महिनामा ९ दुर्घटना

कान्तिपुर संवाददाता

धनगढी — कैलालीमा दसैंयता सवारी दुर्घटना ह्वात्तै बढेको छ । एक महिनाको अवधिमा ९ दुर्घटना भएका छन् । ती दुर्घटनामा ७ जनाको मृत्यु भएको छ । चाडबाडमा भीड बढ्ने र तीव्र गतिमा सवारी हाँक्दा दुर्घटना बढेको ट्राफिक प्रहरीको भनाइ छ ।

यसै महिनाको पहिलो साता पूर्वपश्चिम राजमार्गअन्तर्गत कैलालीको गौरीगंगा नगरपालिका ८ को बडैपुरमा हाइसले अटोरिक्सालाई ठक्कर दिँदा अटोमा सवार एक जनाको मृत्यु भयो । अटो चालक मसुरियाकै ४० वर्षीया मानसिंह धामी घाइते भए । यही साता कैलालीकै गौरीगंगा नगरपालिका २ आमबगैचामा मोटरसाइकलले ठक्कर दिदा सोही ठाउँकी लक्ष्मी विक घाइते भइन् । यस्तै कैलालीमा दुईवटा मोटरसाइकल आपसमा ठोक्किँदा एक जनाको ज्यान गयो । घोडाघोडी नगरपालिका २, साडेपानीमा मोटरसाईकल ठोक्किदा सोही ठाउँका ५० वर्षीय देवीराम आचार्यको मृत्यु भयो । सोहि दिन कैलालीमा बसको ठक्करबाट २ बालकको मृत्यु भयो । बौनियाामा कात्तिक १४ गते बसको ठक्करबाट घाइते भएका बर्दगोरीया गाउँपालिका १ का ८ वर्षका अंशु चौधरी र घोडाघोडी नगरपालिका ८ का १२ वर्षीय लक्ष्मण चौधरीको उपचारका क्रममा मृत्यु भयो । ४ दिनअघि बस र ट्रक ठोक्किँदा तीनजना घाइते भए । लम्कीचुहा नगरपालिका ३, चिसापानीनजिक दुर्घटना भयो । ३ दिनअघि बसले ठक्कर दिए । मोटरसाइकलमा सवार २ जनाको मृत्यु भयो ।

हरेक बर्ष चाडपर्वका बेला यस्ता दुर्घटना हुने गरेको जिल्ला ट्राफिक प्रहरी कार्यालय कैलालीका इन्स्पेक्टर सरोजकुमार ठकुराठी बताउँछन् । उनले तिहारका बेला चालकले मादक पदार्थ सेवन गर्ने गरेको र तीव्र गतिमा गाडी हाक्ने गरेकाले दुर्घटना हुने गरेको बताए । ‘संख्यात्मक रुपमा हरेक बर्ष दुर्घटना बढेको देखिन्छ । तर, यस बर्ष ज्यान गुमाउनेको संख्या पनि बढि छ,’ उनले भने, ‘यसरी हुने सवारी दुर्घटनामा ९० प्रतिशत गल्ती चालकको देखिएको छ ।’ केही कमजोरी यात्रुबाट पनि हुने गरेको धनगढी बोराडाँडीका रञ्जित बिष्ट बताउँछन् । सिट क्षमताभन्दा बढी यात्रु बसेर आफैंले ज्यान जोखिममा पारेर यात्रा गर्ने गरेको बताए । ‘बस भरिभराउ हुन्छ । हामीलाई जहाँ पनि छिटै पुग्नुपर्ने हतारमा अर्को बस कुर्नभन्दा त्यहि बसमा यात्रा गर्छौं । दुर्घटना हुँदा ज्यान गुम्छ,’ बिष्टले भने । बसले सिट संख्याभन्दा बढि यात्रु बोक्दा पनि मौन बस्ने बस ब्यवसायी समितिका पदाधिकारीहरू सडक दुर्घटनाको दोस्रो कारण रहेको उनको भनाइ छ ।

केहि दिनअघि मालिका यातायात ब्यवसायी संघको बभाङको बसको टिकट सामाजिक सञ्जालमा भाइरल थियो । उक्त टिकटमा ‘मिलेर बस्नू’ भन्ने लेखिएको थियो । बसमा रहेका सिट संख्या बुक भइसके पनि काउन्टरका कर्मचारीले कोचिएर बस्न टिकटमै ‘मिलेर बस्नू’ लेखिदिएका थिए । क्षमताभन्दा बढि यात्रु कोचेर लैजाँदा दुर्घटना हुने गरेको धनगढी हसनपुरकी पवित्रा जोशी बताउँछिन् । उनले भनिन्, ‘बस व्यवसायीहरू यात्रुको सहजताका कुरा गर्छन् । तर ब्यवहारमा उनीहरूको आफ्नै स्वार्थ रहेको हुन्छ ।’ यात्रु संख्या बढी भएकाले यसै साता महेन्द्रनगरबाट बाजुरा जाँदै गरेको बस डोटीमा दुर्घटना भयो । एक जनाले ज्यान गुमाए, ३० बढी घाइते भए ।

