ग्रामीण सडकले मुख्य राजमार्गमा जोखिम

कान्तिपुर संवाददाता

दार्चुला — निर्माणाधीन ग्रामीण सडकले मुख्य राजमार्गमा क्षति पुर्‍याउँदा दुर्घटनाको जोखिम बढेको छ । ग्रामिण सडक निर्माणका क्रममा माथिबाट माटो, ढुंगा खस्दा महाकाली राजमार्गअन्तर्गत दार्चुला खण्ड पटक–पटक अवरुद्धसमेत हुने गरेको छ ।

ZenTravel

शैल्यशिखर नगरपालिकाको गोकुलेश्वरदेखि सदरमुकाम खलंगासम्म निर्माण भइरहेका ग्रामिण सडकले मुख्य राजमार्गका विभिन्न स्थानमा क्षति पुर्‍याएको छ । माथिबाट ढुंगामाटो खस्ने, पहिरो जाने, सडक भासिनेजस्ता कारणले राजमार्ग क्षेत्रमा यात्रा गर्दा जोखिम बढेको यातायात व्यवसायी बताउँछन् । हिलाम्य र धुलाम्य हुने समस्याले समेत हैरानी बढाएको छ ।

Meroghar

नौगाड, मार्मा, दुहु, मालिकार्जुन र लेकम गाउँपालिका र शैल्यशिखर नगरपालिकाले डोजर खरिद गरेर धमाधम सडक निर्माण गरिरहेका छन् । वातावरणीय प्रभाव मूल्यांकन नगरीकनै प्रदेश तथा संघ सरकारको विशेष र समपुरक अनुदानबाट उनीहरूले सडक योजना अघि बढाइरहेका हुन् । महाकाली लोकमार्ग भएर शैल्यशिखर नगरपालिका–७ पनेबाजदेखि बन्तोली जाने सडक र मालिकार्जुन गाउँपालिका–४ ऐरिछानादेखि हुनैनाथ हुँदै वडा नम्बर ५ डाँडाकोट जाने सडकले सबैभन्दा बढी समस्या निम्त्याएको मालिकार्जुन गाउँपालिका–४ का जमनसिंह धामीले बताए । ‘पनेबाजदेखि ऐरिछानासम्म धेरै ठाउँमा राजमार्गमा क्षति पुगेको छ,’ उनले भने, ‘राजमार्गको माथिल्लो भागबाट शाखा सडक निर्माण भइरहेकोले त्यहाँबाट खस्ने ढुंगा, माटोले गर्दा यात्रा गर्दा अप्ठेरो भएको छ ।’

लामो समयदेखि महाकाली राजमार्गमा गाडी चलाउँदै आएका दिलानन्द जोशीले ग्रामीण सडक बनाउँदा खसेका ढुंगा र माटोका ढिस्काले मुख्य राजमार्गमा यातायात अवरुद्ध हुने गरेको बताए । उनले भने, ‘पहिला यस्तो समस्या थिएन । अहिले त माथिबाट खसेका ढुंगा, माटोले सडक भास्सिएर दुर्घटनाको जोखिम बढाएको छ ।’ ऐरिछानाबाट–डाँडाकोट सडक निर्माणका क्रममा खसेको माटोले ऐरिछानास्थित महाकाली राजमार्गको नाली बन्द भएको छ । गत वर्षदेखि मालिकार्जुन गाउँपालिकाले ठेक्कामा निर्माण सुरु गराएको सो सडक अझै बन्न सकेको छैन । ‘सडकको ट्र्याकसम्म खोलिएको छ । तर, ग्रेड नमिलाउँदा सवारी चल्ने अवस्था छैन,’ स्थानीय जोग्रेन्द्र धामीले भने, ‘सडकको सुविधा पुग्ने ठाउँमा समेत मुख्य सडकबिग्रेको छ ।’ गाउँमा सडक लैजाने नाममा राजमार्ग बिग्रेकोमा धामीले गुनासो गरे । ‘गाउँतिर पनि सडक पुग्नुपर्छ तर मुख्य राजमार्गमा क्षति नहुनेगरी काम गर्नुपर्छ,’ उनले भने ।

करकले–देथला–दल्लेक–खलंगा सडक खण्डमा पनि आधा दर्जन ठाउँमा सहायक मार्ग बनिरहेका छन् । महाकाली नगरपालिका–३, मालबेला पुग्न उक्त सडक बनिरहेको हो । प्रदेश सरकारको बजेटमा बन्न लागेको सो सडकको ट्र्याक गत असारमै खोलिएको हो । ग्रामीण सडकहरू प्राविधिक योजनाबिनै निर्माण भइरहेका लास्कुका स्थानीय बताउँछन् । दल्लेक–नागु–सीना सडक निर्माणका कारण नौगाड गाउँपालिका–३, चौड आसपासको खोला किनार क्षेत्रमा वर्षातमा मुख्य राजमार्ग क्षेत्र नै अवरुद्ध हुने गरेको नौगाड–२ का गोविन्दसिंह ठगुन्नाले बताए । ‘यस सडकले दल्लेक गाउँका केही घरमा जोखिम बढाएको छ,’ उनले भने, ‘गाउँपालिकाले सडक बनाउनुअघि सम्भावित जोखिमका बारेमा कहिल्यै सोचेन, जसका कारण यस्तो अवस्था आएको हो ।’

