गर्मी बढेसँगै अस्पतालमा बिरामीको चाप

 ४ वर्षअघि नै ५१ शय्यामा स्तरोन्नति गरिए पनि जनशक्ति अभावले बिरामीले सहज उपचार पाउन सकेनन्
गणेश चौधरी

टीकापुर — टीकापुर अस्पतालमा बिरामीको चाप बढेको छ । गर्मी बढेसँंगै बिरामीको चाप बढेको अस्पतालले जनाएको हो । अस्पतालमा बिरामी पुर्जाका लागि एउटा मात्र टिकट काउन्टर हुँदा बिरामीले नाम दर्तामै सास्ती भोग्नुपरेको छ ।

नाम दर्ताका लागि ३ घण्टासम्म लाइन बस्नुपर्ने बाध्यता छ । पुर्जा लिन लाइनमा बसेका विजय रावलले भने, ‘डाक्टर भेट्नु त कता–कता टिकट काट्नै नसकिने अवस्था छ ।’ दैनिक ५ सय सम्म सेवाग्राही आउने र एउटै काउन्टरबाट बिरामी पुर्जा दिन निकै ढिला हुने गरेको छ । कर्मचारी अभावमा एउटै ठाउँबाट टिकट दिने गरिएको अस्पतालको भनाइ छ ।

दरबन्दी अनुसारका डाक्टर नहुँदा सेवाग्राहीले सेवा पाउन पनि सकेका छैनन् । ४ वर्षअघि नै ५१ शय्यामा स्तरोन्नति गरिए पनि जनशक्ति अभावले सेवाग्राहीले सेवा पाउन सकेका छैनन् । ६ विशेषज्ञसहित १४ डाक्टरको दरबन्दी भए पनि उपलब्ध छैनन् । दरबन्दीअनुसार बालरोग, स्त्रीरोग, हाडजोर्नी, साइकियाट्रिक, फिजिसियनलगायत विशेषज्ञ डाक्टरको व्यवस्थाका लागि पटक–पटक मन्त्रालयमा अनुरोध गरे पनि व्यवस्था नगरिएको अस्पताल प्रशासनले जनाएको छ ।

शय्या थप भए पनि विशेषज्ञ डाक्टर अभावका कारण यहाँका बिरामी नेपालगन्ज तथा भारतका विभिन्न सहरमा उपचार गराउन जानुपर्ने बाध्यता रहेको अस्पतालका सुपरिटेन्डेन्ट डा. नरेन्द्रकुमार खनालले बताए । ‘अस्पतालमा प्रसूति, ओपिडी, आकस्मिक सेवा र वार्ड तथा शल्यक्रियाका लागि छुट्टाछुट्टै भवन बनेको छ,’ डा. खनालले भने, ‘दरबन्दीअनुसार डाक्टर भए धेरै सेवा दिन सकिन्छ ।’

प्रशस्त पूर्वाधार हुँदाहुँदै पनि विशेषज्ञ डाक्टर अभावमा रेफर गर्नुपर्ने बाध्यता रहेको उनको भनाइ छ । दैनिक सयौं बिरामी उपचारका लागि आउने यो अस्पतालमा जनशक्ति अभावमा अप्ठ्यारो भइरहेको डा. खनालले बताए ।

प्रकाशित : श्रावण २३, २०७६ ०८:५६
प्रतिक्रिया
पठाउनुहोस्

बस्तीमा पहिरो, १३ परिवार विस्थापित

मनोज बडू, संगीता तिमिल्सेना 

दार्चुला र बाजुरा — अविरल वर्षाले महाकाली नगरपालिका २, बडाली गाउँमा बस्तीमुनिबाट पहिरो खस्दा १३ परिवार विस्थापित भएका छन् । मुनिबाट सोमबारदेखि पहिरो जान सुरु भएको माथिबाट जमिन सरिरहँदा स्थानीयले घर छाडेका हुन् ।

बडाली गाउँका मानसिंह बडाल, मोहनसिंह बडाल र गौरसिंह बडालको घर तलबाट पहिरो खस्दा उच्च जोखिममा परेको जिल्ला प्रहरी कार्यालयका निमित्त प्रमुख रवीन्द्र कठायतले जनाए । सोही ठाउँका वीरसिंह बडाल, चन्द्रसिंह बडाल, खडकसिंह बडाल र उदयसिंह बडालको घर पनि जोखिममा रहेको भन्दै छिमेकमा आश्रय लिई बसिरहेका छन् ।

