१२५ घण्टा पढाइ

कान्तिपुर संवाददाता

बझाङ — लगातार १२५ घण्टासम्म पढेर विश्व कीर्तिमान बनाउन यहाँका एक युवा तयारीमा जुटेका छन् । जयपृथ्वी नगरपालिकाको जोशीगाउँका २१ वर्षीय मुकेश जोशी यस्तो तयारीमा जुटेका हुन् ।

लोकसेवा आयोगको परीक्षा तयारीका क्रममा १२० घण्टासम्म लगातार पढेका उनले ६ वर्षदेखि यो कीर्तिमान बनाउने तयारी गरिरहेको बताए । यसका लागि गिनिज बुक अफ वर्ल्ड रेकर्डसले उनको आवेदन स्वीकार गरिसकेको छ ।

उनी यतिबेला त्यसका लागि लाग्ने खर्च जुटाउने अभियानमा छन् । विपन्न परिवारका जोशीको घरको अवस्था नाजुक छ । उनी जन्मनुअघि नै पिताले मानसिक सन्तुलन गुमाएपछि आमाले दुःख गरेर हुर्काएकी हुन् । उनको विलक्षण प्रतिभा देखेर जिल्लाका विभिन्न व्यक्ति तथा संस्थाले सहयोग जुटाउन अभियानै सुरु गर्न लागेका छन् ।

बझाङको सामुदायिक विद्यालयबाट १२ कक्षा पास गरेका उनी काठमाडौको एउटा होटलमा वेटरको काम गरिरहेका थिए । सहयोगीहरूले विश्व रेकर्ड कायम गर्न हौस्याएपछि उनी गर्दै रहेको काम छाडेर यसैको तयारीमा जुटेका हुन् । यही भदौ २३ मा उनको क्षमता परीक्षणका लागि गिनिज बुक अफ द वर्ल्ड रेकर्डसको टोली काठमाडौं आउने भएको छ ।

यो रेकर्ड कायम गर्न उनले गिनिज बुकको टोलीको यातायात र आवास खर्च व्योहोर्नुपर्नेछ । साथै भिडियो रेकर्ड र समय व्यवस्थापनलगायत शीर्षकमा ३० लाखभन्दा बढी खर्च लाग्ने अनुमान छ । ‘नाइजेरियनको रेकर्ड ब्रेक मैले यसअघि नै अनौपचारिक रुपमा गरिसकेको छु,’ मुकेशले भने, ‘खर्चको व्यवस्था भयो भने मैले नयाँ रेकर्ड कायम गर्नेमा कुनै शंका छैन । यत्रो खर्च जुटाउन सक्छु /सक्दिनँ भन्ने चिन्ता छ ।’

यो रेकर्ड कायम गर्न सके लामो समयसम्म लगातार पढ्न सकिन्छ भन्ने सन्देश युवाहरूमा जाने र यसले पढाइप्रति युवाको लगन बढाउने विश्वास लिएको उनले बताए । यसअघि लगातार सबैभन्दा बढी पढ्ने विश्व किर्तिमान एकजना नाइजेरियनको नाममा छ । उनले लगातार १२० घण्टा १५ मिनेट पढेर गिनिज बुकमा नाम लेखाएका छन् ।

प्रकाशित : भाद्र ९, २०७६ ०९:४४
प्रतिक्रिया
पठाउनुहोस्

वर्ष नबित्दै एकै परिवारका ९ जनाको निधन

रमेशचन्द्र अधिकारी

धनकुटा — कुनै दैवी विपत्ति वा दुर्घटनाबिना छोटो अवधिमा एकै परिवारका धेरैको निधन हुनुलाई अनौठो संयोग मान्न सकिन्छ । यहाँका एकै परिवारले वर्ष दिन नबित्दै परिवारका नौ सदस्य गुमाउनुपरेको छ ।

परिवारका नौ जना गुमाएका धनकुटा चौबीसेका शोकाकुल बराल परिवारका सदस्य । तस्बिर : कान्तिपुर


