वीरेन्द्रनगर — कर्णाली प्रदेशको मुख्य न्यायाधिवक्तामा नरबहादुर खड्का नियुक्त भएका छन् । मुख्यमन्त्री राजकुमार शर्माले खड्कालाई शुक्रबार मुख्य न्यायाधिवक्तामा नियुक्त गरेका हुन् । खड्का दैलेखका हुन् ।
ड्काले शुक्रबारै पद तथा गोपनियताको शपथ पनि लिएका छन् । उनलाई उच्च अदालत सुर्खेतका मुख्य न्यायाधीश माधवप्रसाद पोखरेलले पद तथा गोपनीयताको शपथ ग्रहण गराएका हुन् ।
मुगु — नेपाल एयरलाइन्सले नेपालगन्जदेखि कर्णालीका दुर्गम जिल्लामा उडानका लागि पहिलो पटक अनलाइन प्रणाली लागू गरेको छ । अनलाइन प्रणाली यही माघ १९ गते बिहीबारदेखि लागू गरिएको हो ।
नेपालगन्जदेखि उडान हुने कर्णालीका हुम्ला, मुगु, जुम्ला, डोल्पा र रुकुमसहित सुदूरपश्चिम बाजुरामा अनलाइन टिकट प्रणाली लागू गरिएको नेपाल नागरिक उड्डयन प्राधिकरण नेपालगन्जका प्रमुख किरणमान श्रेष्ठले कान्तिपुरलाई जानकारी गराए । नेपालगन्जदेखि माथि जान र तल झर्न दुवैतर्फ अनलाइन टिकट प्रणाली लागू भएकोले यात्रु वर्गलाई सहज हुने उनको विश्वास छ ।
शक्तिकै भरमा हवाई टिकट वितरण हुने र सर्वसाधारण यात्रुले भनेको समयमा टिकट नपाउँदा सास्ती खेप्नु परेको अवस्थालाई मध्यनजर गरी कर्णालीका दुर्गम जिल्लामा अनलाइन टिकट प्रणाली लागू गरिएको श्रेष्ठले बताए ।
कर्णालीसहित हिमाली दुर्गम जिल्लामा अनलाइन टिकट प्रणाली लागू गर्दा सर्वसाधारण यात्रुलाई आउजाउ गर्न सहज हुने मुगुका सांसद ऐनबहादुर शाहीले विश्वास व्यक्त गरे ।
प्रकाशित : माघ २०, २०७९ २०:५५