प्रकाशित : फाल्गुन १, २०७६ ०९:३०
ADVERTISEMENT
प्रतिक्रिया
पठाउनुहोस्
ADVERTISEMENT

५ वर्षमा पनि बनेन डोटी सभाहल

संरचना बने पाँचवटा हलमा एकसाथ १५ सय जनालाई तालिम दिन सकिनेछ तर कामले तीव्रता नपाउँदा तेस्रोपटक म्याद थपको तयारी भइरहेको छ
मोहन शाही

डोटी — सुदूरपश्चिम प्रदेशकै ठूलो क्षमताको भनिएको डोटीमा निर्माणाधीन सभाहल अहिले अलपत्र अवस्थामा छ । दिपायल राजपुरमा निर्माण भइरहेको सभाहल बनाउने कार्य ठेकेदारको ढिलासुस्तीका कारण अलपत्र परेको हो ।

२०७१ सालमा सम्झौता भई तीन वर्षमा काम सक्नेगरी श्याम सुन्दर निर्माण सेवा, काठमाडौंले सभाहल निर्माणको जिम्मेवारी पाएको थियो । तर दोस्रोपटक थपिएको म्यादसमेत गुज्रिसकेकोले निर्माण कम्पनीले तेस्रोपटक म्याद थपका लागि माग गरेको छ ।

संघीय सहरी तथा भवन निर्माण आयोजनामार्फत निर्माण भइरहेको सो योजनाअन्तर्गत पाँचवटा तालिम हल बन्नेछन् । जसमा एकैसाथ १५ सय जनालाई तालिम दिन सकिने आयोजनाका सबइन्जिनियर अभिषेक मलासीले बताए । ‘पाँचवटा हलमा एकसाथ १५ सय जनालाई व्यवस्थित रूपमा तालिम दिन सकिने संरचना सभाहलभित्र बन्नेछन्,’ उनले भने, ‘तर दुर्भाग्य कामले तीव्रता नपाउँदा तेस्रोपटक म्याद थपको तयारी भइरहेको छ ।’

निर्माण थालिएयता बीचमा स्थानीय तहको निर्वाचन, प्रदेश राजधानीका सम्बन्धमा भएको आन्दोलन लगायतका कारण निर्माणमा ढिलाइ भएको उनको भनाइ छ । सभाहलको निर्माण कार्य दुई चरणमा अघि बढाइएको छ । स्टेज र प्यारापिटसहितको कन्फरेन्स हल, बेन्क्वेट हल लगायतका संरचना पहिलो चरणमा निर्माण हुने बताइएको थियो ।

जसका लागि ११ करोड ५२ लाखमा सम्झौता भई काम सुरु गरिए पनि अहिलेसम्म सम्पन्न भएको छैन । सुविधासम्पन्न भनिएको सभाहलमा ५० जना महिला पुरुषले एकसाथ प्रयोग गर्न मिल्ने शौचालय बनाइने छ । सबइन्जिनियर मलासीका अनुसार पहिलो चरणको संरचना निर्माणका लागि तेस्रोपटक म्याद थप्ने प्रक्रिया अघि बढेको हो । दोस्रो चरणमा २ करोड ६५ लाख रुपैयाँको लागतमा अफिस लाइब्रेरी, मिटिङ हल लगायतका संरचना बन्नेछन् । यसका लागि दोस्रोपटक थपिएको म्याद आगामी जेठमा सकिनेछ । दोस्रो चरणको काम भने सम्पन्न हुने अवस्थामा पुगेको उनले बताए ।

उपयोगबारे अन्योल
सभाहल निर्माणसँगै त्यसको उपयोगबारे अन्योलता छ । प्रदेशको राजधानी तोक्नुपूर्व नै निर्माण सुरु गरिएको सभाहलको सञ्चालनसम्बन्धी स्पष्ट कार्यविधि नबनेकाले त्यसको सञ्चालन सम्बन्धमा अन्योलता थपिएको हो । ‘हामीले कसलाई हस्तान्तरण गर्ने त्यो स्पष्ट छैन,’ सबइन्जिनियर मलासीले भने, ‘त्यसको मर्मत, सम्भार र सुरक्षाको कुरा पनि छ ।’ पछिल्लो समय कञ्चनपुरको महेन्द्रनगर र कैलालीको टीकापुरमा पनि सभाहल निर्माण भएका छन् । तर क्षमताका अधारमा डोटीमा निर्माणाधीनभन्दा कम क्षमताका हुन् । ‘प्रदेश राजधानी हुन सक्ने आधारमा डोटी सभाहलको तयारी गरिएको हो,’ दिपायल सिलगढी नगरपालिका–४ का वडाध्यक्ष वीरेन्द्र शाहले भने, ‘राजधानी अन्यत्र गए पनि डोटी सभाहलको पूर्ण रूपमा उपयोग कसरी गर्ने भन्ने चिन्ता स्थानीय तहलाई छ ।’

सुदूरपश्चिमका मुख्यमन्त्री त्रिलोचन भट्टले उक्त सभाहललाई पूर्ण रूपमा सञ्चालनमा ल्याउन आफ्नै भवन नभएका सरकारी कार्यालयहरू राख्न सकिने सुझाएका छन् ।

प्रकाशित : फाल्गुन १, २०७६ ०९:२८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×