प्रत्यक्षमा एमाले शून्य, समानुपातिकमा पहिलो- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

प्रत्यक्षमा एमाले शून्य, समानुपातिकमा पहिलो

विप्लव महर्जन

सल्यान — एक प्रतिनिधिसभा र दुई प्रदेशसभा रहेको सल्यानमा भर्खरै सम्पन्न निर्वाचनमा प्रत्यक्षतर्फ हार व्यहोरेको एमाले समानुपातिकतर्फ भने पहिलो दल बनेको छ । सल्यानबाट एमाले उम्मेदवारलाई हराउँदै प्रतिनिधिसभामा एकीकृत समाजवादीका प्रकाश ज्वाला, प्रदेशसभा १ (१) मा माओवादी केन्द्रका भीमप्रकाश शर्मा र १ (२) मा कांग्रेसका सुरेश अधिकारी विजयी भए ।

जिल्लाका १० पालिकाको २ सय ५ केन्द्रमा खसेका मतगणना सकिएपछि मुख्य निर्वाचन कार्यालयले सार्वजनिक गरेको समानुपातिकतर्फको परिणामअनुसार एमालेले प्रतिनिधिसभाका लागि २२ हजार २ सय ५६ मत ल्याएको छ । माओवादी केन्द्रले २१ हजार ३ सय २५, कांग्रेसले १९ हजार ९ सय ६६ र एकीकृत समाजवादीले ५ हजार ९ सय ७० मत ल्याएको छ ।

यस्तै प्रदेशसभातर्फका दुवै क्षेत्रमा एमालेले २२ हजार ३ सय १९, माओवादी केन्द्रले २१ हजार २ सय ३१, कांग्रेसले १८ हजार ६ सय ४८ र समाजवादीले ८ हजार ४ सय २९ मत ल्याएको मुख्य निर्वाचन अधिकृतको कार्यालयले जनाएको छ । कार्यालयका अनुसार समानुपातिकतर्फ माओवादी केन्द्र दोस्रो र कांग्रेस तेस्रो भएका छन् ।

मुख्य निर्वाचन अधिकृत गिरिराज गौतमका अनुसार २ सय ५ मतदान केन्द्रमा प्रतिनिधिसभाका लागि ८४ हजार ७ सय ८९ र प्रदेशसभाका लागि ८२ हजार ९ सय ९८ मत खसेको थियो । खसेको कुल मतअनुसार प्रतिनिधिमा ६ हजार २ सय १५ र प्रदेशमा ६ हजार २ सय ३१ मत बदर भएको छ । उनका अनुसार प्रत्यक्षतर्फ पाँचदलीय गठबन्धनअन्तर्गत प्रतिनिधिसभामा विजयी भएका एकीकृत समाजवादीका प्रकाश ज्वालाले ३५ हजार ७ सय ल्याउँदा एमालेका राजेन्द्रवीर रायले १३ हजार २९ र स्वतन्त्र उम्मेदवार राजेन्द्रबहादुर शाहले १९ हजार ७ सय ८९ मत ल्याएका थिए ।

प्रदेशसभाअन्तर्गत १ (१) मा विजयी भएका माओवादीका भीमप्रकाश शर्माले २२ हजार २ सय ४३ र एमालेका उम्मेदवार कुलबहादुर गिरीले १४ हजार २ सय २५ मत पाए । १(२) मा विजयी भएका कांग्रेसका सुरेश अधिकारीले २० हजार ४ सय ८ मत ल्याउँदा एमालेले १६ हजार ६ सय १८ मत ल्याएका थिए ।

प्रकाशित : मंसिर ११, २०७९ ०८:४२
प्रतिक्रिया
पठाउनुहोस्

४० वर्षपछि गुप्ताको जित

मनोज पौडेल

कपिलवस्तु — कपिलवस्तुका पाका नेता मंगलप्रसाद गुप्ताले आठौं प्रयासमा जित हासिल गरेका छन् । कृष्णनगर–२ कृष्णनगरका ७७ वर्षीय गुप्ता एमालेबाट क्षेत्र नं. ३ को प्रतिनिधिसभा सदस्यमा विजयी भएका हुन् । गुप्ताले कांग्रेसका अभिषेकप्रताप शाहलाई पराजित गरे । उनले २० हजार ८ सय ५२ मत प्राप्त गरेका छन् भने शाहले १७ हजार ७ सय ८८ मत पाए । 


२०३९ सालमा गुप्ता तत्कालीन जिल्ला पञ्चायत सभापतिमा चुनाव लडेका थिए । दमाहा चुनाव चिह्न पाएका उनी पराजित भए । त्यसपछि २०४३ मा राष्ट्रिय पञ्चायत सदस्यदेखि निर्वाचन लड्न थालेका उनले बहुदलीय व्यवस्था हुँदै संघीय लोकतान्त्रिक व्यवस्थाका ६ वटा निर्वाचनमा पराजय भोग्नु पर्‍यो । तीन पार्टी परिवर्तन गरेर चौथो पार्टी एमालेबाट चुनाव जितेका हुन् । २०४३ मा सूर्य चुनाव चिह्न लिएर राष्ट्रिय पञ्चायत सदस्य लडेका उनी २४ हजार मत ल्याउँदै चौथो भए । ३६ वर्षपछि त्यही सूर्य चिह्न लिएर लडेका उनले विजयी भएका हुन् ।

२०२४ सालदेखि राजनीति थालेका गुप्ताले २०४८, २०५१ र २०५६ मा कांग्रेसबाट जिल्लाको तत्कालीन क्षेत्र नं. ४ बाट संसदीय निर्वाचन लडे । २०७० र २०७४ को चुनाव तमलोपा र मधेसी जनअधिकार फोरमबाट लडे । सबै निर्वाचनमा निकटतम प्रतिद्वन्द्वी बनेर चित्त बुझाउनुपर्‍यो । यसअघिका चुनावमा दोस्रो स्थानमा रहँदै आएकाले यसपटक आफ्नो जित निश्चित भएको उनले बताउँदै आएका थिए । उनी पञ्चायतकालमा पञ्चायत नीति तथा जाँचबुझ समिति सदस्य पनि भएका थिए । उनका साथीसंगी भगवानदास गुप्ता, राघवेन्द्रप्रताप शाह, हरिनारायण रजौरिया र दीपकुमार उपाध्यायले पटकपटक जितको स्वाद चाखे पनि उनले भने सधैं पराजय भोग्दै आएका थिए । ‘मंगल चाचाले लामो त्याग र संघर्ष गरेका थिए,’ स्थानीय मनीषमंगल बनियाँले भने, ‘जनताले बल्ल न्याय गरे ।’ उनी गत वर्षको पुस ६ मा एमाले प्रवेश गरेका थिए । ‘मेरो व्यक्तिगत १५/१६ हजार मत थियो,’ उनले भने, ‘त्यसमा मजबुत संगठन भएको एमाले पार्टी मसँग रह्यो ।’ साढे पाँच दशक लामो राजनीतिको अनवरत यात्रामा रहेका गुप्ता युवा, मजदुर र कृषकका अधिकारका लागि लड्दै आएका छन् । ‘जनताले परिवर्तनको अनुभूति चाहेका थिए,’ उनले भने, ‘त्यसै कारण मेरो जित भएको हो ।’

प्रकाशित : मंसिर ११, २०७९ ०८:३६
पूरा पढ्नुहोस्
प्रतिक्रिया
पठाउनुहोस्
×