एम्बुलेन्स भाडामा मनपरी

कोहलपुरसम्मको १६ हजार आठ सय भाडा तोकिए पनि एम्बुलेन्स चालकहरुले २५ हजारसम्म लिने गरेका छन् । जिल्ला अस्पतालकै एम्बुलेन्सले समेत बढी भाडा लिइरहेको बिरामीको गुनासो छ ।
तृप्ति शाही

(बैतडी) — जिल्लामा चल्ने एम्बुलेन्सहरूले मनपरी भाडा असुलेको बिरामी र सर्वसाधारणले गुनासो गरेका छन् । नाफारहित उद्देश्य लिएर विभिन्न संघसंस्थाहरूले एम्बुलेन्स सेवा दिइरहेका बताए पनि व्यवहारमा भने नाफारहित नदेखिएको सर्वसाधारण बताउँछन् ।

सरकारबाट शतप्रतिशत राजस्व छुटमा ल्याइएका एम्बुलेन्सको भाडादरमा एकरूपता छैन । जिल्ला एम्बुलेन्स समितिले तोकेको दरभन्दा उनीहरूले बढी भाडा असुल्दै आएका छन् । सहिद दशरथचन्द स्मृति प्रतिष्ठानको नाममा सञ्चालनमा रहेको एम्बुलेन्सले केही दिनअघि एक बिरामीलाई कोहलपुर लैजान २२ हजार रुपैयाँ भाडा मागेको अधिकारकर्मी सरस्वती नेपालीले बताइन् । ‘महँगो लागेर मिलाउनुस् भन्दा चालकले १८ हजारमा लैजान्छु भने । पाटन प्राथमिक स्वास्थ्य केन्द्रको एम्बुलेन्सले साढे १२ हजारमा लैजाने बताएपछि त्यसैमा पठायौं,’ उनले भनिन्, ‘बैतडीमा एम्बुलेन्स सञ्चालक संस्थाहरूले सेवाभन्दा नाफामूलक व्यापार गरिरहेका छन् ।’


केही समयअघि अर्को एउटा एम्बुलेन्सले बैतडीबाट कोहलपुरसम्म लैजान २५ हजार रुपैयाँ भाडा मागेको दशरथचन्द नगरपालिकाकी एक महिलाले बताइन् । ‘जुनसुकै हालतमा तत्काल लैजानुपर्ने भएकाले २० हजारमा कुरो मिल्यो,’ उनले भनिन् । त्यस्तै, केही महिनाअघि धनगढीसम्म पुर्‍याउन जिल्ला अस्पतालकै एम्बुलेन्सले १२ हजार रुपैयाँ लाग्ने बताएका अर्का एक स्थानीयले बताए । उनले भने, ‘पछि पाटन केन्द्रको एम्बुलेन्सले ९ हजार लियो । महँगो भयोभन्दा अर्को लैजानुस् भनेर भन्छन् ।’


हाल जिल्ला अस्पतालका दुई, पाटन केन्द्रकोएक, विभिन्न स्थानीय तह र सामाजिक संस्थाद्वारा सञ्चालनमा रहेकासहित जिल्लाभर एक दर्जन एम्बुलेन्सले सेवा दिइरहेका स्वास्थ्य कार्यालयले जनाएको छ । दुई वर्ष अघिसम्म ३/४ वटा मात्र भएकोमा स्थानीय तह गठन भइसकेपछि केहीले एम्बुलेन्स किनेका छन् । किन्न बाँकी स्थानीय तहसमेत खरिदको तयारीमा छन् । जिल्लामा १० स्थानीय तह छन् ।


चार वर्षअघि एम्बुलेन्स व्यवस्थापन समितिले भाडादर निर्धारण गरेको थियो । त्यसबेला बैतडी सदरमुकाम आसपासबाट डडेलधुरासम्म गएको चार हजार तीन सय, धनगढीसम्मको आठ हजार नौ सय र कोहलपुर वा नेपालगन्जसम्मको १६ हजार आठ सय रुपैयाँ भाडा तोकिएको थियो । तर बैतडीबाट बिरामी रेफर गरिने मुख्य सहर धनगढी, कोहलपुर, नेपालगन्जको भाडादर सबै एम्बुलेन्सले फरकफरक लिने गरेका छन् । सहिद दशरथचन्द स्मृति प्रतिष्ठानले धनगढीको १२ हजार र कोहलपुर पुगेको १८ हजार रुपैयाँ लिने गरेको प्रतिष्ठानअन्तर्गत एम्बुलेन्स सञ्चालक समितिका संयोजक विनोद चन्दले बताए । दशरथचन्द नगरपालिका–२ मा रहेको देहिमाडौं स्वास्थ्य चौकीको एम्बुलेन्सले धनगढीको १० हजार र कोहलपुर बिरामी पुर्‍याएको १७ हजार रुपैयाँ भाडा लिने गरेको छ ।


