सडक खन्ने विवादमा झडप
बैतडी — दशरथचन्द नगरपालिका ९, ग्वालेखमा सडक खन्ने क्रममा २ पक्षबीच सोमबार भएको झडपमा ८ जना घाइते भएका छन् । घाइते हुनेमा ७ पुरुष र १ महिला छन् ।
घाइतेहरूको जिल्ला अस्पतालमा उपचार भइरहेको छ । २८ वर्षीया गौरी जोशीलाई बढी चोट लागेको अस्पतालका डाक्टर वसन्तराज जोशीले बताए । एउटा पक्ष सडक खन्न नदिने र अर्को पक्षले जसरी पनि सडक लैजाने अडान लिएपछि उनीहरूबीच झडप भएको जिल्ला प्रहरी प्रमुख प्रहरी नायव उपरीक्षक डिल्लीनारायण पाण्डेयले बताए ।
‘वडा कार्यालयले सडक खन्नको लागि काम सुरु गर्ने तयारी गरेको थियो’ पाण्डेले भने, ‘यो अलि पहिलेबाटै २ पक्षका स्थानीयबीचको विवाद हो । सोमबार डोजरहरू खन्न अगाडी बढ्दा विवाद भयो ।’ डोजरमा भने सामान्य क्षति पुगेको प्रहरीले जनाएको छ ।