हिमपातले कर्णालीमा दुई दिनदेखि हवाई सेवा अवरुद्ध- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

हिमपातले कर्णालीमा दुई दिनदेखि हवाई सेवा अवरुद्ध

राजबहादुर शाही

मुगु — भारी हिमपातका कारण कर्णालीका हिमाली जिल्लामा दुई दिनदेखि हवाई सेवा अवरुद्ध भएको छ । मंगलबार र बुधबार निरन्तर हिमपात हुँदा मुगु, हुम्ला, जुम्ला र डोल्पामा दुई दिनदेखि हवाई सेवा बन्द हुँदा यात्रुहरू मर्कामा परेका छन् । 

भारी हिमपातले दुई दिनदेखि हवाई सेवा अवरुद्ध भएको हुम्ला सिमकोट विमानस्थलका निमित्त प्रमुख चेतराज भट्टले बताए । हवाई सेवा बन्द हुँदा हुम्लामा खाद्य वस्तु ढुवानीमा बाधा परेको र यात्रुलाई तराई झर्न र माथि जिल्लातिर आउन मुस्किल भएको उनको भनाइ छ । दोस्रो पटक हिमपात भएको हुम्ला हिउँ पर्न रोकिएको छैन सिमकोट विमानस्थलमा करिब डेढ फिट हिउँ जमिसकेको छ‚ अझै आउने क्रम जारी रहेको छ । जुम्लामा हिमपात नरोकिँदा दुई दिन देखि हवाई सेवा अवरुद्ध भएको छ ।

नेपालगञ्ज-सुर्खेतदेखि सीता, समिट, तारा एयरलाइन्सले दैनिक तीन-चार फ्लाइट उडान गर्ने कर्णालीका हिमाली जिल्लामा भारी हिमपातका कारण उडान ठप्प भएको छ ।

मुगुको रारा विमानस्थलमा पनि दुई दिनदेखि उडान भएको छैन । धावन मार्गमा बाक्लो हिउँ जमेपछि सुर्खेत नेपालगञ्जदेखि निजी तथा सरकारी एयरलाइन्सले उडान भर्न नसक्दा मुुगुदेखि सुर्खेत‚ नेपालगञ्ज झर्ने यात्रु र नेपालगञ्ज-सुर्खेतदेखि माथि मुगु जाने यात्रुहरू विमानस्थलमै अलपत्र परेका छन् ।

कर्णालीमा हिमपात रोकिएपछि विमानस्थलमा हिउँ पन्छाएपछि मात्र हवाई उडान हुने गरेको छ । भारी हिमपातले गर्दा कर्णालीमा हिमाली जिल्लामा छिनछिनमा सञ्चार नेटवर्क अवरुद्ध हुन थालेको छ ।

प्रकाशित : माघ ११, २०७९ १४:४७
प्रतिक्रिया
पठाउनुहोस्

'रवि लामिछानेविरुद्ध परेको रिट निवेदन नै खारेजभागी'

कान्तिपुर संवाददाता

काठमाडौँ — सहन्यायाधिवक्ता संजीवराज रेग्मीले उपप्रधान तथा गृहमन्त्री रवि लामिछानेको प्रतिनिधिसभा सदस्य अयोग्यतासम्बन्धी परेको रिट निवेदन नै खारेजभागी भएको बताएका छन् । सर्वोच्च अदालतको संवैधानिक इजलासमा बुझाएको बहस नोटमा सहन्यायाधिवक्ता रेग्मीले निवेदकहरूलाई यस विषयमा निवदेन दिन नै हकदैया नरहेको तर्क पेस गरेका छन् ।

उनले रिट निवेदकले निवेदनमा आफ्नो हकदैया प्रस्तुत गर्न नसकेको पनि बताएका छन् । उनले भनेका छन्, 'प्रथमतः निवेदकहरुलाई यस विषयमा निवेदन गर्न हकदैया नै रहेको छैन । आफ्नो हकदैया रहेको भनि निवेदनमा प्रस्ट आधार प्रस्तुत गर्न सक्नु भएको छैन । प्रस्तुत विषय प्रतिनिधि सभा सदस्यको उम्मेदवारको अयोग्यताको विषय हो ।'

सहन्यायाधिवक्ता रेग्मीले रिट निवेदकले निवेदनमा विपक्षी बनाइएका प्रतिनिधिसभा सदस्य रवि लामिछाने नेपाली नागरिक होइनन् भनी भन्न नसकेको बताएका छन् । निर्वाचन आयोगले लामिछानेको उम्मेदवारीको अयोग्यताको विषयमा निर्णय नगरेको तथा राष्ट्रिय स्वतन्त्र पार्टीको सभापति पदमा गैरनेपालीलाई कायम गरिराखेको भन्ने आधारमा निवेदकहरुले परमादेशको आदेश माग गरेका छन् । तर सहन्यायाधिवक्ता रेग्मीले राष्ट्रिय स्वतन्त्र पार्टी नामक दल नेपालको संविधान, राजनीतिक दल सम्बन्धी ऐन, २०७३ र नियमावली बमोजिमको प्रक्रिया पूरा गरी निर्वाचन आयोगबाट दर्ता भएको बताएका छन् ।

लामिछानेको नेपाली नागरिकता कायम हुने/नहुने विषय र सन् २०१५ मा नेपालको राहदानी प्राप्त गरेको विषय संवैधानिक इजलासबाट निरुपण गरिने विषय नभएको रेग्मीको तर्क छ । उनले अगाडि भनेका छन्, 'तथ्य र प्रमाणका आधारमा साधिकार निकायबाट कानुनअनुसार निर्णय हुने विषय हुन्। यस विषयमा छानबिन गर्न गृह मन्त्रालयबाट सम्बद्ध अधिकारी समक्ष लेखी पठाइएको भन्ने सो मन्त्रालयको पत्रको प्रतिलिपि तथा लिखित जवाफमा उल्लेख रहेको छ ।'

नेपालको नागरिकता प्राप्त गरेको र विदेशी नागरिकता त्याग गरेको सूचना अधिकारिक निकायलाई नदिई पुरानो नेपाली नागरिकताको प्रमाणपत्र प्रयोग गरी प्रतिनिधिसभाको उम्मेदवार भएकोले अयोग्य रहेको जिकिर निवेदकहरूले निवेदनमा गरेको उल्लेख गर्दै सहन्यायाधिवक्ता रेग्मीले यो सारवहन व्यवस्था नभै नितान्त कार्यविधिगत व्यवस्था मात्र भएको बताएका छन् ।

उनले अगाडि भनेका छन्, 'कुनै पनि व्यक्ति सामान्य कार्यविधिको पालना नगरेको आधारमा गैरनागरिक हुने अवस्था हुँदैन । नेपालको नागरिकतासम्बन्धी व्यवस्थाले नागरिकताविहीनताको परिकल्पना गरेको छैन । निवेदकहरूले माननीय रवि लामिछाने नेपालको नागरिक होइनन् भन्नु भएको अवस्था छैन ।'








सम्बन्धित समाचार

  • 'रवि लामिछानेले जे गरे पनि आफूलाई कानुन लाग्दैन भन्ने व्यवहार देखाए'

प्रकाशित : माघ ११, २०७९ १४:४४
पूरा पढ्नुहोस्
प्रतिक्रिया
पठाउनुहोस्
×