७ मतदान केन्द्र थपिए- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

७ मतदान केन्द्र थपिए

जनकबहादुर शाही

हुम्ला — मंसिर ४ गते हुने प्रदेश र प्रतिनिधिसभा सदस्य निर्वाचनका लागि ७ वटा मतदानस्थल थप भएका छन् । योसँगै हुम्लामा मतदानस्थलको संख्या ५८ पुगेको छ । यसअघि निर्वाचन आयोगले ५१ वटा मतदानस्थल कायम गरेको थियो । ताँजाकोट गाउँपालिका–३ मासपुरमा पनि मतदानस्थल थपिएपछि स्थानीयलाई मतदान गर्नका लागि ३ दिन हिँड्नुपर्ने बाध्यता हटेको छ । 


जिल्लामा ४ वटा मतदानस्थलको ठाउँसारी भएको र ७ वटा नयाँ थप गरिएको जिल्ला निर्वाचन कार्यालयका सूचना अधिकारी श्यामबहादुर रानाले बताए । उनका अनुसार २३ घरधुरी रहेको मासपुरमा पनि मतदानस्थल थप गरिएको हो । ‘मतदान केन्द्र टाढा हुँदा धेरै मतदाता मताधिकारबाट वञ्चित रहेको पाइयो,’ उनले भने, ‘यो समस्या निर्वाचन आयोगमा जानकारी गराएको थियौं, आयोगले स्वीकृति दिएपछि मासपुरका स्थानीयले गाउँमै मतदान गर्न पाउँनेछन् ।’

मासपुरमा २३ पुरुष र २७ महिला गरी ५० मतदाता छन् । गाउँको जनसंख्या १ सय ३ मात्र रहेको जिल्ला निर्वाचन कार्यालयले जनाएको छ । अब बानादेव आधारभूत विद्यालयमा स्थानीयले मतदान गर्न पाउने भएका हुन् । सरकारले ०४८ सालको जनगणनामा मात्रै मासपुर गाउँलाई समेटेको थियो । गत बैशाखमा भएको स्थानीय तह निर्वाचनमा मतदाताहरू ताँजाकोट गाउँपालिकास्थित छप्रेला पुगेर मतदान गरेका थिए । ‘अब गाउँमै भोट हाल्न पाइने भयो,’ स्थानीय हंसराज रोकायाले भने, ‘यसअघि मतदान गर्न जान, आउन र मतदान गर्न ३ दिनको समय खर्चिनुपर्थ्यो ।’

उनका अनुसार अघिल्ला निर्वाचनहरूमा स्थानीयहरू कम्तीमा १२ घण्टा हिँडेर छप्रेलामा बास बस्थे । मतदानको दिन मतदान गर्थे र भोलिपल्ट मात्र आफ्नो गाउँ फर्कने गरेका थिए । मासपुरकै ओमकुमार रोकायाले सरकारले गाउँमै मतदान केन्द्र राखेर बल्ल मतदाता र जनताप्रति न्याय गरेको बताए । मंसिर ४ गते हुने निर्वाचनका लागि हुम्लामा ३२ हजार ८ सय ५७ मतदाता छन् । जसमध्ये १७ हजार १ सय २८ पुरुष र १५ हजार ७ सय २९ महिला रहेको जिल्ला निर्वाचन कार्यालयले जनाएको छ ।

प्रकाशित : आश्विन ७, २०७९ १०:३५
प्रतिक्रिया
पठाउनुहोस्

विकास र अनुभवको कीर्तिमान

गण्डकीमा हुने नवौं राष्ट्रिय खेलकुदलाई मध्यनजर गर्दै खुला राष्ट्रिय पौडी
कान्तिपुर संवाददाता

काठमाडौँ — प्रदेश १ का विकास कुमाल र त्रिभुवन आर्मी क्लबका अनुभव सुब्बाले २५ औं खुला राष्ट्रिय पौडी प्रतियोगितामा राष्ट्रिय कीर्तिमान कायम गरेका छन् । विकासले ५० मिटर ब्रेस्टस्ट्रोकमा ३१.०५ सेकेन्ड र अनुभवले १०० मिटर बटरफ्लाईमा ५९:०० सेकेन्डको राष्ट्रिय कीर्तिमान रचेका हुन् ।

