६ वर्षमा पनि बनेन पुल

साँफे–मार्तडी खण्डअन्तर्गत बाजुराको बूढीगंगा नगरपालिका ८ र अछामको मेल्लेख गाउँपालिका जोड्ने पुल नबन्दा आउजाउमा समस्या 
मेनुका ढुंगाना

(अछाम) — अछाम र बाजुरा जोड्ने बिडाबगर पुल ६ वर्षदेखि अलपत्र परेको छ । मेल्लेख गाउँपालिकाको कुस्कोट, ठाँटिलगायत क्षेत्रका यात्रुलार्ई आउजाउमा समस्या भएपछि डोलिडारले ७५ मिटर लामो पुल बनाउन लागेको हो ।

मुआब्जाका विषयमा स्थानीयको अबरोधले निर्माण अघि बढाउन नसकेको स्वाँर कन्सट्रक्सनका ठेकेदार रवि स्वाँरले बताए । ‘२०७१ मा सम्झौता भएको पुल २ वर्षमा बनाइसक्ने गरि जिम्मा लिएको हो र तर स्थानीयले अवरोध गरेका कारण बाँकि काम अघि बढाउन सकेको छैन,’ उनले भने, ‘काम गर्ने वातावरण भए तत्काल काम सुरु गर्छु ।’ अछाम र बाजुरा जोड्ने पक्की पुल करिब ४ करोडमा बन्न लागेको हो । साँफे–मार्तडी खण्डअन्तर्गत बाजुराको बुढिगंगा नगरपालिका ८ र अछामको मेल्लेख गाउँपालिका जोड्ने पुल नबन्दा आउजाउमा समस्या भएको कुस्कोटका धनजित साउँदले बताए । निर्माण भइरहेको पुल आसपासका जग्गा धनिले मुआब्जा नपाएको भन्दै उनीहरूले काम गर्न रोक लगाएका हुन् ।

अछामका स्थानीयका अनुसार सरोकारवालाले समन्वय सहकार्य नगर्ने र बाजुराका स्थानीयको अबरोधका कारण पुलको काम अघि बढ्न सकेको छैन । ‘अछामक् ाबजार आउनलाई हामीले बाजुराको बाटो प्रयोग गर्नुपर्छ । दुःख यहाँका जनतालाई छ । सरोकारवालाबाट काम सुरु गर्न आवश्यक पहल हुन सकेको छैन ’ उनले भने ।

दुइटा पिलर र आसपासको पर्खालको काम सकिए पनि काम रोकिँदा निर्माणका लागि ल्याएका सामग्री बाजुराको रिठा बजारमा अलपत्र परेका छन् । मुआब्जा नदिएसम्म काम अघि बढ्न नदिने किसानहरूले बताए । यही कारण एक वर्षदेखि खेती गर्न नपाएको स्थानीय भक्त थापाले बताए । ‘एकै टोलका २३ जनाको जग्गा पुल निर्माण स्थलसम्म जाने रोडमा परेको छ । यसअघि सरकारी दरअनुसार १४ लाख दिने सहमती भएपछि हामीले काम गर्न अवरोध गरेका थिएनौं’ थापाले भने, ‘दिन्छौं ंभनेर झुटो मात्र बोल्ने तर मुआब्जा नदिने भएकाले हामीले काम गर्न नदिएका हौं ।’ पहिलो किस्ता बापत ४ लाख रुपैंया पाएको र अझै १० लाख रुपैंया पाउन बाँकि रहेको उनको भनाइ छ ।
स्थानीय तह गठन भइसकेपछि अछामको मेल्लेख गाउँपालिकाबाट १० लाख रकम उपलब्ध गराउने सहमतीपछि काम अगाडी बढाउन दिइएको थियो । तर हालसम्म उक्त रकम दिने बारे गाउँपालिकाले कुनै वास्ता नगरेको बाजुराको बुढिगंगा नगरपालिका ८ का वडा सदस्य सुरेन्द्रबहादुर थापाले बताए । ‘१० लाख रकम ल्याएर प्रभावित स्थानीय बासिन्दालाई दिएपछि काम तत्काल सुचारु हुन्छ । त्यसको लागि अछामबाट पहल हुन जरुरी छ’ उनले भने ।

मेल्लेख गाउँपालिका अछामले बाजुराका प्रभावितलाई तत्काल दुइ किस्तामा रकम उपलब्ध गराउने र काम अघि बढाउने सहमति भएको ठेकेदार कम्पनीका स्वारले बताए ।

प्रकाशित : मंसिर ३, २०७६ १०:१२
प्रतिक्रिया
पठाउनुहोस्
ADVERTISEMENT

शैक्षिक गुणस्तर सुधार्न पहल

कान्तिपुर संवाददाता

(बुटवल) — धेरै सामुदायिक विद्यालयमा अतिरिक्त पढाउने र प्रयोगात्मक अभ्यास गर्ने व्यवस्था छैन । त्यसले विद्यार्थीको सिकाइ र शैक्षिक गुणस्तर कमजोर छ । सामुदायिक विद्यालयको यही शैक्षिक गुणस्तर सुधारका लागि बुटवल उपमहानगरले आधुनिक विज्ञान प्रयोगशाला र पुस्तकालय निर्माण थालेको छ । 

