बजेटका प्राथमिकता प्रस्तुत

अर्जुन शाह

धनगढी — सुदूरपश्चिम प्रदेशसभाको बैठकमा बिहीबार आर्थिक मामिला तथा योजनामन्त्री झपटबहादुर बोहराले आगामी आव ०७६/७७ को बजेटको सिद्धान्त तथा प्राथमिकता प्रस्तुत गरेका छन् ।

उनले स्वरोजगार सिर्जना, कृषिमा आत्मनिर्भर बनाउने योजनालाई पनि प्राथमिकता दिइने जनाए ।

नीति तथा प्राथमिकता समेटिएको विनियोजन विधेयक २०७६ प्रस्तुत गर्दै मन्त्री बोहराले आगामी बजेटमा यातायात, खानेपानी र विद्युतीकरणलगायत आधारभुत विकासको पहुँचलाई प्राथमिकता दिने बताइएको छ ।

उच्च शिक्षा, स्वास्थ्य, मानव विकासलगायत सूचाकंमा पछाडी परेका बाजुरा, बझाङ, दार्चुला र अछामलाई प्राथमिकतामा राख्ने मन्त्री बोहराले उल्लेख गरेका छन् । यी जिल्लाहरूमा रहेका छाउपडी प्रथा, जातीय छुवाछुतगायत सामाजिक कुरीतिहरूविरुद्ध आवश्यक अभियान सञ्चालन गरिने विधेयकको प्राथमिकतामा उल्लेख गरिएको छ ।

गरिबीको रेखामुनि रहेका नागरिकहरू तथा गरिब घरपरिवार पहिचान गरी गरिबीसँग सम्बन्धित साना तथा कार्यक्रमहरू ल्याइने निती लिइएको छ । प्रदेशको तथ्यांकलाई अद्यावधिक गरी उनीहरूलाई सामाजिक सुरक्षाको दायरामा ल्याउने प्रदेश सरकारले प्रस्तुत गरेको नीतिमा उल्लेख छ ।

यसअघि संचालित गरिबी निवारणसंग सम्बन्धित कार्याहरूको पूरक कार्यक्रमहरूसमेत आगामी वर्षको बजेटमा समेट्ने मन्त्री बोहराले बताए । प्रदेश सरकारको अधिकार क्षेत्रमा रहेका सडक संजालको आवश्यकता पहिचान गरी आवश्यक मर्मत सम्भार, नयाँ लोकमार्गहरूको निर्माण योजनामा आगामी बजेटमा समेटिने उल्लेख छ ।

वैकल्पिक ऊर्जा र लघु जलविद्यत्का कार्यक्रममार्फत ग्रामीण विधुतिकरण गर्ने नीति अवलम्बन गरिने विधेयकमा उल्लेख छ । स्वच्छ खानेपानी तथा सरसफाईको सुविधा उपलब्ध गराउने कार्यक्रम तथा योजनाहरू आगामी बजेटमा समेटिने उल्लेख गरिएको छ । प्रदेशका सबै जिल्लाको सन्‍तुलित विकास गर्ने नीति अवलम्बन गरिने सरकारको तयारी छ ।

सबै स्थानीय तहमा बैंक तथा बीमा कम्पनीको शाखा स्थापना गरी वित्तिय पहुँच तथा वित्तिय सचेतना बढाउने नीति अवलम्बन गरिने मन्त्री बोहराले प्रस्तुत गरेको विनियोजन विधेयकमा उल्ल्खे छ । विधेयकमाथि आउदो सोमबारदेखि छलफल हुने भएको छ ।

प्रकाशित : जेष्ठ ३, २०७६ १०:४९
प्रतिक्रिया
पठाउनुहोस्

प्रहरीमाथि हत्या आरोप

कान्तिपुर संवाददाता

बैतडी — पाटन नगरपालिका ६, लदेडाका ७४ वर्षीय कमलाकान्त पन्तलाई जिल्लामा कार्यरत ५ प्रहरीले कुटपिट गरी हत्या गरेको आरोप लागेको छ । 

पाटनस्थित इलाका प्रहरी कार्यालयमा कार्यरत प्रहरी सहायक निरीक्षक अशोकबहादुर पाल, प्रहरी हवलदार जनकसिंह धामी र सुकराम राना, प्रहरी जवान दानसिंह भण्डारी र भूपेन्द्र महराले पन्तको हत्या गरेको आरोप लागेको हो ।

मृतकका आफन्तले प्रहरीको कुटपिटबाट कमलाकान्तको मृत्यु भएको दाबी गरेका छन् । ५ प्रहरीविरुद्ध किटानी जाहेरी पनि जिल्ला प्रहरी कार्यालयमा परेको जिल्ला प्रहरी कार्यालयका प्रहरी नायब उपरीक्षक नेत्रमणि गिरीले बताए । उनले भने, ‘राति गस्तीका बेला प्रहरीहरूले हत्या गरेको आरोप लागेको छ । अनुसन्धान गरिरहेका छौं ।’ दोषी भेटिए कारबाही प्रक्रिया अगाडि बढाउने उनले बताए ।

कमलाकान्तका कान्छा छोरा प्रकाशकुमार पन्तले ५ प्रहरीविरुद्ध कर्तव्य ज्यान मुद्दामा उजुरी दिएका छन् । ३ दिनअघि पन्तले हँसिया प्रहार गर्दा स्थानीय शान्ता पन्त पनि घाइते भएकी थिइन् ।

प्रकाशित : जेष्ठ ३, २०७६ १०:४८
पूरा पढ्नुहोस्
प्रतिक्रिया
पठाउनुहोस्