छोटो दुरी (२५ मिटर) को यस प्रतियोगितामा दुवै विधामा सैयद हम्जा शाहको नाममा राष्ट्रिय कीर्तिमान थियो । सैयदले आठौं राष्ट्रिय खेलकुदमा ५० मिटर ब्रेस्टस्ट्रोकमा ३१.५५ सेकेन्ड र १०० मिटर बटरफ्लाईमा १ मिनेट ००:२५ सेकेन्डको कीर्तिमान बनाएका थिए । विकासले हिट चरणमा सैयदको नामको कीर्तिमान भंग गर्दै ३१.२६ सेकेन्डको कीर्तिमान बनाएका थिए । त्यसलाई पुनः आफैंले सुधारेका थिए ।

उक्त इभेन्ट वाग्मतीका सेरेन सिंह दोस्रो र आर्मीका अनुभव सुब्बा तेस्रो स्थानमा रहे । १०० मिटर बटरफ्लाईमा वाग्मतीका एल्भिन महर्जन र पुलिसका युभानलाल श्रेष्ठ दोस्रो र तेस्रो स्थानमा रहे ।

४०० मिटर फ्रिस्टाइलमा पुलिसका गौरव लामाले ३ मिनेट ३६.९८ सेकेन्डबाट स्वर्ण जिते । पुलिसकै सनिलकुमार थापा र एपीएफका उर्गेन महर्जन दोस्रो र तेस्रो भए । २०० मिटर ब्याकस्ट्रोकमा एपीएफका नेन्जिङ नाम्दोल रायन गुरुङले २ मिनेट १९.११ सेकेन्डसहित स्वर्ण जिते । प्रदेश १ का प्रारम्भ भण्डारीले रजत र पुलिसका गौरव लामाले कांस्य जिते ।

२०० मिटर फ्रिस्टाइलमा वाग्मतीका इर्भिन श्रेष्ठले २ मिनेट ४.०७ सेकेन्डबाट स्वर्ण जित्दा पुलिसका सुविज्ञमान तुलाधरले रजत र गौरव लामाले कांस्य जिते । १०० मिटर ब्रेस्टस्ट्रोकमा प्रदेश १ का विकास कुमालले १ मिनेट ८.४६ सेकेन्डसहित प्रदेशका लागि दोस्रो स्वर्ण जिते । वाग्मतीका सेरेन सिंहले रजत र एपीएफका जाडेन श्रेष्ठले कांस्य जिते । ५० मिटर बटरफ्लाईमा एपीएफका रायन गुरुङले २७.२४ सेकेन्डका साथ स्वर्ण जिते । आर्मीका अनुभव सुब्बाले रजत र प्रदेश १ का विकास कुमालले कांस्य जिते ।

गण्डकी प्रदेशमा हुने नवौं राष्ट्रिय प्रतियोगितालाई मध्यनजर गर्दै सातदोबाटोस्थित पौडी पोखरीमा आयोजित प्रतियोगिताको ५० मिटर ब्रेस्टस्ट्रोकमा आर्मीकी उपास्ती महर्जनले स्वर्ण जितिन् । उनले ३६.९० सेकेन्डमा दुरी पार गरिन् । प्रदेश १ की सिया सुभांगी बजगाईंले रजत र वाग्मती श्रेनु महर्जनले कांस्य जिते ।

२०० मिटर फ्रिस्टाइलमा आर्मीकी अनुसिया तण्डुकारले २ मिनेट १७.०१ सेकेन्डसाथ स्वर्ण जित्दा पुलिसकी समिरा शोभा थापाले रजत र वाग्मतीकी रोशा न्यौपानेले कांस्य जिते । १०० मिटर ब्रेस्टस्ट्रोकमा उपास्तीले स्वर्ण जितिन् । व्यक्तिगत दोस्रो जित्नेक्रममा उनले १ मिनेट २२.९१ सेकेन्ड लगाइन् ।

प्रदेश १ की सिया सुभांगी बजगाईंले रजत र एपीएफकी राभ्या श्रेष्ठले कांस्य जिते । ५० मिटर बटरफ्लाईमा वाग्मतीकी रोशा न्यौपानेले ३३.११ सेकेन्डसाथ स्वर्ण जितिन् । आर्मीकी अनुसिया तण्डुकारले रजत र वाग्मतीकी टिसा महर्जनले कांस्य जिते । पूर्वघोषित मितिभन्दा एक दिन ढिला प्रतियोगिता सुरु गर्नुपरेको आयोजक नेपाल पौडी संघले जनाएको छ ।

प्रकाशित : आश्विन ७, २०७९ १०:३१
पूरा पढ्नुहोस्
प्रतिक्रिया
पठाउनुहोस्
x
×