जिल्ला अस्पतालका कर्मचारी खेमराज भट्टले भाडादरमा एकरूपता नभएको स्विकारे । आधिकारिक दर नतोकिएको भए पनि अस्पतालका कर्मचारीहरूको बैठकबाट सेवाग्राहीलाई मार नपर्नेगरी दररेट कायम गर्ने गरिएको उनले बताए । भट्टका अनुसार पाटन प्राथमिक स्वास्थ्य केन्द्रले वडाध्यक्षसहित स्वास्थ्य केन्द्रका पदाधिकारी बसेर भाडादर लागू गरेको छ ।


भाडादर फरकफरक रहेको गुनासो आएपछि सबै एम्बुलेन्स सञ्चालकसँग बसेर छलफल गरिने स्वास्थ्य कार्यालयका प्रमुख योगेश भट्टले बताए । सहायक प्रमुख जिल्ला अधिकारी लोकेन्द्रसिंह नेगीले फोन सम्पर्क गरी भाडा बढी लिन नपाइने भन्दै एम्बुलेन्स सञ्चालकहरूलाई सूचित गराएको बताए । ‘मनपरी भाडा असुले कारबाही हुन्छ भनेका छौं,’ उनले भने, ‘सबै सञ्चालक, संस्था र स्थानीय तहका प्रतिनिधिलाई बोलाएर नयाँ दररेट तोक्छौं ।’

प्रकाशित : फाल्गुन २, २०७६ ०९:५८
प्रतिक्रिया
पठाउनुहोस्

महिला सांसद बढी सक्रिय

प्रदेशसभाको तेस्रो अधिवेशनलाई आधार मानेर गरिएको अध्ययनले शून्य समयमा बोल्नेमा समेत महिलाको संख्या बढी देखिएको छ
चाँदनी कठायत

(वीरेन्द्रनगर) — कर्णाली प्रदेशसभामा पुरुषको तुलनामा महिला सांसदको सहभागिता सक्रिय रहेको पाइएको छ । संख्यात्मक रुपमा थोरै भए पनि संसदीय गतिविधिमा उनीहरूको सक्रियता बढी देखिएको एक अध्ययनले देखाएको छ ।

डेमोक्रेसी रिसोर्स सेन्टरले सार्वजनिक गरेको अध्ययन प्रतिवेदनमा तेस्रो अधिवेशनको १३ वटा बैठकमा १० जना महिलाले २३ पटक बोलेको उल्लेख छ । पुरुषतर्फ भने १३ सदस्यले १९ पटक बोलेका छन् । प्रदेशसभाको तेस्रो अधिवेशनलाई आधार मानेर गरिएको अध्ययनले शून्य समयमा समेत बोल्नेमा पनि महिलाको संख्या बढी देखिएको छ ।

तेस्रो अधिवेशनमा भएको १३ वटा बैठकभर शून्य समयमा ४२, विशेष समयमा ५ र विधेयक छलफलमा ६८ पटक सांसद बोलेका छन् । त्यस्तै, विशेष समयको सदुपयोग गर्दै दुई पुरुष सदस्यले चारपटक बोले भने एकजना महिला सदस्यले एकपटक मात्रै बोलेको पाइएको छ । विधेयकको छलफलमा १६ जना पुरुष सांसद ४५ पटक बोल्दा ९ महिला सांसदले २३ पटक आफ्नो धारणा राखे । ४० सदस्यीय कर्णाली प्रदेशसभामा महिला सांसदको संख्या १३ (३२ दशमलव ५ प्रतिशत) छ । यस्तो अवस्थामा महिलाको बैठक र संसदीय गतिविधिमा सहभागिता उत्साहजनक रहेको सभामुख राजबहादुर शाही बताउँछन् ।

