वडा कार्यालयको काम होटलबाट

मोहन शाही

डोटी — बडीकेदार गाउँपालिका ४, मान्नाकापडीका गणेश बोहोरालाई विवाह दर्ता गर्नुपर्ने भयो । बोहोरा दम्पती विवाह दर्ताका लागि दुइत्यारमा रहेको शेरबहादुर बोहोराको होटलमा गए । होटलमा उनीजस्तै दर्ता, सिफारिसलगायत विभिन्न सेवा लिन आएकाको घुइँचो थियो । पालो कुरेरै भए पनि दर्ता प्रमाणपत्र लिएर बोहोरा घर फर्किए ।

चिया पसलमा काम गर्दै बडीकेदार गाउँपालिका–४ का जनप्रतिनिधि र कर्मचारी ।तस्बिर : मोहन/कान्तिपुर

होटल सामान्यतः चिया, खाजा, खाना पाइने स्थान हो तर मान्नकापडीमा यतिबेला सिफारिस लिन वडा कार्यालय नगएर होटलमा जानुपर्ने अवस्था छ । ‘मान्नकापडीमा अहिले सेवा लिन पनि होटलमै आउनुपर्ने अवस्था छ,’ स्थानीय रमेश मौनीले भने, ‘बडीकेदार गाउँपालिका ४ स्थित दुइत्यार गाउँका शेरबहादुर बोहोराको होटल कार्यालय जस्तो भएको छ ।’ तर होटलबाटै कार्यालय सञ्चालन गर्नु कर्मचारी र त्यहाँका जनप्रतिनिधिको रहर नभई बाध्यता हो ।

वैशाख २३ मा अज्ञात समूहले वडा कार्यालयमा आगजनी गरेपछि जनप्रतिनिधिहरू होटलबाट सेवा दिन बाध्य भएका हुन् । कार्यालयका महत्त्वपूर्ण कागजातसहित सम्पूर्ण सामग्री जलेर नष्ट भएपछि सर्वपक्षीय भेलाले तत्कालका लागि बोहोराको चिया पसलबाट सेवा सुचारु गर्ने निर्णय गरेको थियो ।

‘वडा कार्यालय आगजनीबाट ध्वस्त भएपछि सेवा दिन गाह्रो भयो, पछि सबैको सल्लाहअनुसार होटलबाटै सेवा दिँदा फरक नपर्ने सल्लाह भएको हो,’ वडाध्यक्ष वीरेन्द्र कोटकेनीले भने, ‘सेवाप्रवाह गर्न अन्यत्र सार्वजनिक तथा सरकारी कार्यालय नभएकाले तत्कालका लागि त्यो व्यवस्था गरेका हौं ।’ ‘वडा कार्यालय बस्तीभन्दा केही नजिक, एकान्त ठाउँमा थियो,’ स्थानीय चक्र बोहोराले भने, ‘दुइत्यारमा रहेको होटल सबैलाई पायक पर्ने ठाउँ पनि छ ।’

वडा कार्यालयले आफ्ना महत्त्वपूर्ण कागजात लेटरप्याड, छाप, रसिदलगायत सामग्री नजिकै रहेको सामुदायिक अध्ययन केन्द्रको कार्यालयमा राख्ने गरेको वडाध्यक्ष कोटकेनीले बताए । उनले एउटै कोठा भएकाले अध्ययन केन्द्रमा साँझ सामान राखेर बिहान झिक्ने गरेको बताए ।

होटलका अगाडि राखिएका बेन्चमध्ये एउटामा वडाध्यक्ष, वडासचिव र कर्मचारी बस्ने गर्छन् । खाली ठाउँ भए सेवाग्राही पनि बेन्चमा बस्छन् । सेवाग्राही चौरमा । सानो छाप्रामा रहेको होटलले अघिल्तिर जस्तापाताले छाएर ग्राहकलाई बस्ने ठाउँ बनाएको छ । त्यसैको एकछेउमा चिया–खाजा पकाउने गरेको छ ।

