हुम्लामा हवाई सेवा अवरुद्ध

जेष्ठ १०, २०८०जनकबहादुर शाही

हुम्ला — हिमाली जिल्ला हुम्लामा हवाई सेवा अवरुद्ध भएको छ । मंगलबार रातिदेखि मौसम खराब हुँदा हुम्लाको हवाई सेवा अवरुद्ध भएको हो । नेपालगन्ज र सुर्खेतबाट नियमित उडान भर्ने निजी जहाजले मौसम खराबीका कारण उडान भर्न सकेको छैन । हुम्लालाई अन्तरजिल्ला जोड्ने एकमात्र माध्यम हवाई सेवा हो ।

बुधबारबाट जिल्लाको मौसममा फेरबदल भई पानी परेपछि सिमकोट विमानस्थलमा नेपालगन्ज र सुर्खेतबाट यात्रुसहित कार्गो सामान आउन सकेको छैन । हुम्लादेखि नेपालगन्ज र सुर्खेत जाने तथा नेपालगन्ज र सुर्खेतदेखि सिमकोट आवतजावत गर्ने यात्रुसहित अन्य सामग्री ढुवानी हुन नसकेको सिमकोट विमानस्थलले जनाएको छ ।