समयमै बनेन थालीगाड सबस्टेसन

‘केही बाहिरी संरचना निर्माणबाहेक अन्य काम सकिएको छ, सबस्टेसन चार्ज गर्न मात्र बाँकी हो, यसका संरचना निर्माण गरेरै २ महिनाअघि ११ केभी प्रसारण लाइन चार्ज गरिएको थियो’
मनोज बडू

दार्चुला — थालीगाड सबस्टेसनको निर्माण अझै पूरा भएको छैन । चमेलियामा उत्पादित विद्युत् दार्चुलाका विभिन्न ठाउँमा वितरण गर्न सबस्टेसन निर्माण सुरु भएको हो । काममा ढिला हुँदा चमेलियामा उत्पादन भएको विद्युत् स्थानीय उपभोग गर्नबाट वञ्चित छन् ।

चमेलियाको विद्युत् दार्चुलामा वितरण गर्न महाकाली नगरपालिकाको थालीगाडमा निर्माण भइरहेको सबस्टेसन ।तस्बिर : मनोज/कान्तिपुर

२०७३ मा इनर्जी प्याक इन्जिनियरिङ नरेन्द्र निर्माण जेभीसित १ वर्षभित्र निर्माण सक्ने गरी सम्झौता भएको थियो । झन्डै ७ करोडमा निर्माण भइरहेको थालीगाड सबस्टेसन समयमै पूरा नहुँदा जिल्लावासीले अहिले पनि भारतीय बिजुली उपभोग गरिरहेका छन् ।
सबस्टेसनमा सिभिल, हाइड्रो मेकानिकल, इलेक्ट्रेनिकल लगायतको काम सकिएर वाइरिङ र स्टेसनमा रङ लगाउने काम भइरहेको प्राधिकरण क्षेत्रीय कार्यालय अत्तरियाले जनाएको छ । सबस्टेसनको हालसम्म कन्ट्रोल हाउस र ट्रान्सफर्मर स्विचलगायतका उपकरण राख्ने संरचना निर्माण भइसकेको क्षेत्रीय कार्यालयका इन्जिनियर चिजबहादुर गुरुङले बताए । ‘केही बाहिरी संरचना निर्माणबाहेक अन्य सबस्टेसनको काम सकिसकेको छ,’ उनले भने, सबस्टेसन चार्ज गर्न मात्र बाँकी हो । सबस्टेसनका संरचना निर्माण गरेरै २ महिनाअघि ११ केभी प्रसारण लाइन चार्ज गरिएको हो ।’

क्षेत्रीय कार्यालयले नै निर्माण गरिरहेको २५ किमि गोकुलेश्वर थालीगाड ३३ केभी प्रसारण लाइन निर्माणमा सकिएर शैल्यशिखर र महाकाली नगरपालिकाको सीमा क्षेत्र बडमुडे क्षेत्रमा ठूला रूख ढलेर लाइन निर्माण समस्या देखिएको उनको भनाइ छ । बीच जंगलमा ठूलो रूख ढल्दा गोकुलेश्वर थालिगाड प्रसारण लाइनमा ३ पोल ढलेका छन् ।

प्रसारण लाइन निर्माण कम्पनी र दार्चुला वितरण केन्द्रका कर्मचारीहरू अहिले बडमुडे जंगलको प्रसारण लाइन निर्माणमा खटिएको ५/७ दिन भएको दार्चुला वितरण केन्द्रका निमित्त प्रमुख मीनराज पन्तले बताए । प्राधिकरणलाई उक्त प्रसारण लाइन हस्तान्तरण नभए पनि आफूले चाँडै ३३ केभी प्रसारण लाइन चार्ज गरेर चमेलियाको उत्पादनमा जोड्ने उनको भनाइ छ ।

गोकुलेश्वर थालीगाड २५ किमि ३३ केभी प्रसारण लाइन तारुपारे खानी जेभीले निर्माण गरिरहेको छ । ३३ केभीको प्रसारण लाइनमुनिबाट ११ केभी प्रसारण तानिएको हुनाले जेठको सुरुमा राष्ट्रिय प्रसारणबाट सदरमुकाममा बिजुली बलेको वितरण केन्द्रले जनाएको छ । बडमुडे जंगलमा ३३ केभीको प्रसारण लाइन बिग्रेपछि २ साता नेपाली बिजुली उपभोग गर्न नपाउँदै फेरी
भारतीय नै बाल्न बाध्य भएको महाकाली नगरपालिका ९, दत्तुका रमेश डागाले बताए । प्रसारण लाइन र थालीगाड सबस्टेसन निर्माण सम्पन्न नहुँदा दिनहुँ अनियमित हुने भएकाले भारतीय बिजुली बाल्नुपरेको उनको भनाइ छ ।

चमेलियाले उत्पादन गरेको विद्युत् गत माघबाट राष्ट्रिय प्रसारण लाइनमा जोडिएको हो । लघु जलविद्युत् आयोजनाबाट दार्चुलामा झन्डै साढे ५ सय किलोवाट उत्पादन हुन्छ । त्यसबाहेक जिल्लाका लाली, जौलजिवी र हुतीबाट भारतीय विद्युत् खरिद गरी उपभोग गर्दै आएका छन् । दार्चुलामा प्रतियुनिट भारतबाट ११.२ रुपैयाँका दरले वार्षिक झन्डै साढे २१ लाख युनिट बिजुली खरिद गरी वितरण गरिने वितरण केन्द्रले जनाएको छ ।

