जिल्ला बाहिरबाट फर्किने मतदाता घटे- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

जिल्ला बाहिरबाट फर्किने मतदाता घटे

कालीकोटका करिब २० प्रतिशत मतदाता जिल्ला बाहिर रहेको निर्वाचन कार्यालयको अनुमान
तुलाराम पाण्डे

कालीकोट — दसैं–तिहारको बिदामा नातिनातिनीसहित घर आएकी कालीकोट खाडाचक्र–३ ताडीका रेसमा पाण्डे कात्तिक १४ गते विद्यालय खुलेपछि सुर्खेत गइन् । नातिनातिनी पढाउन एक वर्षदेखि सुर्खेत बस्दै आएकी ६२ वर्षीया रेशमालाई वैशाखको स्थानीय चुनावमा उम्मेदवारले गाडीको व्यवस्था गरेर सुर्खेतबाट भोट हाल्न कालीकोट ल्याए पनि यस पटक कसैले वास्ता नगरेकाले फर्किनन् ।

‘आफ्नो खर्च गरेर अरूलाई भोट हालेर क्या पाइन्या छ ?,’ उनले उनले भनिन्, ‘गाउँको चुनावमा त आफन्तलाई भोट दिन आए, अहिले कसैले बोलाएनन् किन आउनू ?’ उनका छोराबुहारी पनि ज्याला मजदुरीका लागि भारतको बैंग्लोर छन् । उनीहरू वैशाखमा पनि घर फर्किएनन् ।

खाडाचक्र–४ का सामाजिक अभियन्ता बाले विश्वकर्माकी पत्नी छविता विश्वकर्मा पनि सुर्खेतमै छिन् । वैशाखमा गाउँमा भोट हालेकी विश्वकर्मा दसैंतिहार मनाएर सुर्खेत पढ्ने ३ छोराछोरीको रेखदेख गर्न सुर्खेत झरेकी थिइन् । ‘यहाँ केटाकेटीलाई रेखदेख गर्ने कोही छैन,’ उनले भनिन्, ‘बच्चाबच्ची लिएर जान गाडी पनि सहजै पाइएन, यसपालि मत हाल्न नपाइने भयो ।’ रेशमा र छबिता मात्र होइन । यस पटक जिल्ला बाहिर रहेका अधिकांश मतदाता घर फर्किएका छैनन् । कालीकोटका करिब २० प्रतिशत मतदाता जिल्लाबाहिर रहेको जिल्ला निर्वाचन कार्यालयको अनुमान छ ।

हिउँद लागेकाले पनि मौसमी बसाइँसराइ गर्न, कामको खोजी, अध्ययनलगायत कामले घर छाड्नेको संख्या धेरै रहेको नागरिक अगुवा नमराज योगीले बताए । उनका अनुसार यस पटकको चुनावमा जिल्ला सदरमुकाम मान्म भएका पनि गाउँ फर्किएका छैनन् । ‘यो चुनाव स्थानीय तहको जस्तो नहुने रहेछ,’ नरहरिनाथ–५ रुप्सामा मतदाता नामावली भएकी जयाकुमारी बोगटीले भनिन् ‘स्थानीय तहको चुनावमा त घर आउ भनेर पालिकाका प्रमुख, उपप्रमुख, वडाध्यक्ष, सदस्यलगायत सबै उम्मेदवारले भन्थे, यस पटक कसैले भनेनन् ।’

यहाँका विकट बस्तीका केही मतदाताहरू ज्याला मजदुरीका लागि भोट नहालेरै दसैतिहार मनाएलगत्तै भारत गइसकेका छन् । घरमा भएकामा पनि उत्साह छैन । ‘कसलाई भोट हालेर के पाइने हो ?,’ दाहा घरभएकी जयलक्ष्मी शाहीले भनिन्, ‘आफ्ना दुःख सधैं उस्तै हुन् ।’ यहाँको पलाता, पचालझरना, तिलागुफालगायत स्थानीय तहका ज्याला मजदुरी गरेर परिवार पाल्ने २० देखि ३० प्रतिशत मतदाता घरमा छैनन् । चुनावका लागि भनेर फर्किने पनि न्यून भएको जिल्ला ट्राफिक प्रहरी कार्यालयले जनाएको छ ।

चुनाव चिसो सिजनमा हुनु, ज्याला मजदुरीका लागि मौसमी बसाइँसराइ गर्ने संख्या अत्यधिक हुनु, अध्ययन, रोजगारीलगायत अवसरको खोजीमा घर छाडेकाहरू नफर्किनुले मत कम खस्ने अनुमान छ । संघ र प्रदेश सदस्यबाट जनताको धेरै अपेक्षा नहुनुजस्ता कारणले यसपल्ट स्थानीय निर्वाचनभन्दा कम मत खस्ने अनुमान गरिएको मानवअधिकारकर्मी कालीबहादुर मल्लले बताए ।

