गणतन्त्र दिवसमा शारदा नगरपालिकामा पढाई मेला

नगरपालिकाले बालबालिकामा पठनपाठन गर्ने बानीको विकास गर्न सदरमुकाम खलंगाको लुहापिङ्गस्थित सबैभन्दा पुरानो त्रिभुवन जनमाध्यमिक विद्यालयमा पढाई मेला गर्ने भएको हो । मेला संचालनका लागि नगरपालिकालाई शिक्षासँग सम्बन्धित कार्यक्रम रुम टु रिडले सहयोग गरेको छ ।

सानै उमेरदेखि मोबाइलतर्फ ध्यान दिँदा शैक्षिकस्तर खस्कँदै गएकाले त्यसमा सुधार तथा बालबालिकालगायत युवामा पढ्ने बानी विकास गर्न पढाई मेला गर्न लागेको शारदा नगरपालिका नगर प्रमुख प्रकाश भण्डारीले पत्रकार सम्मेलनमा बताए । उनका अनुसार नगरपालिकाभित्र ५७ सामुदायिक र ११ निजी विद्यालय छन् । नगरभित्रका २० भन्दा बढी विद्यालयबाट विकास गरिएका बालकेन्द्रित, नविनतम् र आकर्षक पठन सामग्री, बाल खेलसहितका स्टल राखिने छ । मेलामा नगरभरिका सबै विद्यालयका एक हजारभन्दा बढीको सहभागिता हुने अपेक्षा गरिएको छ ।

शारदा नगरपालिकाका प्रमुख प्रशासकीय अधिकृत लिलाधर बबालले पुस्तक पढाईप्रति बालबालिका उत्साहित गर्न पहिलोपटक पढाई मेला गर्न लागेको पत्रकार सम्मेलनमा बताए । ‘मेलामा बाल पुस्तकालय, पढाई मापन तथा डिजिटल पुस्तकालय, हिँडाई पढाई र चौतारामा बसेर पढाईलगायत कक्षा पुस्तकालय, स्वतन्त्र पठन, लेखन तथा कथा वाचन कार्यक्रम हुनेछ,’ उनले भने । गणतन्त्र दिवसमा अन्य कार्यक्रम गरेर समय बिताउनुभन्दा पढाई मेला गर्दा प्रभावकारी हुने उनको विश्वास छ ।