अनधिकृत संरचना भत्काउँदै शारदा नगरपालिका- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

अनधिकृत संरचना भत्काउँदै शारदा नगरपालिका

विप्लव महर्जन

सल्यान — शारदा नगरपालिका १ श्रीनगरस्थित अस्थायी बसपार्क वरपरको ऐलानी जग्गा अतिक्रमण गरी निर्माण गरिएका घरटहराहरू शारदा नगरपालिकाले आइतबारदेखि भत्काउन सुरु गरेको छ । आधुनिक बसपार्क निर्माणका लागि ती संरचना हटाउन ३५ दिने सूचना प्रकाशन गरे पनि सबै स्थानीयले घरटहरा नहटाएपछि नगरपालिकाले डोजर लगाई भत्काउन सुरु गरेको हो ।

अस्थायी बसपार्क वरिपरि ३५ रोपनी ऐलानी जग्गा अतिक्रमण गरी स्थानीय तथा आसपासका व्यक्तिहरू ८५ घरटहरा निर्माण गरी झन्डै तीन दशकदेखि बसोबास र ब्यापार व्यावसाय गर्दै आएका छन् । तिनै घरटहरा हटाउन शारदा नगरपालिकाले एक स्काभेटर र दुई डोजर प्रयोग गरेको हो ।

घरटहरा हटाउन केहीले नमानेपछि उनीहरूलाई नगरपालिकाका नगरप्रमुख प्रकाश भण्डारीले तीन दिनभित्र खाली गरेर हटाउन फेरि अल्टिमेटम दिएका छन् । ऐलानी जग्गा अतिक्रमण गरी निर्माण गरिएका घरटहरा भत्काउँदा विवाद हुनसक्ने भन्दै नगरपालिकाले ठूलो संख्यामा सुरक्षाकर्मी खटाएको छ ।

शारदा नगरपालिकाका नगर प्रमुख प्रकाश भण्डारीका अनुसार आइतबार मात्रै दुई दर्जनभन्दा बढी घरटहरा भत्काइएको र बाँकी घरटहरा पनि डोजर लगाई भत्काउने काम भरहेको छ । कतिपय स्थानीयले भने आफैंले घरटहरा भत्काएर घरका सामग्री लिएर अन्यत्र गएका छन्।

साथै नगरप्रमुख भण्डारीले श्रीनगरमा आधुनिक बसपार्क निर्माणका क्रममा कुनै पनि विवाद नभएको र केही व्यक्तिले मात्र अटेर गरेको दाबी गरेका छन्। ‘घरटहरा भत्काएर सामान व्यवस्थापन गर्न नगरपालिकाले सहयोग गरेको छ,’ उनले भने ‘जग्गा तथा घर नभएकालाई कोठाभाडा उपलब्ध गराएर बस्ने व्यवस्था मिलाइएको छ ।’


नगरपालिकाका अनुसार आधुनिक बसपार्क निर्माणका लागि तीन पटक प्रत्येक वर्ष ६० करोडभन्दा बढी बजेट आएको छ । तर स्थानीयले यसअघि विरोध गरेका कारण निर्माण प्रक्रिया अगाडि बढ्न सकेको थिएन । ‘अहिले बजेट आएको छैन । फोहर तथा अन्य व्यवस्थापनका लागि नगरपालिकाले ११ औं नगरसभाबाट १ करोड बजेट बिनियोजन गरेको छ । उक्त बजेट पर्याप्त नभएकाले प्रदेस तथा संघमा माग गरेका छौ,’ उनले भने ‘शारदा नगरपालिका १ को श्रीनगर जिल्लाकै प्रमुख ब्यापारिक क्षेत्र हो । बजार क्षेत्रभित्रै रहेको अस्थायी बसपार्कलाई आधुनिक मात्र नभई सुन्दर तथा समृद्ध बनाउने सबैको दायित्व हो । बजारका साथै आधुनिक बसपार्क बनाउन सबैको सहयोग चाहिन्छ । सबैले साथ दिए मात्र आधुनिक बसपार्क सम्भव छ ।’

