अधिकार माग्दै बालबालिका- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

अधिकार माग्दै बालबालिका

तुलाराम पाण्डे

तिलागुफा, कालीकोट — बालबालिकामा लगानी वृद्धि गरी बालअधिकार सुनिश्चित गर्न कालिकोटमा आयोजित बाल कचहरीका सहभागीले जोड दिएका छन् । बालबालिकाविरुद्ध हुने हिंसा अन्त्यका लागि नगर उपप्रमुखसँग बालबालिका कार्यक्रमअन्तर्ग‍त बाल कचहरीका सहभागीले बालबालिकाविरुद्ध हुने सबैखाले हिंसा कम गर्न लगानी वृद्धि हुनुपर्नेमा जोड दिएका हुन् । 


कार्यक्रममा तिलागुफा ६ जुविथाकी १५ वर्षीया जानकी शाहीले विद्यालयमा महिनावारी हुँदा प्याड फेर्नकै लागि दिउँसो घर जानुपर्ने बाध्यता रहेको सुनाउँदै नगरले बालबालिकाको शिक्षा, सुरक्षा र संरक्षणमा लगानी गर्नुपर्ने बताइन् । ‘विद्यालयमा व्यवस्थित खानेपानी, छात्रामैत्री शौचालयको अभाव छ; कहिले पूरा हुन्छ ?’ तिलागुफाका नगर उपप्रमुख महेन्द्रबहादुर शाहीको सहभागितामा आयोजित बाल कचहरीमा जानकीले सोधिन्‚ ‘नगरको बजेट सडकमा मात्र केन्द्रित हुने कहिलेसम्म ?’

बालअधिकार सबैको सरोकार भन्ने नारालाई व्यवहारमा उतार्न बालबालिकाको क्षमता विकास, अर्थपूर्ण सहभागिता र घर तथा विद्यालयका आधारभूत आवश्यकता पूरा गर्न स्थानीय सरकार चुकेको अर्का बालक दीपेन्द्र शाहीले दाबी गरे ।

कार्यक्रममा उपस्थित बालबालिकाहरूले बालविवाह अन्त्य गर्ने विषयमा बेवास्ता गरेको बताए । नागरिक सवलीकरण परियोजनाको सहयोगमा आयोजित बाल कचहरीमा यहाँका सरोकारवालाले नगरपालिकाले बालबालिकाको अधिकार संरक्षणका लागि बजेट विनियोजन गरेर खर्च गर्ने प्रतिबद्धता जनाए ।

तिलागुफामा बालविवाह, बाल श्रम, बालबालिकाको ओसारपसार, बालहिंसा, छोराछोरीमा लैगिंक विभेद कायमै रहेको सुनाउँदै त्यसको अन्त्यका लागि आवश्यक नीति र कार्यक्रमसहित योजना बनाइने नगर उपप्रमुख शाहीले बताए ।

प्रकाशित : आश्विन १५, २०७९ १७:३८
प्रतिक्रिया
पठाउनुहोस्

विभिन्न दुर्घटनामा वाग्मती प्रदेशभर सात जनाको मृत्यु

सुवास विडारी

मकवानपुर — वाग्मती प्रदेशका पाँचवटा जिल्लामा भएको विभिन्न दुर्घटनामा ६ जनाको मृत्यु भएको छ । शुक्रबार नुवाकोटमा २ जना, मकवानपुर, सिन्धुली, धादिङ र चितवनमा एक/एक जनाको मृत्यु भएको वाग्मती प्रदेश प्रहरी कार्यालयले जनाएको छ ।


नुवाकोटको शिवपुरी गाउँपाकिला–६, फेदीगाउँमा करेन्ट लागेर एक जनाको मृत्यु भएको छ । घर पोत्ने क्रममा शुक्रबार साँझ ७ बजेर ३० मिनेटको समयमा करेन्ट लागेर ६५ वर्षीय ईन्द्रबहादुर पाठक गम्भीर घाइते भएका थिए । काठमाडौंको बीपी अस्पतालमा उपचारको क्रममा पाठकको मृत्यु भएको प्रहरीले जनाएको छ ।

