पाँच जिल्लामा चुनावी तयारी

मेनुका ढुंगाना

(अछाम) — स्थानीय तहको उपनिर्वाचन गर्नुपर्ने सुदूरपश्चिमका ५ जिल्लामा सम्बन्धित जिल्ला निर्वाचन कार्यालयले आवश्यक तयारी सुरु गरेका छन् । कञ्चनपुर, बैतडी, डोटी, अछाम र बाजुराका गरी ७ स्थानमा उपनिर्वाचन हुँदैछ । सम्बन्धित निर्वाचन कार्यालयका अनुसार सम्बन्धित जिल्लामा निर्वाचन अधिकृत तोकिएको छ । अहिले उनीहरूलाई आवश्यक प्रशिक्षण लगायतका काम भइरहेको छ । 

अछामको मेल्लेख गाउँंपालिका–५ का वडाध्यक्ष रामबहादुर बोहरा, बैतडीको पुर्चौडी नगरपालिका–४ का वडाध्यक्ष गौतम प्रसाद भट्ट, सुर्नया गाउँपालिका–१ का वडाध्यक्ष कलसबहादुर चन्द र दोगडाकेदार गाउँपालिका–४ का वडाध्यक्ष मानबहादुर बिष्टको निधनपछि पद रिक्त छ । यी पदमा जनप्रतिनिधि चयनका लागि उपनिर्वाचन हुन थालेको हो ।

यस्तै डोटीको आदर्श गाउँपालिका–२ का वडाध्यक्ष पदमसिंह बोहरा, बाजुराको त्रिवेणी नगरपालिका–१ का वडाध्यक्ष खम्म दमाईको पनि मृत्युले पद रिक्त छ । कञ्चनपुर जिल्ला समन्वय समितिको प्रमुख निर्वाचित भएपछि फैरु तामाङले पुनर्वास नगरपालिका–३ को वडाध्यक्ष पद छाडे । उक्त पदका लागि पनि निर्वाचन हुँदैछ । उपनिर्वाचनमा सुदूरपश्चिम प्रदेशका १० हजारभन्दा बढीले मतदान गर्न पाउनेछन् । डोटीको आदर्श–२, अछामको मेल्लेख–५ र बाजुराको त्रिवेणी–१ मा गरि ४ हजार ३ सय ३६ मतदाता छन् । डोटीको आदर्श–२ मा २ हजार ४ सय ५९ र अछाममा १ हजार ९ सय ४ मतदाता छन् । बाजुरामा १ हजार ३९ र कञ्चनपुरमा १ हजार १ सय ९९ मतदाता छन् ।

सुदूरपश्चिमका यी पाँच जिल्लाबाट १० हजार ९ सय ३६ मतदाताले उपनिर्वाचनमा भाग लिनेछन् । अछामको मेल्लेख–५ मा निर्वाचन कार्यालय स्थापना गरिएको छ । भवानी आधारभूत विद्यालय काटेगाउँ र जनता मावि मेल्लेखमा मतदान केन्द्र निर्धारण गरिएको निर्वाचन अधिकारीगजेन्द्रप्रकाश थारूले बताए ।

प्रकाशित : कार्तिक २४, २०७६ ०९:४३
ADVERTISEMENT
प्रतिक्रिया
पठाउनुहोस्
ADVERTISEMENT

त्रिवेणीमा वृद्धाश्रम

कान्तिपुर संवाददाता

(सल्यान) — अशक्त तथा घरवारविहीन ज्येष्ठ नागरिकका लागि त्रिवेणी गाउँपालिकाले वृद्धाश्रम सञ्चालन गर्न लागेको छ । वृद्धाश्रमका लागि लुहाममा दुईकोठे भवन निर्माण भइसकेको छ । विपन्न, अशक्त र घरबारविहीन ज्येष्ठ नागरिकलाई खाना र बसोबासको सुविधा दिनेगरी वृद्धाश्रम सञ्चालन गर्न लागिएको हो । 



गाउँपालिका क्षेत्रका सडकमा सहाराविहीन ज्येष्ठ नागरिकको संख्या बढ्दै गएपछि वृद्धाश्रम सञ्चालन गर्न लागिएको गाउँपालिकाले जनाएको छ । २० लाख रुपैयाँको लागतमा वृद्धाश्रमका लागि भवन निर्माण गरिएको गाउँपालिका अध्यक्ष मानबहादुर डाँगीले बताए ।

‘ज्येष्ठ नागरिकको सम्मानसँगै सहाराविहीनको संरक्षणका लागि बृद्धाश्रम सञ्चालन गर्न लागेका हौं,’ उनले भने, ‘भवन निर्माणको काम सकिएको छ, थप केही व्यवस्थापनका काम भएपछि सहाराविहीनलाई वृद्धाश्रममा ल्याइनेछ ।’ ज्येष्ठ नागरिकको पालनपोषणका लागि कोषको स्थापना गरिने जानकारी उनले दिए । ‘घरबारविहीन ज्येष्ठ नागरिक जहाँबाट पनि आश्रममा बस्न आउन सक्छन्,’ उनले भने, ‘अब बेवारिसे भएर सडकमा भौंतारिँदै हिंड्नु पर्दैन ।’

वृद्धाश्रम संरक्षण र सञ्चालनको जिम्मा त्रिवेणी तीर्थशाला धामलाई दिइएको छ । ज्येष्ठ नागरिकको खानबस्ने सुविधाका लागि गाउँपालिकाले आवश्यक सामग्रीको व्यवस्थापन गर्ने अध्यक्ष डाँगीको भनाइ छ । त्रिवेणी तीर्थशाला धाम जिल्लाको प्रमुख धार्मिक स्थल मानिन्छ । पूजाआजाका लागि आउने वृद्धलाई समेत अस्थायी रूपमा बसोबासको व्यवस्था मिलाउने योजना छ । ज्येष्ठ नागरिकलाई राख्न थालिएपछि आश्रमको थप व्यवस्थापनका काम गरिनेउनले बताए ।

प्रकाशित : कार्तिक २४, २०७६ ०९:३३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×