म्याद सकिँदा बसपार्कको आधा काम

०७८ चैत पहिलो साताबाट एक वर्षभित्र निर्माण सक्ने गरी केशव शाह कन्स्टक्सन नेपालगन्जले कामको ठेक्का लिएको थियो । अहिलेसम्म टिकट घर र शौचालयको भवन निर्माणको आधारभूत काम सकिएको बताउँदै इकाइका इन्जिनियर टीकाराम पोख्रेलले घर तथा शौचालयको फनिर्सिङ तथा पार्किङ स्थलको काम भने बाँकी भएको जानकारी दिए । ‘ठेकेदारसँग भएको सम्झौताको म्याद सकिन अब एक महिना मात्रै बाँकी छ,’ पोख्रेल भन्छन्, ‘थप एक महिना म्याद थपका लागि माग भएको छ अबको एक महिनाको कामको गति हेरेर थप्ने कि नथप्ने निर्णय गर्छौं ।’

करिब ४० वटा ठूला सवारी पार्किङ गर्न मिल्ने गरी कुल १ करोड ५७ लाख रुपैयाँका लगाइएको संघीय आयोजना कार्यान्वयन इकाइका प्रमुख अमर थापाले बताए । सदरमुकाममा बसपार्क नहुँदा अहिले सार्वजनिक सवारी जथाभावी रोकिराख्नुपर्ने बाध्यता रहेको भन्दै यातायात व्यवसायी नागेन्द्र पुनले बताए । ‘बाटो छेउछाउ र कसैको निजी जग्गामा भाडा तिरेरसमेत पार्किङ गरिरहेका छौं । यसले गर्दा एकातिर हाम्रा सवारी असुरक्षित छन् भने, हामीलाई अतिरिक्त खर्चको भार पनि थपिएको छ,’ उनले भने । तर निर्माणाधीन बसपार्क बजार क्षेत्रबाट निकै टाढा भएको पुनको गुनासो छ । सल्लेबाट ८ सय मिटर भए पनि मूल बजार खलंगाबाट भने बसपार्क करिब ३ किलोमिटर दूरीमा बन्दै छ । वरिपरि मानवीय चहलपहल नै नभएको स्थलमा बसपार्क निर्माण भएपछि सवारी र व्यवसायीको सुरक्षाका साथै यात्रुहरूलाई त्यति टाढासम्म आवतजावतमा समेत कठिन हुने भन्दै पुनले यसबारेमा भने सरोकारवालाले ध्यान नदिएको बताए ।

मुसीकोट नगरपालिकाका प्रमुख महेन्द्र केसीले बसपार्क टाढा बनाउनु आफूहरूको बाध्यता रहेको बताए । उनले भने, ‘स्थान छनोट अघिल्लो सरकारले गरेको हो । तर बजार नजिकै बसपार्क बनाउन मिल्ने सार्वजनिक तथा सरकारी जग्गा नभएका कारण टाढा हुनु बाध्यता हो ।’ मुसीकोट–१ सल्लेमा रहेको जिल्ला अस्पतालको गेटबाट बसपार्कसम्म पुग्नका लागि सडक स्तरोन्नतिको कामसमेत गरिएको संघीय आयोजना कार्यान्वयन इकाइले बताएको छ । इन्जिनियर पोख्रेलले ७० लाख लगानीमा चालु आर्थिक वर्षमा सडकको स्तरोन्नति गरिएको बताए ।

‘अस्पतालको गेट नजिकै जग्गावालासँग कुरा नमिलेर करिब १ सय मिटरमा बाटो चौडा बनाउन सकिएको छैन । बाँकी ७ सय मिटर सडक भने चौडा बनाएको छ,’ उनले भने, ‘स्थानीय सरकारको सहजीकरणमा बाँकी काम पनि छिट्टै अघि बढ्छ । यो ८ सय मिटर सडकलाई कालोपत्रे नै गर्ने भनेर थप साढे ३ करोड माग गरेका छौं । स्वीकृत भएपछि सडकको काम सकिनेछ ।’ जिल्ला सदरमुकाममा बसपार्क नहुँदा यातायात व्यवसायी र सम्बन्धित सरोकारवाला तथा नागरिकले समेत लामो समयदेखि सास्ती बेहोरिरहेका छन् । बजारदेखि केही टाढाको दूरीमा भए पनि बसपार्क बनेपछि यो सास्ती केही कम हुने मुसीकोट–१ का टेकबहादुर कुसारीले बताए ।