रुकुम पश्चिम — रुकुम पश्चिमको जिल्ला सदरमुकाम खलंगाबाट करिब १ घन्टा यात्रा गरेपछि पुगिन्छ जन्तीडाँडा । धेरै वर्ष पहिले जन्ती जान हिँडेका मानिसहरु अलप भएपछि यो ठाउँलाई जन्ती अलपिएको डाँडा अर्थात जन्ती डाँडा भन्न थालिएको भनाइ छ ।
यहाँबाट रुकुम पूर्वको सिस्ने हिमाल, पुथा हिमाल र विभिन्न हिमश्रृंखलाहरुका साथै बाँफिकोटमा अवस्थित स्यापू ताल समेत देख्न सकिन्छ । साथै अग्ला पहाडको बीचबाट कलकल बग्ने सानीभेरी नदी अनि वरीपरीका मानव बस्तीहरुले पनि जोकोहीको मन लोभ्याउँछ ।
मुसीकोट नगरपालिका १ मा पर्ने जन्ती डाँडा करिब २९ सय मिटर उचाइमा छ । यहाँबाट रुकुम पूर्व, रोल्पा, सल्यान, जाजरकोट र डोल्पासम्मका पहाडी भूभागहरु समेत नियाल्न सकिन्छ ।
यसपटक उति हिउँ परेन । अघिल्ला वर्षहरुमा यतिबेला यहाँ हिउँ परिसक्थ्यो । वरिपरिका यी डाँडाहरु त सेताम्मे देखिन्थे हिउँले ।
सदरमुकाम खलंगाबाट यहाँसम्म गाडी नै आउने बाटो निर्माण गरिएको छ । यसकारण यो ठाउँ उति टाढा पनि छैन । गाडीबाट ओर्लिएर त्यही १५–२० मिनेट जति उकालो चढेपछि यहाँ पुगिन्छ । चारैतिर देख्न सकिने भएकाले टेलिकम, इन्टरनेट र रेडियो स्टेसनका टावरहरु पनि यहाँ राखिएको छ । जसका कारण यो ठाउँलाई केहीले टावर घर पनि भन्ने गरिन्छ ।
