जोरायलमा एफएम सुरु नहुँदा विवाद

मोहन शाही

(डोटी) — एम्बुलेन्स सञ्चालन, फिल्म निर्मातालाई रकम र एमएम सञ्चालनको विषयमा जोरायल गाउँपालिकामा विवाद भएको छ । एफएम सञ्चालनका लागि गाउँपालिकाले गत वर्ष दिएको बजेटको दुरुपयोग भएको भन्दै अलोचना सुरु भएपछि जनप्रतिनिधि प्रतिवादमा उत्रेका छन् । 

सामुदायिक रेडियो घण्टेश्वर एफएम सञ्चालन गर्न गाउँपालिकाले गत वर्षको असारमै ११ लाख दिएको थियो । सम्बद्ध पक्षले भुक्तानी लिएर पनि हालसम्म सञ्चालनमा नल्याउँदा रकम दुरुपयोग भएको भन्दै विवाद भएको हो । गाउँसभाको बैठकले निर्णय गरेअनुसार रेडियो सञ्चालन गर्न आवश्यक सामग्रीहरू खरिद गर्न भुक्तानी दिइएको गाउँपालिका अध्यक्ष दुर्गा ओझाले बताए । ‘सञ्चारमाध्यमको प्रवर्द्धन र विकासका लागि सहयोग गर्नु गल्ती हो भने मेरो भन्नु केही छैन,’ उनले भने, ‘सुरुमा पत्रकार शंकर थापाले सञ्चालनका लागि २५ लाख बराबरको प्रस्ताव ल्याउनु भएको थियो । हामीले आवश्यक सामग्री खरिदका लागि ११ लाखसम्म दिनसक्ने सर्तसहित सम्झौतासहित भुक्तानी दिएका हौं ।’

प्रमुख प्रशासकीय अधिकृत समीर भण्डारीले सामाग्री खरिद गरेर ल्याइसकेकाले आफूले भुक्तानी दिएको दाबी गरे । ‘प्रक्रियागत रूपमा बजेट विनियोजन भएको छ । त्यहीअनुसार सम्झौता पनि गरिएको छ,’ उनले भने, ‘उहाँले सामग्री खरिद गरेका यथार्थर् बिल भर्पाइ ल्याएपछि भुक्तानी दिइएको हो । सञ्चालन किन भएन भन्ने कुरा मलाई थाहा भएन ।’

एफएमका अध्यक्ष शंकर थापा व्यक्तिगत रिसिइबीका कारण आफूलाई बद्नाम गर्ने प्रयत्न भएको बताउँछन् । गाउँपालिकाबाट प्राप्त रकमले टावर र ट्रान्सफर्मरलगायतका सामग्री खरिद भइसकेको दाबी उनले गरे ।

‘गाउँपालिकाले दिएको रकम बराबरको सामान ल्याएको छैन भने मैले दुरुपयोग गरेको मान्न सकिन्छ । त्यो हेर्दै नहेरी मेरो चरित्रहत्या गर्ने काम भएको छ,’ उनले भने, ‘सामुदायिक रेडियो भएकाले सञ्चालनको रकम र प्राविधिक व्यवस्थापन अप्ठ्यारो भएर सञ्चालनमा आउन ढिलाइ भएको हो । दुरुपयोग भएको छैन ।’ टावर जडान कार्य केही दिनमा सुरु भई आगामी दसैंअघि नै एफएम सञ्चालन गर्ने योजना रहेको उनले बताए ।

स्थानीय स्तरमा भने एफएम सञ्चालनका नाममा विभिन्न ठाउँबाट बजेट संकलन गरेर रकम अपचलन गरिएको आरोप छ । ‘खरिदका लागि पेस भएका सबै बिल भर्पाइको अनुसन्धान गरिरहेका छौं,’ जोरायल गड्सेराका कांग्रेस नेता सोपान बोहराले भने, ‘पर्याप्त स्रोत र तयारीबिना गाउँपालिकाको बजेट लगेर एक बर्षसम्म कसैले थन्काउन मिल्छ ?’ दिपायलमा निर्माण नै हुन नसक्ने एफएमका टावर केबी स्टिल तथा फर्निचरबाट बनाएको भनेर फर्जी बिल पेस गरिएको उनको आरोप पनि छ । साथै टावर ढुवानी गरेको भन्दै गलत भपाई बनाइएको बोहराको दाबी छ । दिपायलमा टावर बन्नै नसक्ने दाबी गर्दै उनले पुरानो टावर अन्तबाट उठाएर ल्याएको जिकिर गरे ।

