काठमाडौँ — चालु आर्थिक वर्षको साउनदेखि पुससम्म कुल ७ खर्ब ९२ अर्ब ६६ करोड रुपैयाँको वस्तु आयात भएको छ । भन्सार विभागले सार्वजनिक गरेको वित्तीय रिपोर्टअनुसार रकमका आधारमा आयात गत वर्षको यसै अवधिको तुलनामा २०.६८ प्रतिशतले कम हो ।

गत वर्ष यसै अवधिमा ९ खर्ब ९९ अर्ब ३४ करोडको आयात भएको थियो । त्यस्तै आयात मात्रै नभई निर्यात समेत सो अवधिमा ३२ प्रतिशतले घटेको छ । ६ महिनामा ८० अर्ब ८० करोड रुपैयाँको मात्रै वस्तु देशबाहिर निर्यात भएको छ । गत वर्षको यसै अवधिमा १ खर्ब १८ अर्बको निर्यात भएको थियो ।

समग्रमा ६ महिनामा मुलुकको व्यापार घाटा ७ खर्ब ११ अर्ब ८५ करोड रुपैयाँ रहेको छ । विभागका अनुसार समीक्षा अवधिमा व्यापार घाटा १९.१५ प्रतिशतले घटेको छ । गत वर्षको यहीं अवधिमा मुलुकको व्यापार घाटा ८ खर्ब ८० अर्ब ४९ करोड रुपैयाँ थियो ।