गौराको भव्य बिदाइ

गोठालापानीमा भेला भएका दर्शनार्थीलाई ५ प्रकारका पञ्च बिरुडाको प्रयोग गरी बनाइएको प्रसाद बाँडियो
तृप्ति शाही

(बैतडी) — जिल्लाभर गौराको उल्लास छ । सर्वसाधारणले आ–आफ्नो परम्पराअनुसार धूमधामले गौरा मनाइरहेका छन् । कतिपय स्थानमा गौरा बिसर्जन (समापन गरिएको) छ । कतिपय गाउँमा बिदाइको तयारी हुँदै छ ।

गौरा पर्वमा सहभागी सर्वसाधारण प्रसादका रूपमा बिरुडा खाँदै । तस्बिर : तृप्ति/कान्तिपुर

सबै ठाउँमा एकै दिन गौरा बिसर्जन हुँदैन । बिहीबार सदरमुकाम गोठलापानीमा विभिन्न सांस्कृतिक कार्यक्रम आयोजना गरी हर्षोल्लास साथ मनाइएको छ । शुक्रबार सिगास गाउँपालिकाको गाजँरी गौरामय भएको छ । अन्य विभिन्न ठाउँमा पनि गौरा भव्यताले मनाइएको छ । गोठलापानीमा मनाइएको गौरामा महिला–पुरुषले अलग–अलग देउडा खेलेका थिए । बाजागाजासहित बजारका विभिन्न स्थानबाट मुख्य बजार गोठलापानीको चोकमा आएका सर्वसाधारणले निकै तामझाम साथ गौरा मनाए ।

सुदूरपश्चिममा मनाइने गौरामा देउडा गीतहरूबाट आफ्नो दु:खसुख आपसमा साट्ने चलन छ । गौराको बिरुडा पवित्र प्रसाद मानिन्छ । बिदाइका दिन सबैले बिरुडाको प्रसाद ग्रहण गर्छन् । गोठालापानीमा भेला भएका दर्शनार्थीलाई ५ प्रकारका पञ्च बिरुडाको प्रयोग गरी बनाइएको प्रसाद बाँडिएको थियो । बजार व्यवस्थापन समिति र उद्योग वाणिज्य संघले बिरुडा वितरण गरेको बजार व्यवस्थापन समिति अध्यक्ष नरेन्द्रबहादुर चन्दले बताए । आफ्नो कला, संस्कृति जोगाउन यो कार्य गरेको उनले बताए । वाणिज्य संघकी सूचना अधिकृत कमला चन्दले भनिन्, ‘हाम्रोतिर गौरामा खाने मुख्य वस्तु नै बिरुडा भएकाले सबैलाई दिएका हौं ।’ उनले ८० किलो बिरुडा वितरण गरिएको बताइन् । गौरामा सबै आफन्तजनको भेटघाट हुनुका साथै व्यवसाय पनि राम्ररी चल्ने समिति अध्यक्ष चन्द बताउँछन् । उनले भने, ‘पहिलो र दोस्रो वर्षमा महिला र पुरुषको दोहोरी प्रतियोगिता भएको थियो ।

यो वर्ष देउडा खेल र बिरुडा बाँड्ने कार्यक्रम भयो ।’ गौरामा जिल्लाका सबै स्थानमा आ–आफ्नो एक मुख्य दिन मानेर मनाइने चलन रहेको सिगास गाउँपालिकाका चक्रबहादुर साउँद बताउँछन् । गौरा कृष्ण जन्माअष्टमीको दिन सुरु हुन्छ । विवाहित महिलाहरूले यो पर्वमा दुपधागोसमेत लगाउने चलन छ । उनीहरूले धागोको डोरी बाटेर घाँटीमा लगाउने एक प्रकारको डोरीलाई दुपधागो भन्ने गरिन्छ । यो धागो ब्राहमणबाट जपेर लगाइन्छ ।

प्रकाशित : भाद्र १४, २०७६ १०:२२
प्रतिक्रिया
पठाउनुहोस्

अतिक्रमण रोक्न खेलमैदान

विप्लव महर्जन

(सल्यान) — त्रिवेणी गाउँपालिका १ र ३ सीमाको रिखेबगरमा सरकारी जग्गाको संरक्षण गर्न खेलमैदान निर्माण गरिएको छ । अतिक्रमण बढ्दै गएपछि १० लाख रुपैयाँको लगानीमा खेलमैदान निर्माण गरिएको गाउँपालिकाले जनाएको छ ।

खेलमैदान निर्माणले अतिक्रमण रोक्न सहयोग गरेको स्थानीयको भनाइ छ । खेलमैदान बनेपछि २ वडामा रहेका सामुदायिक विद्यालयलाई अतिरिक्त क्रियाकलाप सञ्चालन गर्न सजिलो भएको छ । सरकारी जग्गा संरक्षणका लागि खेलमैदान बनाउने निर्णय गरिएको गाउँपालिकाका प्रमुख प्रशासकीय अधिकृत रेमन्त डाँगीले बताए । ‘सुविधायुक्त खेदमैदान नहुँदा गाउँपालिकास्तरीय खेलकुद प्रतियोगिता सञ्चालन गर्न समस्या थियो,’ उनले भने, ‘पूर्वाधार निर्माणसँगै सरकारी जग्गाको सदुपयोग भएको छ ।’ उनका अनुसार खेलकुद मैदानका नाममा एक बिघा जग्गा छ । पहिलो चरणमा ६० लम्बाइ र ४० मिटर चौडाइको खेलमैदान बनाइएको उनको भनाइ छ । उनका अनुसार बर्सेनि खेलमैदानमा अन्य संरचना निर्माण गर्ने गाउँपालिकाको योजना छ ।

गाउँपालिकाले खेलकुद मैदान निर्माणका लागि डीपीआर गर्दा २ करोड लागत अनुमान गरिएको थियो । बर्सेनि गाउँपालिकाले बजेट विनियोजन गर्ने र अपुग भएमा प्रदेश सरकारसँग माग गर्ने निर्णय गाउँपालिकाले गरेको छ । गाउँपालिकाले लुहाममा कबर्डहल निर्माणको योजना बनाएको छ । अहिले निर्माण गरिएको खेलकुद मैदानमा भलिबल, फुटबल र क्रिकेट खेल्न मिल्ने प्रमुख प्रशासकीय अधिकृत डाँगीले जनाए । ‘प्रदेश सरकारसँग पनि खेलकुद मैदान र कबर्ड हल निर्माणका लागि सहयोग माग गरिएको छ,’ उनले भने, ‘यस वर्ष थप विकासका लागि खेलमैदानमा ५ लाख रुपैयाँ विनियोजन गरेका छौं ।’

गाउँपालिका उपाध्यक्ष कल्पना खड्काले खेल पूर्वाधार नहुँदा गाउँपालिकामा स्तरीय खेलाडी उत्पादन गर्न नसकिएकाले खेल मैदान निर्माण गरिएको बताइन् । गत वर्ष खेलमैदान नहुँदा गाउँपालिका कार्यालय नजिकैको खुला चौरमा पालिकास्तरीय खेलकुद प्रतियोगिता सञ्चालन गरिएको उनको भनाइ छ । पर्याप्त बजेट नहुँदा खेल पूर्वाधार विकासमा काम गर्न नसकिएको उनको गुनासो छ ।

प्रकाशित : भाद्र १४, २०७६ १०:१९
पूरा पढ्नुहोस्
प्रतिक्रिया
पठाउनुहोस्