प्रविधीमैत्री बन्दै गाउँपालिका

गाउँपालिका र वडा कार्यालयबाट विद्युतिय हाजिरी सुरु
वसन्तप्रताप सिंह

बझाङ — पिछडिएको क्षेत्रअन्र्तगत पर्ने छविसपाथिभेरा गाउँपालिकाले आफूलाई आधुनिक प्रविधिमैत्री गाउँपालिका बनाउने लक्ष्यसहित आगामी आर्थिक वर्षको कार्यक्रम तथा बजेट तय गरेको छ ।

गाउँपालिका र वडापालिकाको कार्यलयबाट विद्युतीय हाजिरी सुरु गरेको यसले आउँदो आर्थिक वर्षमा गाउँपालिकाभित्रका सबै विद्यालय र स्वास्थ्य संस्थामा विद्युतीय हाजिरी लागू गर्ने कार्यक्रम तय गरेको छ । यस्तै, विद्यालयको पढाइको गुणस्तर बढाउन सबै विद्यालयमा सीसीटीभी जडान गरेर गाउँपालिकाबाटै अनुगमन गर्ने व्यवस्था मिलाउने नीति बनाएको छ ।

गाउँपालिका उपाध्यक्ष राधिका रतालाले दोस्रो गाउँसभामा प्रस्तुत गरेको नीति कार्यक्रम तथा बजेटमा गाउँपालिका कार्यालयमा विद्युतीय हाजिर र सीसीटीभी पनि जडान गरेपछि कर्मचारीको काममा प्रभावकारिता देखिएकाले यो प्रविधिलाई सबैतिर विस्तार गर्ने उल्लेख छ । स्थानीय तहलाई आधुनिक प्रविधियुक्त बनाउन अनलाइनबाट सेवा प्रवाह गर्ने खालका कार्यक्रम तय गरेको यस गाउँपालिकाले प्रदान गर्ने सेवालाई जनमुखी बनाउनका लागि घरघरमा गएर नागरिक असन्तुष्टि सर्वेक्षण गर्ने र सेवाग्राहीको प्रतिक्रिया बुझी सेवामा सुधार ल्याउने रणनीति बनाएको छ ।

आगामी आर्थिक वर्षका लागि विनियोजन गरिएको कुल ३७ करोड ५३ लाख ४९ हजार रकम विनियोजन गरेको नीति कार्यक्रममा वातावरणमैत्री पूर्वाधार विकास, जडीबुटी खेती तथा प्रशोधन उद्योगको स्थापनालगायत शीर्षकमा रकम विनियोजन गरिएको छ । यस्तै, पूर्ण सरसफाइयुक्त, धुवाँमुक्त, छाउपडी गोठमुक्त गाउँपालिका निर्माण गर्ने, महिला हिंसाको कारणका रूपमा रहेको मदिरा नियन्त्रण गर्नेजस्ता सामाजिक अभियान सञ्चालन गर्नका लागि पनि बजेट विनियोजन गरिएको छ ।

जिल्लाकै ठूलो चैतली र विरसती मेला लाग्ने यो गाउँपालिकाले यहाँका प्राकृतिक तथा सांस्कतिक सम्पदाको प्रचारप्रसार गरी पर्यटनमार्फत समृद्धि ल्याउने खालका नीतिसमेत तय गरेको छ । पर्यटकीय गन्तव्यहरूमा आवश्यक पूर्वाधार विकासका लागि समेत विभिन्न योजना निर्माण गरिएको छ ।

नीति तथा कार्यक्रम तथा बजेटमा कृषि क्षेत्रको व्यावसायीकरण गर्ने, एक गाउँ एक उत्पादन कार्यक्रम सञ्चालन गर्ने, उद्योग र सहकारी क्षेत्रको विकास गर्ने, वन तथा वातारवणको संरक्षण गर्ने, स्थानीय स्तरमा युवा रोजगारी सिर्जना गर्नेजस्ता कार्यक्रम समेटिएका छन् । यस्तै बीउ र मलखादमा आत्मनिर्भर गाउँपालिका बनाउन बीउ उत्पादन तथा प्राङ्गारिक मल व्यवस्थापन योजना सञ्चालन गरिने नीति कार्यक्रममा उल्लेख छ ।