चौबीसे गाउँपालिकाका बराल परिवारले एक वर्ष नपुग्दै नौ जना आफन्त गुमाएका छन् । एकपछि अर्को गर्दै परिवारका सदस्यको निधन भएपछि उक्त परिवारलाई न त कुनै चाडपर्वले छोएको छ, न कुनै खुसियालीको अवसरमा रमाउन पाएको छ ।

स्थानीय रेवतीप्रसाद, चिरञ्जीवी र लीलानाथ सहोदर दाजुभाइ हुन् । ७० वर्षका साइँला रेवतीको निधन भएको ६ महिना नपुग्दै ७४ का माहिला चिरञ्जीवी र दुई महिनापहिले ६४ वर्षका अन्तरे लीलानाथको निधन भयो । सबैको एकै प्रकारको स्वास्थ्य समस्या रहेको परिवारजनले जनाएको छ । अधिकांश श्वासप्रश्वासबाट ग्रसित रहेको परिवारका सदस्य घनश्याम बरालले बताए ।
दुई महिनाअघि ५९ वर्षकी बुहारी यमुनादेवी र ६० वर्षीया गायत्राको पनि कालगतिले निधन भयो । गत साउन महिनामा मात्र बालकदेखि ज्येष्ठ सदस्यसमेतले ज्यान गुमाएका छन् ।

उक्त महिना सोही परिवारका ३ जनाको लगातार निधन भयो । निधन हुनेमा १३ वर्षका सुदीप, ८२ का खेमप्रसाद र ७० की
सेतीकुमारी छन् । सुदीपको ब्लड क्यान्सरले ज्यान गएको छ भने अन्यको श्वासप्रश्वासको समस्याले निधन भएको जनाइएको छ । तीन महिनाअघि ज्वाइँ नारायणप्रसाद पोख्रेलको पनि निधन भएपछि परिवारले शोकैशोकमा दिन बिताउनुपरेको घनश्याम बताउँछन् । ‘हामी त यो शृंखलाले मर्माहत भएका छौं,’ उनले भने, ‘कहिल्यै यस्तो नियति भोग्नुपरेको थिएन ।’ पत्नी गुमाएका ६५ वर्षीय खड्गप्रसाद पनि यो उमेर आइपुग्दासम्म यस्तो सामना कहिल्यै गर्नु नपरेको बताउँछन् ।

कल्पनाभन्दा बाहिरको घटनाले दिनरात पिरोलिरहेको उनको भनाइ छ । निधन हुने सबै एकै दाजुभाइका सन्तान तथा कुटुम्ब भएको खड्गप्रसादले बताए ।

ठूलो भूकम्प र कैयौं लामो सवारी यात्रामा पनि उक्त परिवारले यसरी सदस्य गुमाएका थिएनन् । तर कालगतिले एकपछि अर्को सदस्य गर्दै नौ जना गुमाउनुपर्दा अधिकांश परिवार चिन्तित रहेको धनेश बरालले बताए ।

उनले चार दाजुभाइमध्ये दुई दाजु र एक भाइलाई यसै वर्ष गुमाएका छन् । ‘हामी चार जनामध्ये वर्ष दिन नबित्दै तीन जनालाई गुमाउन पुगेका छौं,’ उनले भने, ‘जस्तो अवस्थामा पनि धैर्यगर्नैपर्ने रहेछ ।’ यो परिवारको पुर्ख्यौली थलो कुरुलेतेनुपा भए पनि हाल मोरङ, झापा, धनकुटामा बसोबास गर्दै आएकोठाकुर बरालले जानकारी दिए । उनले भने, ‘वर्ष नबित्दै नौ जना गुमाउँदा अत्यास नै लागिसकेको छ ।’

प्रकाशित : भाद्र ९, २०७६ ०९:४३
पूरा पढ्नुहोस्
प्रतिक्रिया
पठाउनुहोस्