मकवानपुर जिल्लाको बकैया गाउँपालिका–५, तीनतलेमा सवारी दुर्घटना हुँदा एक जनाको मृत्यु भएको छ । धरान–चतराअन्तर्गत हेटौंडाबाट जुरेलीतर्फ जाँदै गरेको ना ७ त ५०७२ नम्बरको खाली ट्याक्टरमा सवार बकैया–५, श्रीपुरका २३ वर्षीय सुमन लो गुडिरहेको ट्याक्टरबाट अचानक खसेका थिए । ट्याक्टरबाट खसेरका लोलाई पछाडिको टेलरको चक्काले किचेर गम्भीर घाइते भएका थिए । लोलाई उपचारका लागि हेटौंडा अस्पताल पुर्‍याइएको थियो । अस्पतालमा उपचारको क्रममा लोको बिहान ११ बजेर ३० मिनेटको समयमा मृत्यु भएको प्रहरीले जनाएको छ ।

धादिङको थाक्रे गाउँपालिका–४, लितिपोखरीमा डुबेर एक जनाको मृत्यु भएको छ । शुक्रबार दिउँसो ३ बजेर ४० मिनेटको समयमा पोखरीमा डुबेर बेहोस भएका १४ वर्षीय सञ्जय गोलेको उद्धार गरी उपचारका लागि काठमाडौंस्थित त्रिवि शिक्षण अस्पताल पठाइएको थियो । उपचारको क्रममा गोलेको मृत्यु भएको हो ।

सिन्धुलीको घ्याङलेख गाउँपालिका–४, सिम हायुटारमा चट्याङ लागेर एक जनाको मृत्यु भएको छ । आफ्नै घरमा रहेको धान कुट्ने मिल चलाइरहेका ६८ वर्षीय जीतबहादुर लोलाई शुक्रबार दिउँसो ४ बजेर ५० मिनेटको समयमा चट्याङ लागेको थियो । चट्याङ लागेर लोको घटनास्थलमै मृत्यु भएको प्रहरीले जनाएको छ ।

चितवनको रत्ननगर नगरपालिका–२, सुब्बाचोकमा टाँडीबाट सुब्बाचोकतर्फ जाँदै गरेको ना.४८ प ४५८४ नमबरको मोटरसाइकल र जयमंगलाबाट खानेपानी ट्याङ्कीतर्फ बाटो क्रस गर्दै गरेको बा १७ च ७७७७ नम्बरको कार एक–आपसमा ठोक्किएर दुर्घटना भएको थियो । दुर्घटनामा परी मोटरसाइकल चालक रत्ननगर–१४, लौरीघोलका ५१ वर्षीय रामबहादुर गुरुङ र मोटरसाइकलमा पछाडि बसेर यात्रा गरिरहेका गुरुङकी पत्नी ४० वर्षीया सुमित्रा गुरुङ घाइते भएका थिए । घाइते सुमित्राको नयाँ मेडिकल कलेज भरतपुरमा उपचारको क्रममा बिहान १० बजेर ५५ मिनेटमा मृत्यु भएको प्रहरीले जनाएको छ ।

नुवाकोट जिल्लाको विदुर नगरपालिका–१३, डाँडाटोलमा ५४ वर्षीय कृष्णे दमाई आफ्नै घरमा झुन्डिएर मृत्यु भएको अवस्थामा भेटिएका थिए । शुक्रबार दिनको ४ बजेको समयमा उनी मृत फेला परेका हुन् ।

प्रकाशित : आश्विन १५, २०७९ १७:२७
पूरा पढ्नुहोस्
प्रतिक्रिया
पठाउनुहोस्
×