सल्यानका सात स्थानमा दसैं-तिहार लक्षित नागरिक सहायता कक्ष- कर्णाली - कान्तिपुर समाचार

सल्यानका सात स्थानमा दसैं-तिहार लक्षित नागरिक सहायता कक्ष

सुरक्षामा कडाइ
विप्लव महर्जन

सल्यान — दसैं-तिहारलाई लक्षित गरेर सल्यानका सात स्थानमा नागरिक सहायता कक्ष स्थापना गरिएको छ । चाडपर्वमा घर फर्कने र बाहिर जाने यात्रुलाई आउजाउमा सहज होस् भन्ने उद्देश्यका साथ जिल्ला प्रहरी कार्यालय र ट्राफिक कार्यालय सल्यानले आइतबारदेखि नागरिक कक्ष स्थापना गरेका हुन् । 


जिल्लाको शारदा नगरपालिकाको श्रीनगर, खलंगा, बन्गाड कुपिन्डे नगरपालिकाको सल्लीबजार, बाग्चौर नगरपालिकाको थारमारे, सिमखोली, कपुरकोट गाउँपालिकाको कपुरकोट, त्रिवेणी गाउँपालिकाको लुहाममा स्थापना गरिएको जिल्ला प्रहरी कार्यालय सल्यानका प्रहरी नायव उपरीक्षक दीपेन्द्र केसीले बताए । नागरिक सहायता कक्षमा प्रहरी, ट्राफिक मिलेर बसी बाहिरबाट आउजाउ गर्ने र घर फर्कने यात्रु तथा बटुवालाई सहयोग गर्ने उनले जानकारी गराए ।

उनका अनुसार दसैं-तिहारको समयमा विशेष यात्रुको चाप बढी हुने भएकाले सवारी दुर्घटना बढी हुने गरेको छ । नागरिक सहायता कक्षमा कार्यरत सुरक्षाकर्मीले दुर्घटना न्यूनीकरणसम्बन्धी सवारी चालकलाई विभिन्न सचेतना गराउने छन् । गाडीको सिट क्षमताभन्दा बढी यात्रु तथा सामग्री हाल्न रोक लगाउने बताइएको छ ।

सुरक्षाकर्मीले सवारी अभावमा लामो समयसम्म अलपत्र परेका यात्रुलाई गाडीको व्यवस्था मिलाई घरसम्म पठाउन सहजीकरण गर्ने उनले जानकारी गराए । ‘घर फर्कने, बाहिर जानेले हतारहतार गर्दा सामान छुटाउने, हराउने समस्या बढी हुने गर्छ । नागरिक सहायता कक्षमा कार्यरत सुरक्षाकर्मीले हराएका तथा गाडीमा छुटेका सामग्री सम्बन्धित व्यक्तिलाई उपलब्ध गराउन थप सहजीकरण गर्ने छन्‚’ उनले भने ।

जिल्लामा दसैं-तिहारको समयमा विगतमा धेरै ठूला दुर्घटना भएकाले दुर्घटना न्यूनीकरण गर्न नागरिक सहायता कक्षमा कार्यरत सुरक्षाकर्मीले महत्त्वपूर्ण भूमिका निर्वाह गर्ने प्रमुख जिल्ला अधिकारी विपीन आचार्यले बताए । दुर्घटना न्यूनीकरण गर्न सिट क्षमताभन्दा बढी यात्रु तथा सामग्री राख्न रोक लगाउने उनले जानकारी गराए ।

नजिकिँदै गरेको दसैं-तिहारमा मदिरा सेवन गरी होहल्ला बढी गर्ने, जुवातास खेल्ने तथा चोरीको जोखिम उत्तिकै बढ्ने भएकाले सुरक्षामा कडाइ गरिएको प्रजिअ आचार्यले जानकारी गराए । ‘आइतबारदेखि चौबिसै घन्टा जिल्लाभरि सुरक्षागस्तीको व्यवस्था गरिएको छ । सुरक्षाकर्मी पहिलाभन्दा दोब्बर परिचालन गरिएको छ । एक ग्रुपमा ५/६ जना हुने छन्‚’ उनले भने ।