बढी पानी परे पहिरो खस्ने सम्भावना बढ्ने भन्दै बडालीका ७ परिवार अर्कैको घरमा बस्न गएका छन् । प्रहरीका अनुसार महाकाली नगरपालिका २, बुढीचौराका वीरादत्त बडुको खेत पहिरोले बगाएको छ । विभिन्न स्थानमा बाढी–पहिरोले जमिन बगाएको छ । केही बस्तीमा जोखिम बढेको छ ।

त्यस्तै महाकाली नगरपालिका १, मलेराका लालसिंह कार्कीको घरअघि पहिरो आएको छ । उनीहरू पनि छिमेकमा बसाइ सरेका छन् । लास्कु खोलाले घर कटान गर्न थालेपछि देवकी धामी पनि विस्थापित भएको जिल्ला प्रहरी कार्यालयका प्रवक्ता प्रेम खडकाले बताए । उनका अनुसार अपीहिमाल गाउँपालिका १, अर्कालेकका हरसिंह धामीको कच्ची घरमा पहिरोले क्षति पुर्‍याएको छ । संँगै रहेको अर्को घर पहिरोको उच्च जोखिममा परेपछि उनको परिवार आफन्तकोमा सरेका छन् ।

जिल्ला प्रहरीका अनुसार मानवीय बस्तीभन्दा तल पहिरो खसेको र अझै नरोकिएकाले बडाली गाउँका १३ घरधुरी उच्च जोखिममा छन् । पहिरोको जोखिममा परेका १३ घरबाट सामानहरू अन्तै सारेको छ । वर्षा आउने क्रम नरोकिएको र जुनसुकै बेला पहिरो खस्ने सम्भावना बढेकाले सर्वसाधारण पनि त्रसित छन् ।

पहिरोले घरहरू जोखिममा परेको खबर प्राप्त भएपछि सेनासँगै सशस्त्र प्रहरीका डीएसपी डम्बरबहादुर विष्टको नेतृत्वको २५ जनाको टोली र दार्चुलाका प्रहरी निरीक्षक रवीन्द्र कठायतको टोली उद्धारका लागि खटिएको थियो ।

वर्षा भए रातभर जाग्राम
जथाभावी डोजर चलाएर बनाइएका ग्रामीण सडकका कारण बाजुराका अधिकांश दलित बस्ती पहिरोको उच्च जोखिममा परेका छन् । वर्षा सुरु हुनेबित्तिकै पहिरो आउने डरले जोखिम बस्तीका बासिन्दाले बालबच्चा काखमा च्यापेर रातभर जाग्राम बस्नुपर्ने बाध्यता छ ।

बुढीनन्दा नगरपालिका ७, सेरकाटियाँको दलितबस्ती पनि पहिरोको जोखिममा परेको स्थानीय लालबहादुर विक बताउँछन् । ‘माथि बस्ती छ, तलबाट डोजर चलाएर सडक काटिएको छ,’ उनले भने । ठूलो वर्षा भएका दिन गाउँलेहरू रातभर जाग्राम बस्ने गरेको स्थानीय जयबहादुर विक बताउँछन् । मार्तडी–कोल्टी सडकमा ४५ परिवारको बसोबास छ ।

बुढीनन्दा नगरपालिका प्रमुख पदमकुमार गिरीले १ देखि १० वटै वडामा रहेका प्रत्येक बस्तीमा सडक सञ्जालमा जोडिएसँगै पहिरोको जोखिममा परेको बताए । सोही नगरपालिकाको पीपलडालीमा रहेका हलिया दलित बस्ती पनि दशकौंदेखि पहिरोको उच्च जोखिममा छ । तत्कालीन प्रधानमन्त्री बाबुराम भट्टराईले हलिया बस्तीमै आएर स्थलगत अनुगमन गरेका थिए ।

त्यतिबेला उनले बस्ती स्थानान्तरण गर्ने र राहत उपलब्ध गराउन आश्वासन दिए पनि सरकारबाट अहिलेसम्म कुनै राहत नपाएको स्थानीयको गुनासो छ । गत साता गौमुल गाउँपालिका ६, टाडाकोटमा पहिरोमा परि एक दलित परिवारकै आमाछोरीले ज्यान गुमाएका छन् । १८ परिवारको बसोबास रहेको टाडाकोटको पुरै बस्ती अहिले पनि पहिरोको जोखिममा छ । अत्यधिक जोखिम भए पनि सुरक्षित ठाउँमा बसाइ सर्न आफूहरूको वैकल्पिक जमिन नभएको स्थानीय सिरे चदाँरा बताउँछन् ।

प्रकाशित : श्रावण २३, २०७६ ०८:५५
पूरा पढ्नुहोस्
प्रतिक्रिया
पठाउनुहोस्