ठाउँठाउँमा ट्राफिक प्रहरी परिचालन गरिएका हुन्छन् । साँझपख चेकजाँचका क्रममा ट्राफिक प्रहरीको झारो टार्ने गर्दा पनि चाडपर्वका बेला दुर्घटना न्यूनिकरण हुन नसकेको धनगढी २ का सरगम विष्टको बुझाइ छ । उनले क्षमताभन्दा बढि यात्रु बोक्ने सवारीसाधनलाई कडा कारबाही गर्नुपर्ने सुझाए । क्षेत्रीय ट्राफिक प्रहरी कार्यालय अत्तरियाका अनुसार आव ०७३/७४ मा २ सय ५५ दुर्घटनामा सय जनाले ज्यान गुमाएका छन् । ०७४/७५ मा २ सय १९ दुर्घटनामा १ सय १३ को मृत्यु भयो । ०७५/७६ मा ३ सय १६ दुर्घटना भएका छन् । ती घटनामा १ सय ४२ जनाले ज्यान गुमाएको क्षेत्रीय ट्राफिक प्रहरी कार्यालय अत्तरिया प्रहरी सहायक निरीक्षक नवराज शाहीले बताए । उनले चालु आवको ४ महिनामा २१ वटा दुर्घटना भएका छन् । ती घटनामा २० जनाले ज्यान गुमाएको उनले बताए । शाहीले दसैं यता मात्रै सुदुरपश्चिम प्रदेशभर १२ दुर्घटनामा ९ जनाले ज्यान गुमाएको र ५ जना सख्त घाइते भएका छन् ।

प्रकाशित : कार्तिक २०, २०७६ १०:४८
प्रतिक्रिया
पठाउनुहोस्

राहदानी लिने बढे, डीभी भर्ने घटे

गाउँमै रोजगारीको सम्भावना नदेखिएपछि स्नातकोत्तर गरेका युवाहरू पनि वैदेशिक रोजगारीका लागि विदेश जाने तयारीमा 
कान्तिपुर संवाददाता

(अछाम) र (धनगढी) — दसैं–तिहारयता जिल्ला प्रशासन कार्यालयमा राहदानी लिनेको संख्या बढेको छ । चाडबाड मनाउन घर आएको मौका पारेर सदरमुकाम आएका स्थानीय युवाहरूलाई यतिबेला जिल्ला प्रशासन कार्यालयमा देख्न सकिन्छ ।

दसैंतिहार बिदा सकिए पनि प्राय: सरकारी कार्यालय सेवाग्राही र कर्मचारीको अनुपस्थितिले सुनसान छन् । तर जिल्ला प्रशासन कार्यालयमा भने निकै चहलपहल छ । यहाँ सेवाग्राहीको भीड अघिपछि भन्दा बाक्लो देख्न सकिन्छ । ‘राहदानी बनाउनकै लागि मात्र काठमाडौंबाट जिल्ला आउनुपर्दा समय र खर्च बढी लाग्छ,’ मेल्लेख गाउँपालिका ७ नन्देगडाका दिनेश बुढाले भने, ‘स्नातकोत्तर सकेर २ वर्ष खाली बसें । कतै रोजगारी नपाइने जस्तो भएपछि राहदानी लिन आएको हुँ ।’ कुनै राम्रो देश जाने तयारी गरिरहेको उनले सुनाए । त्यतिबेलासम्म पासपोर्ट पनि बनिसक्छ ।’

कतिपय राहदानीको सिफारिस लिएर जाने तथा केही जिल्लाबाटै राहदानी बनाउन फाराम बुझाउन आउने गरेका छन् । अध्ययनको क्रममा काठमाडौं बस्ने र मौका मिले रोजगारीको लागि विदेश जान सकिने भएकाले राहदानी लिन सदरमुकाम आएको ढकारी गाउँपालिका ६ का नीतेश साउँदले बताए । ‘यताबाट सिफारिस लिएर गए काठमाडौंमा चाँडो हुन्छ,’ उनले भने, ‘पढाइ सकिएपछि विदेश जाने सोचेको छु । पञ्चदेवल विनायक नगरपालिकाका नरबहादुर रावल पनि वैदेशिक रोजगारीकै लागि राहदानी बनाउन लागेको बताउँछन् । ‘कामको सिलसिलामा विदेश जाने विचार गरी राहदानी बनाउन आएको हुँ,’ उनले भने, ‘अछामबाट अधिकांश पुरुष भारतमा जाने भए पनि पछिल्लो समयमा तेस्रो मुलुक जानेको संख्या बढिरहेको छ ।’

