबार बिहानसम्ममा एकलाख सहभागी आइसकेको र अझै आउने क्रम जारी रहेको सप्तरीका प्रहरी प्रवक्ता डीएसपी तिलक भारतीले जानकारी दिए । सम्मेलनलाई ध्यानमा राख्दै व्यापक संख्यामा नेपाल र सशस्त्र प्रहरी परिचालन गरिएको छ । जिल्लाका सुरक्षा प्रमुखहरु आफैले पनि सम्मेलनस्थलको सुरक्षाको कमाण्ड सम्हालेका छन् ।

इस्लामिक सम्मेलनबारे भारतीय सुरक्षा अधिकारीहरुले पनि चासो देखाएका छन् । शुक्रबार दिउँसो सीमावर्ती लौकही थानाका प्रमुख अरविन्दकुमार इलाका प्रहरी कार्यालय बोदेबरसाइनमा आएर सप्तरीका डिएसपी तिलक भारतीसहितका सुरक्षा अधिकारीहरुलाई भेटी सम्मेलनबारे छलफल गरेका थिए । थाना प्रमुख अरविन्दकुमारले सम्मेलनमा आएका पाकिस्तानी नागरिकको घुसपैठ भारततर्फ हुन सक्ने भएकोले आपूुहरुको चासो बढाएको बताए । ‘एकातर्फ सीएए र एनआरसीबारे मुस्लिम समुदाय आन्दोलनमा छ, अर्कोतर्फ पाकिस्तानी घुसपैठको खतरा पनि उतिकै छ,’ उनले कान्तिपुरसित भने, ‘हामीले सीमामा सशस्त्र सीमा सुरक्षा बलको संख्या समेत थप गरेका छौं, निगरानी र जाँचलाई पनि बढाएका छौं ’

प्रकाशित : फाल्गुन ३, २०७६ ०९:२२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×