चाडमा ४ हजार सुरक्षाकर्मी परिचालन- कर्णाली - कान्तिपुर समाचार

चाडमा ४ हजार सुरक्षाकर्मी परिचालन

कान्तिपुर संवाददाता

वीरेन्द्रनगर — दसैं, तिहार, छठलगायत पर्व नजिकिएसँगै कर्णाली प्रदेश प्रहरीले विशेष सुरक्षा योजना बनाएको छ । चाडपर्वमा उत्पन्न हुन सक्ने सुरक्षा चुनौतीलाई लक्षित गरी आइतबारदेखि लागू हुने गरी प्रहरीले योजना बनाएको हो ।

योजनाअनुसार चाडपर्वमा ४ हजार बढी सुरक्षाकर्मीदेखि कुकुरसम्म परिचालन गर्ने योजना छ । कार्यालयले चाडपर्व सुरक्षा योजना–२०७९ जारी गर्दै प्रदेशभरका १० जिल्लामा चार हजार एक सय ४१ जना सुरक्षाकर्मी खटाएको हो ।

प्रदेश प्रहरी कार्यालयका प्रवक्ता एसएसपी माधव श्रेष्ठका अनुसार प्रहरीले सुरक्षाकर्मी र तालिम प्राप्त कुकुर परिचालनदेखि मोवाइल गस्ती, तत्काल समस्याको सम्बोन गर्ने क्यूआरटी (क्विक रेस्पोन्स टिम) टिम परिचालन गर्दै यात्रुको सहजताका लागि सहायता कक्ष स्थापनासम्मको योजना बनाएको छ । ‘सुरक्षा व्यवस्था कडा बनाइएको छ,’ प्रवक्ता श्रेष्ठले भने, ‘प्रदेशका १२५ स्थानमा तत्काल सम्बोधनका लागि क्यूआरटी परिचालन गरिने छ ।’

चाडपर्वका बेला हुने चोरी, डकैती, लुटपाट र आपराधिक क्रियाकलापलाई रोक्न प्रहरीले कडा नीति लिएको छ । आपराधिक गतिविधि हुन सक्ने विभिन्न संवेदनशील स्थान तथा सीमा नाकाहरूमा कुकुरसहित चेकिङको टोलीको व्यवस्था मिलाइएको छ ।

चाडपर्वको समयमा यात्रुलाई ठग्ने, लागूऔषध, विस्फोटक पदार्थ जस्ता वस्तु ओसारपसार गर्ने गिरोहको बिगबिगी हुने भन्दै प्रहरीले तालिम प्राप्त कुकुर परिचालन गर्ने कार्यालयले जनाएको छ । सुरक्षा योजनामा चार्डपर्वको अवधिमा प्रदेशभर नियमित चेक प्वाइन्ट ३१ स्थानमा हुनेछन् । उनका अनुसार झै–झगडा, जुवा तास, चोरी लुटपाट, मापसे चेकिङ तथा नियन्त्रणका लागि ८६ स्थान र २ सय ६५ स्थानमा मोबाइल गस्ती र पैदल गस्ती गरिनेछ । यस्तै ट्राफिकसहितको संयुक्त चेकिङ ५३ स्थानमा, चोरी, तस्करी, लागूऔषध कारोबार लगायत अवैध गतिविधि नियन्त्रणका लागि १८ स्थानमा चेकजाँच गरिने प्रदेश प्रहरी कार्यालयले जनाएको छ ।

१८ स्थानमा विशेष चेकिङअन्तर्गत दुईवटा चालकको व्यवस्था गरिने पनि प्रवक्ता श्रेष्ठले बताए । आर्थिक कारोबार हुने, धार्मिक तथा पर्यटकीय स्थलहरूको सुरक्षा तथा बजार अनुगमनका लागि प्रहरीले ७५ स्थान छुट्याएर काम गर्ने छ ।खाद्यान्नलगायत अत्यावश्यक वस्तुहरूको कृत्रिम अभाव हुन नदिन अनुगमन गरी सहज आपूर्ति व्यवस्था गरिने भएको छ । प्रदेश राजधानी वीरेन्द्रनगरबाट बाहिरिने तथा भित्रिने यात्रुलाई मध्यनजर गर्दै विगतको जस्तै सहायता कक्ष राखिएको छ ।

