दसैं मनाउन घर फर्कनेको लर्को- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

दसैं मनाउन घर फर्कनेको लर्को

‘वर्ष दिनमा एकपल्ट मनाइने चाड छोड्न मनै लाग्दैन’
राजबहादुर शाही

मुगु — सोरु गाउँपालिका–४, का दीपबहादुर शाही परिवारसँग दसैं मनाउन भारतको लद्दाकबाट घर आइपुगेका छन् । साउनमा मजदुरीका लागि भारत गएका उनीसहित १२ युवा मंगलबार घर फर्किए ।


सोरु गाउँपालिका–६, सोरुकोटका पन्नबहादुर शाही पनि दसैंका लागि मलेसियाबाट घर फर्किएका छन् । यी दुई मात्र होइन, यहाँका विभिन्न गाउँमा दसैं मनाउन जानेको लर्को लागेको छ । जिल्लाबाहिर र सदरमुकाममा कामविशेषले बस्दै आएकासमेत दसैं मनाउन घर फर्किरहेका छन् । भारत, खाडी मुलुक, मलेसियामा मजदुरीका लागि गएका स्थानीयसमेत धमाधम घर फर्किरहेका छन् । दसैंका लागि जहाज र गाडीबाट घर फर्कनेको लर्को लागेको छ ।

सदरमुकाम गमगढीमा घर फर्कने र किनमेल गर्नेको घुइँचो छ । दसैंमा घर आउनेको चापले रारा विमानस्थलमा उडान बढाइएको छ । कर्णाली राजमार्ग हुँदै विभिन्न जिल्लामा सञ्चालन हुने यात्रुवाहक गाडीको संख्या थपिएको छ । फोतु गाउँका मंगल शाहीले दसैं मनाउन मात्रै गाउँ आएको बताए । ‘वर्ष दिनमा एकपल्ट मनाइने चाड छोड्न मनै लाग्दैन,’ उनले भने, ‘दसैंको रौनक गाउँघरमा सुरु भइसकेको छ ।’

अध्ययन, व्यापार, जागिरलगायत कारण जिल्ला सदरमुकाम बस्दै आएका स्थानीयसमेत पुर्ख्यौली गाउँ जान थालेका छन् । दसैंका लागि विभिन्न गाउँमा लाग्ने मेला र खेलकुदको तयारी छ । गमगढीका पदमबहादुर रावलले जेठ/असारमा लेकका पशुचौपाया चराउन उक्लिएका स्थानीयसमेत झर्न थालेको बताए । गोठाला घर आउन थालेपछि लेकाली बस्तीका भेडीगोठ रित्तिएका छन् ।

अन्नबाली थन्क्याउँदै स्थानीयवासी दसैंको तयारीमा लागेका छन् । औलका विभिन्न बस्तीमा धान बाली भित्र्याइसकिएको छ । माथिल्ला भेगमा मकै, कोदो, सिमी, फापर भित्र्याउने चटारो सुरु भएको छ । लेकका बासिन्दा अन्न बाली भित्र्याएर दसैंका लागि तयारी गर्दै छन् । यस वर्ष दसैंमा तिब्बतबाट भेडाच्याङ्ग्रा नआएकाले गाउँमा खसी किन्नेको भीड बढ्न थालेको छ । अधिकांश व्यापारिक केन्द्रमा उपभोग्य सामग्री, लत्ताकपडालगायत किनमेलको चाप बढेको छ ।

जिल्लाको चार स्थानीय तहमध्ये मुगुमकार्मारोङ गाउँपालिकाका करिब ९० प्रतिशत बौद्ध धर्मावलम्बी भएकाले त्यहाँ दसैंको चहलपहल छैन । अन्य तीन स्थानीय तहमा दसैंको चहलपहल सुरु भइसकेको छ । घर सरसफाइ र लिपपोतको काममा स्थानीय खटिएका छन् ।

प्रकाशित : आश्विन १६, २०७९ ०८:२२
प्रतिक्रिया
पठाउनुहोस्

बजार सुनसान

कमल पन्थी

बर्दिया — कपडादेखि दैनिक उपभोग्य सामान खरिद गर्नेको भीड लाग्ने बर्दियाका विभिन्न बजार अहिले सुनसान छन् । दसैंको व्यापारले भ्याइनभ्याइ हुने व्यापारी पनि फुर्सदिला बनेका छन् । 


गुलरियाका फेन्सी व्यवसायी मैयुन अहम्मदले गत वर्षहरूको तुलनामा यस वर्षको दसैं बढी सुनसान भएको बताए । ‘अहिले त निकै भीडभाड हुने बेला हो,’ उनले भने, ‘तर, दिनमा दुई/चार जना ग्राहक पनि आउँदैनन् ।’ बारबर्दियास्थित जयनगरका मोबाइल व्यवसायी सुनील चापागाईंले पनि दसैंमा कारोबार निकै कम भएको बताए ।

सदरमुकामसँगै ग्रामीण क्षेत्रका दसैं बजारमा किनमेल गर्नेको संख्या पनि घट्दै गएको छ । किराना पसलमा पनि सामान खरिद गर्ने घटिसकेको व्यवसायी बताउँछन् ।

सीमावर्ती क्षेत्रमा हालै सञ्चालनमा आएको लौकाही बजारमा जिल्लाका सयौं मानिस किनमेलका लागि जाने गरेपछि यहाँका बजार सुनसान भएको हो । अवैध नाकाबाट घरायसी सामानका नाममा सयौं मानिस किनमेलमा गएपछि यसलाई रोक्न स्थानीय प्रशासनसँग आग्रह गरेको उद्योग वाणिज्य संघ गुलरियाका अध्यक्ष देवेन्द्र पाण्डेले बताए ।

बारबर्दिया–४ का गोपाल थारूले १ सय मूल्यमा पाइने सामान यहाँ ५ सय लिएपछि बाध्य भएर भारतीय सीमावर्ती बजार जाने गरेको सुनाए । ‘यहाँका व्यापारीले महँगोमा सामान बिक्री गरेकाले सस्तोमा सामान किन्न लौकाही र बलैगाउँ बजार पुग्ने गरेका छौं,’ उनले भने ।

सीमावर्ती लौकाहीसँग जोडिएको नेपाली भू–भाग गणेशपुरमा छोटी भन्सार नहुँदा यहाँका ग्राहकले सहजै भारतबाट सामान ल्याउने गरेका छन् ।

प्रकाशित : आश्विन १६, २०७९ ०८:२१
पूरा पढ्नुहोस्
प्रतिक्रिया
पठाउनुहोस्
×