धमाधम स्तरीय सडक

एसियाली विकास बैंकको एकिकृत क्षेत्रिय सहरी विकास आयोजना अन्तर्गत भीमदत्त नगरपालिकामा अबको २ वर्षमा साढे ३६ किमि कालोपत्रे सडक निर्माण हुनेछ । जुन माथि उल्लेख गरिएकै मापदण्डको हुनेछ । पहिलो चरणमा अहिले झन्डै १४ किमि सडक निर्माणका लागि ठेक्का भइसकेको छ । जुन महेन्द्रनगरको मुख्य बजार क्षेत्रमा हुनेछ । बांँकी २२ किमि सडकका योजना छनोटको काम पनि अन्तिम चरणमा रहेको भीमदत्त नगरपालिकाका इन्जिनियर हिमालय ऐरले बताए ।

‘सडकसँगै एकिकृत फोहोर मैला व्यवस्थापन केन्द्र निर्माणका लागि पनि स्थान छनौटको काम अन्तिम चरणमा पुगेको छ,’ इन्जिनियर ऐरले भने, ‘उक्त योजना पनि २ वर्षभित्रै सम्पन्न हुनेछ ।’ उनका अनुसार सडक पूर्वाधारमा १ अर्ब ७६ करोड, एकीकृत फोहोर मैला व्यवस्थापन केन्द्रमा ५८ करोड र अन्य रकम सवारी साधन खरिद, कर्मचारी परिचालन र विभिन्न प्राविधिक क्षेत्रमा खर्च गरिनेछ । २०१७ देखि सुरु भएको उक्त आयोजनाको समयावधि ५ वर्ष हो ।

महेन्द्रनगरमा ३ वर्षदेखि सहरी विकास तथा भवन निर्माण विभाग संघीय योजना कार्यान्वयन एकाइ धनगढीको सघन सहरी विकास कार्यक्रमअन्तर्गत धमाधम सडक पूर्वाधार निर्माण भइरहेको छ । उक्त सडक पनि दुवैतर्फ ड्रेनसहितको छ । उक्त कार्यक्रमअन्तर्गत महेन्द्रनगर बजार तथा आसपासका क्षेत्रमा करिब ५५ किमि कालोपत्रे सडक निर्माण भइरहेको छ । सघन सहरी विकास कार्यक्रमअन्तर्गत ३ प्याकेजमा काम भइरहेको छ । पहिलो प्याकेजअन्तर्गतको ४६ किमि सडक कालोपत्रेको काम अन्तिम चरणमा छ । दोस्रो प्याकेजअन्तर्गत पनि ८ किमि सडक कालोपत्रेको काम चलिरहेको छ । यसैगरि तेस्रो प्याकेजअन्तर्गत १ किमि सडक कालोपत्रे भइरहेको छ । तीन वटै योजनाका लागि ५७ करोडमा ठेक्का भएको हो । ‘यो आवभित्रै सबै काम सकिनेछ,’ एकाइका इन्जिनियर मोहनराज अवस्थीले भने ।

‘सडक निर्माणमा त धमाधम काम भइरहेको छ, अहिले चालु योजना सकिएपछि सडक पूर्वाधारमा भीमदत्त अब्बल ठहरिनेछ’ इन्जिनियर ऐरले भने, ‘सडक निर्माणले मात्रै हुँदैन त्यसपछि मर्मतमा विशेष जोड दिनुपर्नेछ, त्यसका लागि पनि ठूलो स्रोत अवश्यक पर्छ ।’ उसो त भीमदत्त नगरपालिकाले पनि आफ्नै साधन स्रोतमा धेरै सडकहरू निर्माण गरिसकेको छ । नगरपालिकाले आफ्नै लगानीमा हालसम्म १ सय ६० किमि सडक कालोपत्रे गरिसकेको छ ।