निगालचुलामा खानेपानी अभाव- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

निगालचुलामा खानेपानी अभाव

कान्तिपुर संवाददाता

सल्यान — बन्गाडकुपिण्डे –१२ निगालचुलाको माझखर्क र चौरमा खानेपानीको हाहाकार भएको छ । २०६६ मा निर्माण गरेको सौर्यऊर्जा खानेपानी योजनाको मोटर बिग्रिएपछि स्थानीयले ३ वर्षदेखि सास्ती भोग्दै आइरहेका छन् ।

समुद्र सतहदेखि झन्डै २ हजार मिटर उचाइमा रहेको बस्तीमा खानेपानीको हाहाकार भएपछि स्थानीय समस्यामा परेका छन् । उनीहरू एक गाग्री पानीका लागि एक/डेढ घन्टा हिँडेर नजिकैका कुवा तथा खोलाहरूमा धाउन बाध्य छन् । खानेपानीको हाहाकार भएपछि माझखर्क ५३ र चौरका ५७ गरी एक सय १० घर परिवार प्रभावित छन् । २०६६ मा तत्कालीन निगालचुला गाविसले ३ लाख खर्चेर योजना निर्माण गरेको थियो । गाउँमा खानेपानी नहुँदा घण्टौं हिँडेर पानी बोक्नुपर्ने स्थानीय दिलमाया खत्रीले बताइन् । उनका अनुसार गाउँमा ३ घन्टा पैदल हिडेर खानेपानी ल्याउनुपर्ने बाध्यता छ । ‘अभाव हुँदा पानी अड्कलेर खानुपर्ने बाध्यतामा छौं,’ उनले भनिन्, ‘वर्षौंदेखि आधा राति उठेर पानी ल्याउन मुहानमा जानुपर्ने बाध्यता छ ।’ उनले खानेपानी समस्याका कारण महिला र बालबालिका बढी जोखिममा रहेको बताइन् ।

स्थानीय ममता खड्काले वर्षायामबाहेक अन्य समयमा खानेपानीको जोहो गर्न विभिन्न सास्ती भोग्दै आएको बताइन् । उनका अनुसार खानेपानी समस्याकै कारण गाउँका अधिकांश शौचालय प्रयोगविहीन छन् । पशुपालन गर्न पनि समस्या छ ।

निगालचुलामा रहेको स्वास्थ्यचौकीका इन्चार्ज दिलबहादुर सुनारले पानीको समस्याका कारण प्रसूति गृहमा सेवा दिन कठिनाइ भएको बताए । उनका अनुसार स्वास्थ्य चौकीमा सुत्केरी गराउनका लागि प्रयोग गरिएका कपडालगायत अन्य सामग्री सफा गर्न समस्या भएको छ । खानेपानी योजनाका लागि पटकपटक बजेट बिनियोजन गरे पनि मर्मतको नाममा दुरुपयोग भएकाले खानेपानी समस्या जहाँको तही रहेको बन्गाडकुपिण्डे नगरपालिका–१२ का वडाध्यक्ष लालबहादुर घर्तीले बताए । उनका अनुसार स्थानीय तह गठनयता खानेपानी योजनाका लागि १९ लाख बजेट विनियोजन भइसकेको छ ।

प्रकाशित : मंसिर १५, २०७९ ०८:२२
प्रतिक्रिया
पठाउनुहोस्

अनुगमन छल्न औषधि पसल बन्द

अवधेशकुमार झा

राजविराज — औषधि व्यवस्था विभागबाट अनुगमन टोली आएको खबर पाएसँगै राजविराज क्षेत्रका औषधि पसल बन्द गर्दै सञ्चालक सम्पर्कविहीन बने । विभागको विराटनगरस्थित कार्यालयबाट अनुगमन टोली आएको सुनेपछि औषधि पसलेहरूको भागाभाग भएको हो । विभागको टोली मंगलबार साँझ अनुगमन गर्न पुगेको थियो ।

‘एक–दुई वटा पसल छिर्न नपाउँदै राजविराजका अधिकांश पसल बन्द भए,’ अनुगमन टोलीका प्रमुख फार्मेसी अधिकृत टेकेन्द्र मिश्रले भने, ‘अनुगमन टोली आउनेबित्तिकै पसल बन्द गरेर भाग्नुको मतलब राजविराजका औषधि पसलमा समस्या र विकृति छ ।’

पसल दर्ता भए–नभएको, गुणस्तरीय औषधि र भण्डारण राम्रो रहे–नरहेको र सरकारले प्रतिबन्धित गरेका औषधि राखेको लगायतका विषयमा छानबिन गर्न अनुगमन टोली आएको थियो । ‘पसलै बन्द गरेर सञ्चालक फरार भए ।

राजविराजका औषधि पसलहरूको अनुगमन गर्न सकेनौं,’ मिश्रले भने, ‘सोमबार पनि सप्तरीकै बोदेवरसाइनमा अनुगमन गरेकोले त्यहाँबाट सूचना चुहिएको हो ।’ उनले यहाँ पुनः अनुगमन गरिने बताए । स्रोतका अनुसार राजविराजमा रहेका अधिकांश औषधि पसलहरू मापदण्डविपरीतका छन् ।

यस्तै औषधि बिक्री गर्ने अनुमति पाएका भन्दा फरक व्यक्तिले पसल सञ्चालन गरिरहेकाले अनुगमनबाट डराएर सञ्चालक भागाभाग गरेको एक औषधि व्यवसायीले बताए ।

यसअघि पनि राजविराजमा औषधि पसल अनुगमन गर्न टोली आउँदा पसल बन्द गरेर भागाभाग भएको थियो । सञ्चालकमध्ये केहीले सँगै क्लिनिकसमेत राखेको र धेरैजसो क्लिनिकहरू मापदण्डविपरीत छन् । यसका अतिरिक्त राजविराजमा बग्रेल्ती खुलेका प्याथोलोजी सेन्टरहरूसमेत अनुमति नलिएका र मापदण्डविपरीतका छन् ।

‘अनुगमन गर्न आउँदा पसल बन्द गरेर भाग्दा सिल पनि गर्न मिल्दैन,’ मिश्रले भने, ‘अब प्रहरीसमेतको सहयोग लिएर अनुगमन गरिनेछ । मापदण्डविपरीत गर्नेलाई कारबाहीको दायरामा ल्याइनेछ ।’

प्रकाशित : मंसिर १५, २०७९ ०८:१७
पूरा पढ्नुहोस्
प्रतिक्रिया
पठाउनुहोस्
×