सल्यानको कपुरकोटमा आगलागीले घरगोठ जलेर नष्ट
सल्यान — बिजुलीको तार सट हुँदा सल्यानको कपुरकोट गाउँपालिका ३ फलाटेमा एउटा घर र गोठ जलेर नष्ट भएका छन् । स्थानीय ५५ वर्षीय सेते डाँगीको घर र ३५ वर्षीय कृष्ण खत्रीको गोठ जलेर नष्ट भएका हुन् ।
बिजुलीको तार सट भएर घरमा भएको आगलागीबाट लत्ताकपडा, खाद्यान्न, भाँडाकुडा लगायतका सामग्री जलेर नष्ट भएको जिल्ला प्रहरी कार्यालय सल्यानका सूचना अधिकारी सन्तोष खनालले बताएका छन् ।
घरगोठ जलेर नष्ट हुँदा ४ लाख बराबरको क्षति भएको उनले जानकारी दिए । उनका अनुसार प्रहरी र स्थानीयको सहयोगमा घरमा लागेको आगो नियन्त्रणमा लिइएको छ ।
बिजुलीको तार सट भएर यसअघि पनि कपुरकोटमा एक घर जलेर नष्ट भएको थियो । घरगोठ जलेर नष्ट भएका परिवार अहिले आफन्तको शरणमा रहेका छन् ।
प्रकाशित : जेष्ठ २०, २०८० १९:०१प्रतिक्रिया