अधिकांश महिला सांसदको संसदीय क्रियाकलापमा आफै उत्सकुता बढी हुनु र केही सांसदलाई संसदले सक्रिय हुन प्रोत्साहन गरेको कारण संसदमा महिला सांसदको सहभागिता उत्साहपूर्ण देखिएको उनको भनाइ छ । सुरुमा बोल्नुपर्दा लाज र डर मान्ने एकजना महिला सांसदलाई आफूले कार्यकक्षमै बोलाएर उत्प्रेरणा दिएको सभामुख शाहीले बताए । ‘उहाँले बाहिर त बोल्न मन लाग्छ, हलभित्र पस्ने बित्तिकै डर लाग्छ भनेर भन्नुहुन्थ्यो, हामीले निकै सम्झाइबुझाइ गर्‍यौं,’ उनले भने, ‘अहिले संसदमा उहाँको सक्रियता निकै धेरै छ, संसदमा मात्र होइन, बाहिर पनि उहाँको बोली अधिक रुचाइन्छ ।’ सांसदहरूलाई आफ्नै भाषा र लवजमा बोल्नको लागि उत्प्रेरित गरिरहेको उनले बताए ।

प्रदेशसभाको तेस्रो अधिवेशनमा भएका विभिन्न छलफलमा कर्णालीका ३० सांसद बोलेका छन् । दुई सांसदले अधिवेशनभर बोलेनन् । अन्य प्रदेशको तुलनामा कर्णाली प्रदेशसभाले तेस्रो अधिवेशनभर विशेष समयको अभ्यास सबैभन्दा कम गरेको छ । तेस्रो अधिवेशनमा तीन बैठकमा मात्रै विशेष समयको अभ्यास भएको प्रतिवेदनमा उल्लेख छ । सबैभन्दा बढी प्रदेश ५ को प्रदेशसभाले २६ वटा बैठकमा विशेष समयको प्रयोग गरेको छ । शून्य समयको अभ्यास भने कर्णाली प्रदेशसभाले ९ वटा बैठकमा गरेको छ । ११ बैठकमा विधेयकमाथि छलफल भएको अध्ययन प्रतिवेदनले जनाएको छ । करिब डेढ महिना अवधिको रहेको तेस्रो अधिवेशनमा ११ जना प्रत्यक्षतर्फका सांसदले १६ पटक बोलेका थिए । समानुपातिकतर्फ भने १२ जना सांसदले २६ पटक बोलेका थिए । बैठकको शून्य समयमा १७ नेकपाका सांसदले ३१ पटक बोल्दा ५ जना कांग्रेस सांसदले १० पटक मन्तव्य व्यक्त गरेका छन् ।

विशेष समयमा समानुपातिकभन्दा प्रत्यक्षतर्फका सांसदले बोलेको तथ्य फेला परेको छ । समानुपातिकतर्फ एकजनाले बोल्दा प्रत्यक्षतर्फका दुई सांसदले चारपटक बोलेको पाइयो । विशेष समयमा नेकपाका एकजनाले एकपटक बोल्दा कांग्रेस सांसद एकजनाले तीनपटक बोलेको प्रतिवेदनमा उल्लेख छ । तेस्रो अधिवेशनभर विधेयकको छलफलमा प्रत्यक्षतर्फका १३ सांसदले ३८ पटक बोल्दा समानुपातिकतर्फका १२ जना ३० पटक बोलेका छन् ।

सेन्टरका अनुसार अन्य प्रदेशको तुलनामा कर्णाली प्रदेशसभाको सभाहल उत्कृष्ट छ । अन्य प्रदेशका सभाहलमा कतै कर्मचारी नै नअट्ने, कतै सांसदको अगाडि टेबुल र माइक नभएको पाइएको थियो । कर्णालीमा भने दर्शकदीर्घा र सञ्चारकर्मी बस्ने ठाउँ पनि व्यवस्थित भएको र सांसद आफू बसेकै ठाउँबाट बोल्न माइकको व्यवस्था भएको जनाइएको छ । कर्णाली प्रदेशसभामा प्रत्यक्षतर्फ २४ र समानुपातिकतर्फ १६ गरी ४० सांसद छन् ।
बैठक स्थगित
कर्णाली प्रदेशसभाको बिहीबार बस्ने भनिएको पाँचौ अधिवेशनको दोस्रो बैठक स्थगित भएको छ । कर्णाली प्रदेशसभाले सूचना टाँस गरी बैठक शनिबार दिउँसो ३ बजे बस्ने प्रदेशसभा सचिवालयले जनाएको छ । बिहीबार ‘जनयुद्ध’ दिवसको अवसरमा अधिकांश सांसद तथा मन्त्री सुर्खेतबाहिर रहेका कारण वैठक स्थगित भएको हो ।

प्रकाशित : फाल्गुन २, २०७६ ०९:५५
पूरा पढ्नुहोस्
प्रतिक्रिया
पठाउनुहोस्
×