कार्यालयको आफ्नै जमिन भए पनि भवन नभएको वडाध्यक्ष कोटकेनीले बताए । उनले यसै आर्थिक वर्षभित्र भवन निर्माणका लागि गाउँपालिकाले टेन्डर गर्न लागेको जानकारी दिए ।

प्रकाशित : जेष्ठ २३, २०७६ ०९:०८
ADVERTISEMENT
प्रतिक्रिया
पठाउनुहोस्
ADVERTISEMENT

दर्ताबिनै औषधि पसल

झलारीमा अनुगमन
कान्तिपुर संवाददाता

कञ्चनपुर — औषधि व्यवस्था विभाग नेपालगन्जले मंगलबार गरेको अनुगमनका क्रममा कञ्चनपुरको शुक्लाफाँटा नगरपालिकाको झलारी क्षेत्रका मेडिकल दर्ताबिना सञ्चालन भइरहेका भेटिएका छन् । कतिपयले दर्ता बिनाका औषधिसमेत बिक्री गरिरहेको पाइएको छ । 

विभागका फार्मेसी अधिकृत विजय कार्की नेतृत्वको टोलीले गरेको अनुगमनका क्रममा एउटा मेडिकल र एउटा एग्रोभेट सिल गरिएको छ । झलारी बजारमा दर्ता नभई सञ्चालनमा रहेको अशोक क्लिनिक र कैलालीको अत्तरियामा दर्ता प्रमाणपत्र भई झलारीमा सञ्चालनमा रहेको शुभम बासुलिंग एग्रोभटलाई सिल गरिएको हो ।

‘मेडिकल र एग्रोभेटले दर्ता तथा ठाउँसारीको प्रमाणपत्रसहित विभागमा उपस्थित भई दर्ता हुन निर्देशन दिएका छौं,’ विभागका फार्मेसी अधिकृत कार्कीले भने, ‘२ वटा मेडिकल सञ्चालक भागेका छन्, अनुगमनलाई असहयोग गरेको छ ।’ उनीहरूलाई पनि विभाग र नगरपालिकामा उपस्थित हुन निर्देशन गरिएको छ । कार्कीका अनुसार झलारीमा रहेका वीर क्लिनिक र शिवशक्ति मेडिकल सञ्चालक भागेका हुन् ।

यसैगरी झलारी क्षेत्रका ३ मेडिकलले दर्ताबिनाको औषधि बिक्री गरिरहेको भेटिएको कार्कीले जानकारी दिए । उनीहरूलाई पनि विभाग र नगरपालिकाको कार्यालयमा उपस्थित हुने निर्देशन दिइएको उनले बताए । अनुगमन टोलीमा शुक्लाफाँटा नगरपालिकाका प्रतिनिधिसँगै विभागका फार्मेसी सुपरभाइजर लोकेश गिरी र यादव ढकाल थिए ।

झलारी क्षेत्रका १ एग्रोभेट र ८ औषधि पसलमा अनुगमन गरिएको हो । ‘दर्ताबिनाको औषधि सञ्चय गरी बिक्री गर्नेलाई पनि विभागमा उपस्थित हुन निर्देशन गरिएको छ,’ कार्कीले भने, ‘त्यसपछि थप कारबाहीको प्रक्रिया अगाडि बढ्छ ।’ औषधि व्यवस्था विभागले बेलाबेलामा मेडिकलको अनुगमन गर्दै आएको भए पनि अनुगमनपश्चात कानुनविपरीत गर्नेलाई कारबाही भने विरलै हुने गरेको पाइन्छ । ‘नियमित अनुगमन गरेर कारबाही प्रक्रिया अघि बढाउने तयारी छ,’ कार्कीले भने ।

प्रकाशित : जेष्ठ २३, २०७६ ०९:०७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×