प्रकाशित : असार २२, २०७६ १२:५२
प्रतिक्रिया
पठाउनुहोस्

कोल्टी काकाकुल

कान्तिपुर संवाददाता

बाजुरा — बिहान होस् या बेलुका, सबैको झर्को एकनास छ । बाजुराको पूर्वोत्तर क्षेत्रको मुख्य बजार कोल्टीमा पानीको हाहाकार नयाँ समस्या होइन । 

संघीयता कार्यान्वयनसँगै कोल्टी बुढीनन्दा नगरपालिकामा गाभिएको छ । नगरका २, ३ र ४ नम्बर वडा बनेको कोल्टीमा बाजुरा विमानस्थल छ । ६ हजार २ सय ६४ जनसंख्या रहेको कोल्टीलाई खानेपानी पर्याप्त हुने योजना छनोटमा जनप्रतिनिधिहरूको अग्रसरता नदेखिएको बुढीनन्दा–२ का जन्म रेग्मीले बताए । ‘पुरानो बजार हो, जिल्लाको व्यापारिक गतिविधि यहीँछ, सरकारी कार्यालय यहीँ छन्,’ उनले भने, ‘खानेपानी आधारभूत आवश्यकता हो । जनजीवन पुरै खानेपानीका कारण प्रभावित छ ।’

पूर्वोत्तर क्षेत्रकै मुख्य व्यापारिक केन्द्रमा खानेपानीको चरम अभाव हुँदा स्थानीयलाई त अप्ठ्यारो छँदैछ, होटल व्यवसायीलाई झन सास्ती छ । ‘बिहानै उठेर पानी लिन एक घण्टाको पैदल बडीगाड खोलामा पुग्नुपर्छ,’ कोल्टीमा होटल सञ्चालन गर्दै आएकी बुढीनन्दा–६ की शीला शाहीले भनिन्, ‘खानेपानीको सुविधा भए कोल्टीले जुनी फेर्ने थियो ।’ बजार क्षेत्रका बालबालिका र गाउँबाट बजारमा पढ्नका लागि कोठा लिएर बसेकाहरूको धेरै समय पानी बोक्नमै गुज्रिने गरेको उनले बताइन् । ‘हामी हाम्रो भविष्य बनाउनको लागि घरमा आमाबुवालाई ऋण माग्न लगाएर पढ्नका लागि आउँछौं,’ जगन्नाथबाट कोल्टीमा डेरा गरेर पढ्दै आएकी विन्पुरा सिंहले भनिन्, ‘यहाँ त पानी बोक्नै ठिक्क छ । कतिबेला पढ्नु, कतिबेला अरू काम गर्नु ।’

बजार क्षेत्रमा खानेपानीका पुराना धारा छन् । कहिलेकाहीमात्रै पानी झर्छ । नगरपालिकाकै कालगोठीबाट सानो ट्यांकी बनाएर भीरमा पाइप चढाएर ल्याइएको पानी नियमित नआउने कोल्टी–२ का स्थानीय प्रदीप जैसीले बताए । ‘खानेपानीको चरम अभाव पुरानै समस्या हो,’ उनले भने, ‘सबैले देखे भोगेको समस्यामा सरकारले ध्यान दिएन ।’

यता नगरपालिकाका जनप्रतिनिधि भने खानेपानी योजना ल्याउन ध्यान दिएपनि सहज नभएको दाबी गर्दै आएका छन् । निर्माणका लागि तत्काल नजिकै मुहान नभएकाले विकल्प निकाल्न नसकेको उनीहरूको भनाइ छ । ‘हामीले समस्या समाधानकै लागि बजेट विनियोजन गरेर सिराडीको पानी बड्डाल हुँदै कोल्टीमा ल्याउने योजना बनाएका छौं,’ नगरकी उपप्रमुख सृष्टि रेग्मीले भनिन्, ‘हामी पनि उत्तिकै चिन्तित छौं । सजिलो विकल्पमा काम गर्ने योजना पनि छ ।’

प्रकाशित : असार २२, २०७६ १२:५१
पूरा पढ्नुहोस्
प्रतिक्रिया
पठाउनुहोस्