प्रकाशित : श्रावण २८, २०७६ ०९:५६
प्रतिक्रिया
पठाउनुहोस्

अनुदानका गाई अस्वस्थ र बुढा

मोहन शाही

डोटी — नगरपालिकाले पूर्ण अनुदानमा वितरण गरिएका दूधालु गाई बुढा र रोगी भएको भन्दै किसानहरूले गुनासो गरेका छन् । साउनको पहिलो साता दिपायल सिलगढी नगरपालिकाले वडा ७ का तेडी नभाउने गाईपालन समूहका ७ कृषकलाई जर्सी गाई वितरण गरेको हो । तर गाईहरू बिरामी पर्न थालेको, बुढो भएकाले दूध नदिने गरेको किसानहरूले गुनासो गरेका छन् ।

दिपायल सिलगढी नगरपालिकाले पूर्ण अनुदानमा धौली देवी रावललाई दिएको रोगी गाई ।तस्बिर : मोहन/कान्तिपुर

‘एउटै गाईले दैनिक १५/२० लिटर दूध दिन्छ भन्ने सुनेका थियौ,’ स्थानीय किसान डिलबहादुर कठायतले भने, ‘एउटा गाई पनि ढंगको आएन । बुढा र रोगी ती गाई पालेर आम्दानीको साटो उल्टै खर्च बढेको छ ।’ प्रति गाई ७५ हजार मूल्यमा पाएपछि खुसी भएका किसान बुढा र रोगी भएको भन्दै आक्रोश व्यक्त गरिरहेका छन् । गाई पाउने भएपछि किसानहरूले ७ गाईको दूध एकमुष्ट धेरै दूध हुनेभएपछि बिक्रीका लागि एउटा डेरीसँग सहमति गरेका थिए ।

गाईबाट मनग्गे मात्रामा दूध उत्पादन गरेर सहज जीविकोपार्जनको सपना देखेका किसानहरू यतिबेला उल्टै निरास बनेका छन् । ‘जीवन चलाउन हम्मेहम्मे परेका बेला नगरले गाई दियो, यसैबाट परिवार पालौला भनेर खुसी भएकी थिएँ,’ स्थानीय धनादेवी कठायतले भनिन्, ‘तर खुसी आउन सकेन ।’

गाई हस्तान्तरण गर्न नगरपालिकाको पशु सेवा एकाइका प्रमुख डिलबहादुर साउँद र नगरप्रमुख मञ्जु मलासी किसानकै घर पुगेका थिए । साउन ८ गते आएर ७ गाई चिठ्ठा हालेर हस्तान्तरण गरी हिँडेको किसानहरूको भनाइ छ । किसानहरूले उल्टै रोगी गाईको स्याहार गर्नुपर्ने फसादमा परेको दुखेसो गरे । ‘बुझेकै दिनदेखि गाई बिरामी छ । गाईको पाठेघर कुहिएको छ । बेलाबेला पछाडिको भागबाट किरासहितको पीप खस्छ,’ धौलीदेवी रावलले भनिन्, ‘घरै गन्हाउँछ । बाच्छो शुक्रबार मरिसक्यो ।’

गाईबाच्छो बिरामी भएको बारे नगरपालिका पशु सेवा एकाइका अधिकृत साउँदलाई खबरसमेत गरेको किसानहरूले बताए । ‘उहाँले भनेअनुसार औषधि किनेर पनि खुवाए,’ उनले भनिन्, ‘औषधिले पनि सञ्चो भएन, शुक्रबार मर्‍यो ।’ अधिकांश गाईहरू बिरामी रहेको गुनासो उनीहरूको छ ।

किसानलाई हस्तान्तरण गरिएका गाई मरेमा नगरपालिकाले दिने सेवाका लागि अयोग्य हुने सम्झौता भएकाले किसानहरू चिन्तामा छन् । ‘रोगी र बुढा गाई दिने र यस्तो शर्तमा दस्तखत गरी नगरपालिकाले फसाएको छ,’ धनादेवी भन्छिन्, ‘आफैं रोगी र बुढा गाई हस्तान्तरण गरी दिएकाले मेरो गाई त मर्न लाग्यो । उल्टै म अब सेवा सुविधाबाट वञ्चित हुनुपर्ने अवस्था आयो ।’

नगरपालिकाले टेन्डर गरेर प्रतिगाई ७५ हजारका दरले नगर क्षेत्रका २० किसानलाई हस्तान्तरण गरेको हो । १५ लाख लगानीमा कञ्चनपुर बेलौरीको सिद्धबाबा गाईभैंसी पालन फार्मबाट ती गाईहरू नगरपालिकाले खरिद गरेको पशु एकाइ प्रमुख साउँदले जानकारी दिए । उनले भने, ‘हामीले २ देखि ३ सय ५० केजी र २ बेत बसेको भनेर ठेकेदारसँग सम्झौता गरेका थियौ । सोहीअनुसारका छन् ।’ अधिकृत साउँदले किसानहरूको स्याहारसुसार र गोठ ब्यबस्थापन नमिलेकोले गाईहरू बिरामी परेको र दूध नदिने समस्या भएको दाबी गरे ।

प्रकाशित : श्रावण २८, २०७६ ०९:५४
पूरा पढ्नुहोस्
प्रतिक्रिया
पठाउनुहोस्