२५.१२°C काठमाडौं
हुम्ला — हुम्लाको चंखेली गाउँपालिका–६ को मेलछाममा आइतबार साँझ गएको पहिरोमा परी सख्त घाइते भएका घाइतेहरूको उद्धारका लागि सुर्खेतबाट आएको नेपाली सेनाको हेलिकप्टर अवतरण गर्न नसकेपछि कालिकोटबाटै फर्किएको छ ।
कालिकोटबाट बाजुरा हुँदै हुम्ला जाने क्षेत्रको हवाइ रुटमा खराब मौसम हुँदा हुम्ला जिल्लाका विभिन्न ठाउँमा पहिरोका कारण भएका घाइतहरूको उद्धारका लागि सुर्खेतबाट उडेको हेलिकप्टर खराब मौसमका कारण हुम्ला आउन नसकेर कालिकोटबाटै फिर्ता भएको हुम्लाका प्रमुख जिल्ला अधिकारी सीता परियारको बताइन् ।
पहिरोमा परी घाइते हुनेमा ३८ वर्षीय देउच्या सार्की, ३६ वर्षीया अंगती सार्की, १४ वर्षीया मनिका सार्की, १२ वर्षीया निरुता सार्की र ३ वर्षीय तवेन्द्र सार्की रहेका छन् ।
पहिरोबाट घाइते भएकामध्ये एक जनाको अवस्था गम्भीर भएकाले उद्धारका लागि सुर्खेतबाट उडेको हेलिकप्टर खराब मौसमका कारण हुम्ला आउन नसकेको प्रजिअ परियारले बताइन् ।
आइतबार राति पहिरोमा घर पुरिएर चंखेली गाउँपालिका –६ को मासीधारा गाउँको देनबाडामा एउटै परिवारका ४ सदस्यको मृत्यु भएको छ । सदरमुुकाममा बिजुली, इन्टरनेट र मोबाइलको नेटवर्क नहुँदा घटनाबारे यकिन विवरण लिन समस्या भएको प्रजिअ परियारले बताएकी छन् ।
प्रकाशित : आश्विन २४, २०७९ २०:४५
