जुम्ला — कर्णालीको पर्यटन प्रवर्द्धनका लागि आगामी वैशाख ११ गते जुम्ला रारा अल्ट्रा म्याराथन आयोजना गरिने भएको छ । जुम्ला सदरमुकाम खलंगाको शून्य प्वाइन्ट चन्दननाथ मन्दिरदेखि रारातालको छेउ हुटुसम्मको ४९ किलोमिटर दूरीमा अल्ट्रा म्याराथन हुन लागेको हो ।

कर्णाली स्पोर्ट्स क्लब जुम्लाले पत्रकार सम्मेलनको आयोजना गरेर लोकतन्त्र दिवसको अवसरमा जुम्ला रारा अल्ट्रा म्याराथन आयोजना हुने जानकारी दिएको हो ।

क्लबका अध्यक्ष सरोज शाहीले म्याराथनले कर्णालीको पर्यटन प्रवर्द्धनका साथै पर्यटकीय क्षेत्रहरुको प्रचारप्रसारमा टेवा पुग्ने बताए । उनका अनुुसार शून्य प्वाइन्ट खलंगादेखि सुरु भएर डाँफे लेक, न्यौरीघाट, चौथा, डाब, चुचेमारा, मिलीचौर हुँदै रारातालको छेउ हुटुमा पुगेर अन्तिम बिन्दु तोकिएको छ ।

म्याराथनमा विभिन्न विधामा गरेर २८ जना खेलाडीलाई पुरस्कृत गरिने समेत आयोजकले जनाएको छ । खेलाडीले अनलाइनबाटै नाम दर्ता गराउन सक्ने र क्युआर कोडबाटै शूल्क भुक्तानी गर्ने व्यवस्था मिलाइएको छ । विदेशी खेलाडीका लागि ७ हजार, नेपाली धावकका लागि ३ हजार शूल्क तोकिएको छ ।

म्याराथनमा प्रथम हुनेलाई एक लाख रुपैयाँ, प्रमाणपत्र र मेडल, द्धितीय हुनेलाई ७५ हजार नगद, प्रमाणपत्र र मेडल, तृतीय हुनेलाई ५० हजार नगद, प्रमाणपत्र र मेडल प्रदान गरिनेछ । यसैगरी चौथो र पाँचौं हुनेलाई २०/२० हजार, नगद प्रमाणपत्र र मेडल प्रदान गरिने आयोजक कर्णाली स्पोर्ट्सका अध्यक्ष शाहीले जानकारी दिए ।

गिनिज बुक अफ वर्ल्ड रेकर्डर एभरेष्ट म्यारथन ह्याट्रिकर हरिबहादुर रोकायको संरक्षणमा म्याराथन हुन लागेको हो । जुम्लालाई उच्च पर्वतीय खेलकुद प्रशिक्षण केन्द्रका रुपमा विकास गर्ने र खेलकुदको महत्त्वबारे जनचेतना अभिवृद्धि गराई खेल संस्कृतिको विकासका लागि म्याराथन आयोजना गर्न लागिएको धावक हरिबहादुर रोकायाले बताए ।

‘विश्वमा हिमाली तथा पहाडी क्षेत्रमा आयोजना हुँदै आएका यस्ता साहसिक खेलकुद प्रतियागिता गर्नेमध्ये जुम्ला पनि उच्च सम्भावना भएको जिल्लाको रुपमा चिचिनसक्छ,' धावक रोकायाले भने ।

जुम्लामा यसअघि तीनवटा म्याराथनका इभेन्ट भइसकेका छन् । हरेक प्रतियोगितामा तीन सयदेखि चार सयको हाराहारीमा देशभरका १८ जिल्लाका साथै बेलायत, नेदरल्याण्ड, भारत, इटाली, अमेरिका लगायत देशका खेलाडीहरु सहभागी भएका थिए । यस वर्ष चौथो जुम्ला रारा अल्ट्रा म्याराथनमा झण्डै २ हजार खेलाडी सहभागी गराउने लक्ष्य राखिएको छ ।