जिल्लाका १० स्थानीय तहमा विगतदेखि २ हजार हेक्टरभन्दा बढी ऐलानी जग्गा अतिक्रमण गरी घर निर्माण तथा जग्गा बनाइ जिल्लावासीले बसोबार तथा खेतीपाती गर्दै आएका छन् । केहीले ब्यापार व्यवसायसमेत गर्दै आएका छन् तर शारदा नगरपालिका भन्दा अन्य पालिककाले ऐलानी जग्गा अतिक्रमण गरी निर्माण गरिएका घरटहरा हटाउन कुनै प्रक्रिया अगाडि बढाएका छैनन् ।


प्रकाशित : माघ २, २०७९ १९:५३
प्रतिक्रिया
पठाउनुहोस्

आफन्तले बुझ्न थाले शव

२१ को पोखरामै पोस्टमार्टम, ४९ शव काठमाडौं लगिने
दीपक परियार

पोखरा — यती एयरलाइन्सको जहाज दुर्घटनामा ज्यान गुमाएका मृतकको शव आफन्तले बुझ्न सुरु गरेका छन् । सोमबार साँझ पोस्टमार्टम सुरु भएसँगै आफन्तले शव बुझेका हुन् । सोमबार साँझ पोखरा–१३ मियाँपाटनका सदाकत अली मियाँको शव परिवारले बुझेका छन् । 

जिल्ला प्रहरी कार्यालय कास्कीका प्रमुख अजय केसीका अनुसार हालसम्म ७० जनाको शव फेला परेको छ । दुईजना अझै बेपत्ता छन् । ती शवलाई पोखरा स्वास्थ्य विज्ञान प्रतिष्ठानको पोस्टमार्टम वार्डमा राखिएको छ । तीमध्ये २१ जनाको पोखरामै पोस्टमार्टम हुने छ । बाँकी ४९ शव मंगलबार सेनाको हेलिकप्टरमा काठमाडौं लैजान सुरु गरिने छ । ‘पहिला २४ जनाको यहीँ पोस्टमार्टम गर्ने भन्ने थियो,’ उनले भने, ‘तर एउटा परिवारको ४ मध्ये दुई र अर्कोको ३ मध्ये २ को पहिचान नहुँदा काठमाडौं लैजानुपर्ने भएकोले पहिचान भएको पनि काठमाडौं नै लैजान्छौं भन्नुभयो ।’

मंगलबार दिनभरिमा विदेशी नागरिक, क्रु मेम्बर र पहिचान नभएका शवलाई काठमाडौं लैजाने उनले बताए । उनका अनुसार सोमबार रातिबाट स्थगित भएको बेपत्ता यात्रुको खोजी कार्य मंगलबार बिहानबाट पुनः सुरु हुने छ । दुर्घटनास्थलमा नेपाली सेना, सशस्त्र प्रहरी बल र नेपाल प्रहरीको टोली उद्धारमा खटिएको छ ।

आइतबार बिहान १०:३२ बजे त्रिभुवन विमानस्थलबाट पोखराका लागि उडेको यती एयरलाइन्सको कल साइन नाइनएन एएनसी फ्लाइट नम्बर ६९१ एटीआर-७२ जहाज करिब ११ बजेको आसपासमा पोखरा विमानस्थलबाट २ किलोमिटरको नजिकमा सेती नदीको खोंचमा दुर्घटनाग्रस्त भएको थियो । ७२ जना सवार विमानमा अहिलेसम्म ७० जनाको शव भेटिएको छ भने २ जनाको खोजी कार्य जारी रहेको छ।

प्रकाशित : माघ २, २०७९ १९:५०
पूरा पढ्नुहोस्
प्रतिक्रिया
पठाउनुहोस्
×