अध्यक्ष अक्कलबहादुर धामीले गाउँको विकास गर्ने जिम्मा अब गाउँलाई नै आएका कारण सबै मिलेर समृद्ध गाउँपालिका निर्माणमा जुट्नुपर्ने बताए । उनले आफ्नो कार्यकालभित्र देखिने र जनताले महसुस गर्ने गरी कृषि, शिक्षा, स्वास्थ्य, पूर्वाधार र आर्थिक विकासका काम गर्ने गरी आफूहरूले योजना निर्माण गरेको बताए ।

प्रकाशित : असार २२, २०७५ १०:४९
प्रतिक्रिया
पठाउनुहोस्

‘प्रेस स्वतन्त्रतामा प्रतिबद्ध’

कान्तिपुर संवाददाता

धनगढी — प्रदेश ७ का मुख्यमन्त्री त्रिलोचन भट्टले प्रादेशिक सञ्चार नीति निर्माण गर्दा प्रेस स्वतन्त्रताप्रति पूर्ण सम्मानसहितको नीति निर्माण गर्ने प्रतिबद्धता जनाएका छन् ।

मुख्यमन्त्री त्रिलोचन भट्ट

पत्रकार महासंघले बिहीबार धनगढीमा आयोजना गरेको प्रादेशिक सञ्चार नीति र कानुन विषयक पत्रकारहरूसँगको अन्तक्र्रियामा मुख्यमन्त्री भट्टले भने, ‘संवैधानिक मर्मप्रति पूर्ण प्रतिबद्ध रही सोही स्पिरिटमा प्रादेशिक सञ्चार नीति निर्माण गर्नेछौं ।’

देश संघीय संरचनामा गइसकेपछि स्थानीय तह, प्रादेशिक र संघीय सरकारले यसअघिको सञ्चार नीतिमा हेरफेर गरेर नयाँ निर्माण गर्नेछन् । प्रदेशस्तरीय उक्त कार्यक्रममा पत्रकारिता क्षेत्रका विकृतिको बारेमा समेत चर्चा भएको थियो । मुख्यमन्त्री भट्टले प्रेस जगत् आग्रही र धमिलो भए सबै क्षेत्र गोलमाल हुने औंल्याए । ‘प्रदेश सरकार मर्यादित तथा स्वतन्त्र प्रेसको पक्षमा छ,’ उनले भने ‘नकारात्मक मात्र नभई प्रेसले उठान गर्ने सवालहरू रचनात्मक हुनु जरुरी छ ।’

पत्रकार महासंघका केन्द्रीय कोषाध्यक्ष राजेश मिश्रले प्रादेशिक कानुन निर्माणका क्रममा प्रदेश सरकारले पत्रकारहरूसँग सहकार्य गरेर कानुन निर्माण गर्नुपर्नेमा जोड दिए । उनले भने, ‘प्रेसजगत् सत्तापक्षको स्थानीय प्रतिपक्ष भएकाले पत्रकारिता क्षेत्रभित्रका कमीकमजोरीहरू हामी सुधार्छौं, सरकार पनि जिम्मेवार हुनुपर्छ ।’

प्रमुख प्रतिपक्षी कांग्रेस संसदीय दलका नेता रणबहादुर रावलले यस प्रदेशले निर्माण गर्ने प्रादेशिक सञ्चार नीतिमा कांग्रेसले प्रेसमैत्री कानुन निर्माण गर्न सघाउने बताए । ‘पूर्ण प्रेस स्वतन्त्रताप्रति प्रतिबद्ध रही कानुन निर्माणमा भूमिका निर्वाह गर्छौं’ रावलले भने, ‘धेरै सन्दर्भहरूमा सत्ता र विपक्षी नभनी सहकार्य गरिरहेका छौं ।’

प्रकाशित : असार २२, २०७५ १०:४८
पूरा पढ्नुहोस्
प्रतिक्रिया
पठाउनुहोस्