काठमाडौँ — प्रधानसेनापति प्रभुराम शर्माले शान्ति सेनामा सहभागिता नेपालको परराष्ट्र नीतिको एक महत्वपूर्ण पक्ष भएको बताएका छन् ।पाँचखालस्थित वीरेन्द्र शान्ति कार्य तालिम केन्द्रमा ७५ औं ‘इन्टरनेशनल डे अफ यूएन पिसकिपर्स–२०२३’ मनाउने अवसरमा शुक्रबार प्रधानसेनापति शर्माले उक्त कुरा बताएका हुन् ।

प्रधानसेनापति शर्माले नेपाली शान्ति सैनिकहरु तथा शान्ति स्थापना कार्यमा संलग्न नेपाल प्रहरी एवं सशस्त्र प्रहरी बल नेपालका सकलदर्जाहरु संयुक्त राष्ट्रसंघको वडापत्रमा उल्लेखित लक्ष्य र उद्देश्यहरु पूरा गर्न दृढ रहेको उल्लेख गरे ।

उनले नेपाल संयुक्त राष्ट्रसंघको एक विश्वसनीय सदस्यको रुपमा रहेको बताए । शर्माले विश्व शान्ति स्थापनार्थ विश्वसनीय र पेसेवर सेनाको योगदान पुर्‍याउने राष्ट्रहरुमध्ये नेपाल अग्रपंक्तिमा रहेको बताए । ‘विश्व शान्ति स्थापनार्थ आफ्नो ज्यानको आहुति दिने वीर सैनिकहरुप्रति श्रद्धाञ्जली अर्पण गर्नछु । उहाँहरुले पुर्‍याएको योगदानको संयुक्त राष्ट्रसंघ, राष्ट्र र नेपाली सेनाले सदैव सम्मान र कदर गर्ने गर्दछ,’ उनले भने ।

प्रधानसेनापति शर्माले नेपालले द्वन्द्वग्रस्त सहारा मरुभूमिदेखि कठ्यांग्रिने माउन्ट हर्मनलगायत विश्वका जटिल स्थानहरुमा कैयौंको जीवनरक्षा गर्नुका साथै जीवनस्तर सुधारमा पुर्‍याएको अतुलनीय योगदान र समर्पणले विश्वका मानिसहरुको सम्मान र प्रशंसा कमाएको उल्लेख गरे ।

यस वर्षको ‘इन्टरनेशनल डे अफ यूएन पिसकिपर्स–२०२३’ को नारा ‘पिस विगेन विथ मी’ रहेको छ । उक्त अवसरमा प्रधानसेनापति शर्माले यस वर्ष शान्ति स्थापना कार्यमा निःस्वार्थ भावनाले बहादुरीपूर्वक कार्य गरी विशेष योगदान पुर्‍याएका चार जना सकलदर्जा र वीरगति प्राप्त तीन जना सकलदर्जाका परिवारलाई सम्मानपत्र प्रदान गरे ।

उनले शान्ति स्थापनार्थ कार्यरत रहँदा वीरगति पाउने एकजना नेपाली शान्ति सैनिकको सम्मानमा प्राप्त ‘डाग हम्मरस्कवर्ल्ड मेडल’ र कदरपत्र सैनिकका श्रीमतीलाई हस्तान्तरण गरे ।