प्रकाशित : आश्विन ९, २०७९ ११:०६
प्रतिक्रिया
पठाउनुहोस्

नेपालका शैक्षिक संस्थाहरू बेरोजगार उत्पादन गर्ने कारखाना : सिंह

कान्तिपुर संवाददाता

काठमाडौँ — कांग्रेस नेता प्रकाशमान सिंहले नेपालका शैक्षिक संस्थाहरू बेरोजगार उत्पादन गर्ने कारखाना भएको बताएका छन् । आइतबार काठमाडौंमा आयोजित एक कार्यक्रममा नेता सिंहले शिक्षालाई वर्तमान अवस्थामा आवश्यक प्रविधिसँग जोडेर अघि बढाउन जरुरी रहेको बताएका हुन् ।

१२ कक्षा पास भइसक्दा आफ्नो खुट्टामा नै उभिन सक्षम, आर्थिक रूपमा सबल हुन सक्ने, सीप बोकेको विद्यार्थी उत्पादन गर्नुपर्ने सिंहको भनाइ छ । आगामी शैक्षिक नीतिमा विद्यार्थीहरूलाई विद्यालयबाट बाहिर निस्किँदा क्षमतावान बनाउने कुरा समावेश हुने उनले दाबी गरे ।

नेता सिंहले भने, ‘नेपालका शैक्षिक संस्थाहरु बेरोजगार उत्पादन गर्ने कारखाना बनेका छन् । त्यसैले अहिले शिक्षालाई हामीले वर्तमान अवस्थामा आवश्यक प्रविधिसँग जोडेर शिक्षलाई अघि बढाउनु पर्छ । १२ कक्षा पास भइसक्दा आफ्नो खुट्टामा नै उभिन सक्षम, आर्थिक रुपमा सबल हुनसक्ने, सीप बोकेको विद्यार्थी उत्पादन गर्नुपर्छ । नेपालको शिक्षाको गुणस्तरमा सुधार गर्नुपर्छ, बेरोजगारको समस्यालाई समाधान गरी विद्यार्थीहरुलाई विद्यालयबाट बाहिर निस्किँदा क्षमतावान बनाउनुपर्छ भन्ने नीति आउने नीतिमा जोड दिनेछौँ ।’

त्यस्तै सिंहले आगामी निर्वाचनमा कांग्रेसलाई देशको नेतृत्व गर्ने जिम्मेवारी दिए संघीयतालाई कार्यान्वयन गरेर देखाउने दाबीसमेत गरे । संविधान जारीपछिको दोस्रो आम निर्वाचन भनेको संघीयतालाई कार्यान्वयन गर्ने भएकाले जिम्मेवारी दललाई देशको नेतृत्व गर्ने अवसर जनताले प्रदान गर्नुपर्ने उनको भनाइ छ ।

उनले भने, ‘संविधान जारीपछिको दोस्रो आम निर्वाचन भनेको संघीयतालाई कार्यान्वयन गर्ने हो, कांग्रेसले मौका पायो भने संघीयतालाई कार्यान्वयन गरेर देखाउँछौँ । केन्द्रिकृत एकात्मक व्यवस्था र संघीयतामा के फरक छ भन्नेकुरा जनताले महसुस हुनेगरी काम गर्छौं । सुशासनको समस्यालाई हल गर्नेछौँ ।’

नेता सिंहले राजनीति समाजसेवा गर्ने माध्यम भएको उल्लेख गर्दै हरेक वडामा स्वास्थ्य क्लिनिक हुनुपर्ने बताए ।

प्रकाशित : आश्विन ९, २०७९ ११:०३
पूरा पढ्नुहोस्
प्रतिक्रिया
पठाउनुहोस्
×