उपनिर्वाचनको तयारी तीव्र

तयारीका क्रममा ३ दिनअघि निर्वाचन अधिकृतको कार्यालय स्थापना गरेर निर्वाचन अधिकृतहरू पनि तोकिसकिएको कार्यालयले जनाएको छ । मुख्य निर्वाचन अधिकृतको कार्यालय सुर्नया गाउँपालिका १ को सत्बाँझमा रहेको डिभिजन वन कार्यालयमा स्थापना गरिएको छ । यस्तै दोगडाकेदारको ४ र पुरचौर्डीको ४ नम्बर वडामा कार्यालय स्थापना गरिसकिएको छ । सुर्नयाका लागि जिल्ला अदालत बैतडीका न्यायधिस ईश्वरीप्रसाद भण्डारी पुरचौर्डी ४ मा उच्च अदालत कञ्चनपुर इजलास शाखाका रजिस्ट्रार टेकराज जोशी र दोगडाकेदार ४ मा उच्च अदालत डोटीका सह–रजिस्ट्रार टेकबहादुर थापालाई निर्वाचन अधिकृत तोकिएको छ । सम्बन्धित अधिकृतहरू तोकिएका ठाउँमा पुगिसकेका छन् ।

जिल्ला निर्वाचन कार्यालयले उपनिर्वाचनमा खटिने कर्मचारीहरूको विवरण विभिन्न सरकारी कार्यालयबाट माग्दै तयार पार्ने काम गरिरहेको जनाएको छ । १ वडामा २/२ जना मतदाता शिक्षा कार्यकर्ता खटाउने तयारी गरिएको शिक्षा विकास तथा समन्यव इकाई कार्यालयलाई भनेको जिल्ला निर्वाचन अधिकारी माधवप्रसाद फुयाँलले बताए । शिक्षक शिक्षिकाहरूलाई मतदाता शिक्षामा परिचालन गर्ने तयारी भएको उनले जानकारी दिए । मंसिर ५ देखि एक सातासम्म उनीहरू सम्बन्धित वडामा पुग्ने फुयाँलले बताए । सुर्नया गाउँपालिकाको गाविस भवन गुरकेल्ली, पुरचौडी नगरपालिकाको महादेव मावि शिबाव र पहरोल मावि बागामा मतदान केन्द्र तोकिएको छ । यस्तै दोगडाकेदार गाउँपालिकाको केदार माध्यमिक विद्यालय पीपलकोट र हुनैनाथ आधारभूत विद्यालय कपिन्नामा मतदान केन्द्र तोकिएको छ ।