वैदेशिक रोजगारको आकर्षणले राहदानी लिनेको संख्या बढेको छ । जिल्ला प्रशासन कार्यालय अछामका अनुसार नागरिकताभन्दा राहदानी बनाउने बढी छन् । स्वदेशमा रोजगारीको अवसर नभएपछि युवाहरू वैदेशिक रोजगारीमा जान बाध्य भएका हुन् ।

कार्यालयका अनुसार चालु आवको साउनमा ६९, भदौमा ६३, असोजमा १७९ र कात्तिकमा सबैभन्दा बढि १७८ जनाले राहदानीका लागि सिफारिस लिएका हुन् । रोजगारी र अध्ययनका क्रममा विदेश जानेको संख्या बढेसँगै राहदानी बनाउनेहरू पनि बढेको सहायक प्रमुख जिल्ला अधिकारी शीतलबहादुर रावलले बताए । आव ०७४/७५ मा १० हजार ७६ जनाले राहदानी लिएका थिए । त्यस्तै आव ०७३/७४ मा ११ हजार ८४ जनाले लिएको तथ्यांक छ । वर्षैपिच्छे संख्या बढिरहेको छ । राहदानी लिँदा द्रुत सेवाका लागि १० हजार र साधारणका लागि ५ हजार रुपैयाँ लाग्छ । संख्या बढेसँगै राजस्व संकलनमा पनि वृद्धि भएको छ ।

डीभी भर्ने घटे

कैलाली बेलाका रामबहादुर रानाले परिवारका सबै सदस्यको नाममा अमेरिका जाने डाइभर्सिटी भिसा (डीभी) भर्न पाएनन् । उनी ५ वर्षदेखि आफू र आफ्नी पत्नीको नाममा डीभी भर्दै आएका थिए । उनको अमेरिका बसाइ सर्ने सपना पूरा हुन सकेको थिएन ।

यो वर्ष अन्तिम समयमा उनले डीभी भर्दा पासपोर्ट चाहिने कुरा थाहा पाए । दसैंतिहारको समय परेकोले उनले तुरन्तै पासपोर्ट बनाउन नपाएकाले डीभी भर्न पाएनन् । उनले मात्रै होइन । सन् २०२१ का लागि आवेदन खुला गरिएको डीभी भर्न पासपोर्ट र अमेरिका बसाइ रहेको आफन्तको नाम र ठेगाना उल्लेख गर्नुपर्ने प्रावधान भएकाले ८० प्रतिशत डीभी भर्ने घटेको धनगढीका विपिन आचार्यले बताए ।

‘अघिल्लो वर्ष डीभी भर्ने अन्तिम दिनसम्म घुइँचो हुन्थ्यो, रातको १२ बजेसम्म लाइन हुन्थ्यो,’ विपिन स्टेसनरीका सञ्चालक समेत रहेका आचार्यले भने, ‘यो वर्ष पासपोर्ट अनिवार्य गरिएकाले ८० प्रतिशतले डीभी भर्न नपाएर फर्के ।’ उनका अनुसार कसैलाई पहिल्यै जानकारी नभएर, कसैले पासपोर्ट बनाउन झन्झट मानेर डीभी नभरेका हुन् । केहीको अमेरिकामा बसाइ भएका आफन्त नभएर पनि डीभी भर्न नपाएको उनले बताए ।

तीमध्येका पुष्कर भट्ट पनि डीभी भर्न नपाउने मध्येका हुन् । उनले अमेरिकामा बस्ने आफन्त नभएर डीभी भर्न छुटेको बताए । विपिनकाअनुसार अघिल्ला वर्षमा पासपोर्ट र आफन्तको नाम पहिल्यै डीभी फाराममा भर्नुपर्ने हुन्थेन । गाउँघरका सर्वसाधारणले पनि डीभी भर्ने मौका पाउने गरेका थिए । ‘डीभी पनि अब आमनागरिकका लागि बन्द भयो,’ कैलाली लालपुरका खडकसिंह भाटले भने, ‘सबैले पहिल्यै पासपोर्ट बनाएर राखेको हुँदैन ।आवेदन भर्न चाहनेजति सबैका आफन्त पनि अमरिका बसेका हुँदैनन् ।’

प्रकाशित : कार्तिक २०, २०७६ १०:४७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT