सुर्खेतमा जिप दुर्घटना हुँदा ४ जनाको मृत्यु
सुर्खेत — शनिबार मध्यरातमा सुर्खेतको वीरेन्द्रनगर नगरपालिका–११ को झुप्राखोलास्थित रत्न राजमार्गको छिन्चुदेखि सुर्खेततर्फ आउँदै गरेको जिप दुर्घटनामा चार जनाको मृत्यु भएको छ ।
बा. प्र. ०१०२६ च ९२१३ नम्बरको जिप अनियन्त्रित भइ सडकदेखि अन्दाजी ७०/८०मिटर तल खस्दा चार जनाको मृत्यु भएको प्रहरीले जनाएको छ ।
राती करिब साढे दुई बजेतिर जिप दुर्घटनाको खबर आएपछि प्रहरी घटनास्थलमा पुगी घाइतेलाई उद्धार गरी उपचारका लागि कर्णाली प्रदेश अस्पताल सुर्खेतमा पठाएको थियो । उपचारको क्रममा सुर्खेतको वीरेन्द्रनगर नगरपालिका–७ का २७ वर्षीय चालक सागर शाही, दैलेख डुङ्गेश्वर गाउँपालिका– ५ बस्ने ३३ वर्षीय दिपेन्द्रजंग शाही, दैलेख भगवतीमाई गाउँपालिका–५ बस्ने ३१ वर्षीय बबिन शाही र दैलेख गुराँस गाउँपालिका–३ बस्ने ३६ वर्षीय राजेन्द्र बिसीको उपचारको क्रममा मृत्यु भएको प्रहरीले जनाएको छ ।
दुर्घटनामा घाइते भएका दैलेख भैरवी गाउँपालिका– ५ बस्ने अन्दाजी २५/२६ वर्षीय वीरेन्द्रराज शाहीको उपचार चलिरहेको छ । प्रहरीका अनुसार उनको छातीमा चोट लागेको छ ।