२४.१२°C काठमाडौं
काठमाडौंमा वायुको गुणस्तर: १९७

गाउँले यार्सा खोज्न जाँदा १४ गाउँ सुनसान

राजबहादुर शाही

मुगु — मुगुम कार्मारोङ गाउँपालिकाका स्थानीय यार्सा खोज्न पाटन गएपछि १४ वटा गाउँ सुनसान भएका छन् । मुगु, कार्ति, किम्री, ताखा, खारी, रिउस, पुवा, माग्री, मह, सेरोक, रिउसलगायत १४ गाउँका महिला, पुरुष र ५ वर्ष उमेरभन्दा माथिका बालबालिका यार्सा खोज्न पाटन उक्लिएपछि घर बस्ती सुनसान भएका हुन् ।

गाउँले यार्सा खोज्न जाँदा १४ गाउँ सुनसान

पशुचौपाया नभएका स्थानीयहरू घरमा ताला लगाएर यार्सा टिप्न पाटनतिर हिँडेका छन् भने घरमा पशुचौपाया भएका स्थानीयहरू एक जना गोठालो घरमा छाडेर सम्पूर्ण परिवार नै यार्सा खोज्न हिँडेका छन् ।

सबै स्थानीय यार्सा टिप्न पाटनतर्फ लागेपछि गाउँ सुनसान भएको मुगु गाउँका सोनाम तामाङले बताए । उनले भने, ‘गाउँमा हिँड्न नसक्ने वृद्धवृद्धा, सुत्केरी तथा गर्भवती महिला र बालबालिका मात्र छन् ।’

कोरोना महामारीले चार वर्षदेखि यार्सा टिप्न नपाएकाले यो पटक धेरै पाइने र बढी पैसा कमाउन सकिने लोभले गाउँ नै छाडेर स्थानीय यार्सा टिप्न पाटनतर्फ लागेका हुन् ।

चामल, मैदा, नुन, तेल, चाउचाउलगायत खाद्यवस्तु बोकेरै एक महिनासम्मका लागि यार्सा टिप्न पाटन हिँडेका छन् । कक्षा ५ देखि १० कक्षामा अध्यायरत विद्यार्थीहरू पनि पैसाको लोभले यार्सा टिप्न पाटन जाँदा विद्यालय पनि सुनसान भएका छन् ।

यार्सा खोज्ने सिजनमा गाउँबस्ती सुनसान हुने मुगुम कार्मारोङ गाउँपालिका अध्यक्ष छिरिङक्याप्ने लामाले यार्सा टिप्न पाटन गएका स्थानीय करिब एक महिनापछि गाउँ फर्किने बताए ।

प्रकाशित : जेष्ठ ११, २०८० १९:०१
प्रतिक्रिया
पठाउनुहोस्
जनताको राय

कांग्रेसले 'वेल' घेरेर नाराबाजी गरिरहेका बेला प्रधानमन्त्रीले प्रतिनिधिसभामा विश्वासको मत लिएको घटनालाई कसरी लिनु भएको छ ?