पहिलो चरणमा कक्षा ११ र १२ मा विज्ञान शिक्षाका कक्षा सञ्चालन भएका विद्यालयमा आधुनिक प्रयोगशाला बनाएको छ । मावि तहका विद्यार्थीलाई कम्प्युटर र वाइफाइ सुविधासहितका व्यवस्थित पुस्तकालय बनाउँदै छ ।

उपमहानगर प्रमुख शिवराज सुवेदीले प्रयोगात्मक अभ्यासको अभावमा सिकाइलाई कमजोर हुन नदिन सबै विद्यालयमा विज्ञान प्रयोगशाला र व्यवस्थित पुस्तकालय बनाउने नीति लिएको बताए । ‘सामुदायिक विद्यालयको अध्ययनले प्रयोगात्मक अभ्यास र अतिरिक्त पढाउने व्यवस्था नहुँदा लगानीअनुसारको प्रतिफल आउन र त्यसअनुसार शैक्षिक गुणस्तर सुधार हुन नसकेको देखाएको छ,’ उनले भने, ‘यसलाई सुधार्न पुस्तकालय र प्रयोगशालामा जोड दिएका हौं ।’

गत वर्ष उपमहानगरले विज्ञान प्रयोगशाला निर्माणका लागि झन्डै २० लाख रुपैयाँ बजेट विनियोजन गरेको थियो । यसबाट नविन औद्योगिक कदरबहादुर रीता मावि देवीनगर, कान्ति मावि हाटबजार लाइन र सिद्धेश्वर लालकुमारी मावि दीपनगरमा आधुनिक विज्ञान प्रयोगशाला निर्माण भएको छ ।

‘किताबमा पढेका हरेक कुरा प्रयोगशालामा प्रयोग गरेर हेर्छौं,’ कक्षा ११ मा जीव विज्ञान पढ्दै गरेकी अमिशासेन वलीले भनिन्, ‘यसले पढेको कुरा बुझ्न र सम्झन पनि सजिलो भएको छ ।’ विज्ञका अनुसार प्रारम्भिक कक्षा अर्थात् १ देखि ३ सम्मका विद्यार्थीमा अक्षर चिन्ने, यति, गति र लय मिलाएर शब्द, वाक्य परिच्छेद पढ्ने, पढेका कुरा बुझ्ने र बुझेका कुरालाई मौखिक वा लिखित रुपमा अभिव्यक्त गर्ने सीप हुनुपर्छ । प्रारम्भिक कक्षामा नेपाली विषयमा कमजोर हुँदा उनीहरूको माथिल्लो तहसम्मको पढाइ नै प्रभावित बन्छ । त्यो रोक्न बुटवलका सबै सामुदायिक विद्यालयमा शैक्षिक कुनो (बाल पुस्तकालय) बनाइएको छ । यहाँ ३८ सामुदायिक विद्यालय छन् । गत वर्ष प्रत्येक सामुदायिक विद्यालयमा बाल पुस्तकालय बनाउन ४८ लाख १८ हजार ४ सय ५० रुपैयाँ रकम उपलब्ध गराइएको थियो । कान्ति माविका प्रधानाध्यापक गोविन्द ज्ञवालीले बाल पुस्तकालयले साना बालबालिकालाई अक्षर बुझेर पढ्ने र बुझेको कुरा अभिव्यक्त गर्ने सीप बढाउन सहज भएको बताए । ‘उनीहरूमा पढ्ने रुचि जागेको छ,’ उनले भने ।

उपमहानगरले मावि तहका विद्यार्थीलाई लक्षित गरी आधुनिक पुस्तकालय निर्माण थालेको हो । अहिलेसम्म अमर, उजिरसिंह, ज्ञानोदय रात्रि र जितेश्वरी माविमा आधुनिक पुस्तकालय स्थापना भएका छन् । त्यसका लागि उपमहानगरले प्रतिविद्यालय ६ लाख ५० हजार रुपैयाँ उपलब्ध गराएको थियो । यस वर्ष थप पाँच विद्यालयमा आधुनिक पुस्तकालय बन्नेछन् । शिक्षा महाशाखा प्रमुख मित्रमणि खनालले विद्यार्थीलाई अतिरिक्त ज्ञान दिन तथा खाली पिरियडमा पढ्ने बनाउन पुस्तकालय स्थापना गरिएको बताए । ‘किताबी ज्ञानले मात्रै व्यावहारिक शिक्षा अपुरो हुन्छ,’ उनले भने, ‘त्यसैले विद्यार्थीमा सूचना प्रविधि, नैतिकता, आचरण, कला साहित्यलगायतको जानकारी दिन कम्प्युटरसहितका पुस्तकालय स्थापना गरिएको हो ।’ विद्यालयले सिकाइमा चक र डस्टरको साटो ल्यापटप र प्रोजेक्टर प्रयोग गर्न थालेको उनले बताए ।

प्रकाशित : मंसिर ३, २०७६ १०:०९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×