कालीकोटमा पनि सबै मतदान केन्द्रलाई सुरक्षा आकलनसहित वर्गीकरण गरी सुरक्षा व्यवस्था कडा पारिएको छ । ‘मतदाताले ढुक्क भएर मतदान गर्न गए हुन्छ,’ प्रमुख जिल्ला अधिकारी रामहरि शर्माले भने, ‘सुरक्षाको पूर्ण व्यवस्था गरिएको छ ।’ कालीकोटका १ सय २४ मतदान केन्द्रमध्ये जिल्ला सुरक्षा समितिले ७४ वटा मतदान केन्द्रलाई अति संवेदनशील, ३६ लाई संवेदनशील र १४ वटालाई सामान्य वर्गीकरण गरी म्यादी, नेपाल प्रहरी, सशस्त्र र नेपाली सेना परिचालन गरेको छ । जिल्ला प्रशासन कार्यालयका अनुसार निर्वाचन सुरक्षाका लागि १ हजार २५ म्यादी, ५ सय ८ जनपद प्रहरी, २ सय १५ सशस्त्र प्रहरी र ३ सय ५० जना नेपाली सेना गरी २ हजार १ सय ३ सुरक्षाकर्मी परिचालित छन् । ९ वटा स्थानीय तह रहेको कालीकोटमा एक प्रतिनिधिसभा सदस्य र दुई प्रदेशसभा सदस्यका लागि १७ उम्मेदवार चुनावी मैदानमा छन् ।

जिल्लाका सबै मतदान केन्द्रमा मतदान टोली पुगेर सर्वदलीय बैठकको आयोजना गरेर निर्वाचन आचारसंहिता मतदाता सुरक्षा र मतदानको बारे सहमति गरेर सहयोग गर्ने वातावरण सिर्जना गरिएको मुख्य निर्वाचन अधिकृत भरत लम्सालले बताए ।

प्रकाशित : मंसिर ४, २०७९ ०९:४६
प्रतिक्रिया
पठाउनुहोस्

सुगम रुटका ५ वटा वायुसेवाका सबै उडान बन्द 

सुरज कुँवर

काठमाडौँ — निर्वाचनका कारण यात्रुको बुकिङ नभएपछि काठमाडौं र उपत्यकाबाहिरबाट हुने सुगम क्षेत्रका सबै उडान बन्द भएका छन् ।  त्रिभुवन अन्तर्राष्ट्रिय विमानस्थलका महाप्रबन्धक प्रेमनाथ ठाकुरका अनुसार, सुगम रुटमा उडान गर्दै आएका प्रमुख वायुसेवा बुद्ध, तारा, श्री, सौर्य र गुण एयरलायन्सले आइतबार भद्रपुर, विराटनगर, राजविराज, जनकपुर, सिमरा, भरतपुर, भैरहवा, नेपालगञ्ज, धनगढी, सुर्खेत, पोखरा र तुम्लिङटारमा उडान राखेनन् ।

काठमाडौंबाहिरका रुटमा हुने अन्तरप्रदेश उडान पनि निर्वाचनका कारण स्थगन भएका छन् । उनका अनुसार, पर्यटकीय गन्तव्य लुक्लाका लागि भने तारा, समिट र सीता एयरले भने पर्यटकहरु ओसार्न १५ वटा उडान राखेका छन् । आइतबार दुगर्ममा रामेछाप, लुक्ला र काठमाडौं रुटमा मात्रै उडान हुँदैछ ।

दैनिक दुइतर्फी १ सय २६ वटा उडान गर्ने बुद्द एयरले आइतबार कुनै पनि उडान राखेको छैन । ‘चुनाव भएकाले प्राय: हरेक सुगम रुटमा हिजो बेलुकीसम्म २–४ जना यात्रुको मात्रै बुकिङ थियो । ती पनि विदेशबाट आउने यात्रुहरु रहेछन,’ बुद्धका एक अधिकारीले भने,‘निर्वाचन आयोगले उडान नै बन्द गराएको थिएन । तर, थोरै यात्रु उडाउनुभन्दा आइतबारका सबै उडान नै बन्द गर्‍यौं ।’

१६ वटा विमानबाट दैनिक कम्तीमा ६ हजार यात्रु उडाउने बुद्द आन्तरिक उडानमा सबैभन्दा धेरै यात्रु ओसार्ने वायुसेवा हो । उसले आइतबार उडान नहुने भएपछि काठमाडौं बाहिर रहने (नाइट–स्टप) कुनै पनि जहाज राखेको छैन । यसैबीच दैनिक दुईतर्फी ५६ हाराहारी उडान गर्दै आएको दोस्रो वायुसेवा यति एयरलायन्सले पनि निर्वाचनका कारण सबै उडान राकेको जनाएको छ ।

त्यस्तै दैनिक दुईतर्फी २८ हाराहारी उडान गर्दै आएको गुण, २२ हारहारी उडान गर्दै आएको श्री र १८ हाराहारी उडान गर्दै आएको सौर्यले पनि न्यून बुकिङ र निर्वाचनका कारण आइतबार सबै उडान बन्द गरेका छन् । श्रीका प्रवक्ता अनिल मानन्धरले उडान नभए पनि तीनवटा जहाज धनगढी, नेपालगन्ज र विराटनगर विमानस्थलमा राखिएको जनाएको छ । दुईटा ट्विनअटर ग्राउन्डेड भएका कारण ध्वजावाहक नेपाल वायुसेवा निगमले आइतबारका लागि विमानस्थलमा उडान तालिका नै बुझाएको छैन ।

त्यस्तै आइतबार अन्तर्राष्ट्रियतर्फ भने काठमाडौंका लागि ४० वटा उडान हुँदैछन् ।

प्रकाशित : मंसिर ४, २०७९ ०९:४३
पूरा पढ्नुहोस्
प्रतिक्रिया
पठाउनुहोस्
x
×