प्रकाशित : आश्विन ९, २०७९ ०८:४०
प्रतिक्रिया
पठाउनुहोस्

खानेपानीले फेरियो दैनिकी

हरिहरसिंह राठौर

जाजरकोट — आफू किशोरी उमेरदेखि नै झन्डै आधा घण्टा टाढाको धाराबाट डोकोमा गाग्री बोक्ने गरेकी नलगाड नगरपालिका–१ चिउरीकी धनकला चदाराको घरमै अहिले धारा छ । ‘रातबिरात केही नभनी पानीका लागि आधा घण्टा हिँड्नुपर्ने बाध्यता थियो,’ उनले भनिन्, ‘अहिले घर ननिकैको धाराबाट २४ सै घण्टा खानेपानी उपभोग गर्न पाइरहेका छौं ।’


उनका अनुसार गत वर्षसम्म खानेपानी ओसार्नकै लागि घरका अन्य काम पन्छाउनुपर्ने बाध्यता थियो । ्

उनले धाराको पानीलाई सदुपयोग गरी करेसाबारीमा प्रयोग गर्ने गरिएको बताइन् । धनकला आफूभन्दा अगाडिका पुस्ताले पानीकै लागि गरेको दुःख र संघर्षका दिन पनि अहिले सम्झिन्छिन् । ‘छोराछोरी साना हुँदा उनीहरूलाई डोकाले छोपेर पानी ल्याउन जानुपर्थ्यो,’ उनले भनिन्, ‘फर्केर आउँदा बच्चा रोइकराइ निद्रामा परिसकेका हुन्थे ।’ धनकलाजस्तै ५१ वर्षीया रमिता विक पनि आँगनमै पानी आएपछि दंग छिन् । ‘आफ्नो पुस्ता त कुरै छोडौं, छोरी–बुहारीले समेत पानी बोक्न ठूलो सास्ती बेहोर्नुपर्‍यो,’ उनले भनिन्, ‘पाहुना आउँदा पनि एक लोटा पानी दिन लोभ लाग्थ्यो ।’ उनका अनुसार १ सय ४० घरधुरी रहेको चिउरीमा अहिले घरघरै धारा बनेपछि दैनिकी फेरिएको छ । पानी ल्याउन खर्चिनुपर्ने समय अरू काममा लगाइरहेको र खेर गइरहेको पानी करेसाबारीमा तरकारी खेती गरिरहेको उनले बताइन् । चिउरीमा दलित समुदायको मात्रै बसोबास छ ।

चिउरीसँगै नलगाड नगरपालिका–१ र २ का ६ सय ५० घरधुरीमा एकै पटक घरघरमा खानेपानीको धारा पुगेको हो । कर्णाली प्रदेशको जलस्रोत तथा ऊर्जा विकास मन्त्रालय र स्थानीयको झन्डै साढे ४ करोड रुपैयाँ लगानीबाट घरघरमा धारा बनेका हुन् । जसमा प्रत्येक घरधुरीले झन्डै २ साता श्रमदान गरेका थिए ।

२०७४ मा निर्माण कार्य सुरु गरिएको नहकुली खानेपानी आयोजना ५ वर्षमा पूरा भएपछि स्थानीयले खानेपानीको वर्षौंदेखिको सास्तीबाट मुक्ति पाएका हुन् ।

प्रकाशित : आश्विन ९, २०७९ ०८:३७
पूरा पढ्नुहोस्
प्रतिक्रिया
पठाउनुहोस्
×