जाजरकोटमा १५ कांग्रेस नेताविरुद्ध कारबाही तयारी- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

जाजरकोटमा १५ कांग्रेस नेताविरुद्ध कारबाही तयारी

कान्तिपुर संवाददाता

जाजरकोट — कांग्रेस जाजरकोटले कारबाहीका लागि जिल्ला र स्थानीयस्तरका १५ नेता–कार्यकर्तालाई स्पष्टीकरण मागेको छ । गत स्थानीय तहको निर्वाचनमा पार्टीको आधिकारिक उम्मेदवारलाई हराउन सहयोग गरेको र निष्क्रिय भई बसेको आरोप आएपछि कारबाहीका लागि स्पष्टीकरण माग गरिएको हो ।

जसका लागि जिल्ला उपसभापति खडकबहादुर बुढाको संयोजकत्वमा अनुशासन समिति गठन गरिएको थियो । उनले उम्मेदवारसहित वडा र पालिका कार्यसमितिबाट निर्णय भएकाले ती नेताहरूलाई स्पष्टीकरण सोधिएको बताए ।

‘आफूमाथि लागेको आरोप के कस्तो हो वा होइन ? चित्तबुझ्दो जवाफसहित १५ दिनभित्र लिखित जवाफसहित स्वयम् उपस्थित हुन पत्र पठाइएको छ,’ उनले भने । स्पष्टीकरण माग गरिएकामा कर्णाली प्रदेश कार्यसमिति सहमहामन्त्री रामछाया कुमारी, प्रदेश कार्यसमिति सदस्य कमलदीप पुन, भुमबहादुर रोकाय, कुशे–९ का मोतीराम गौतम, जिल्ला सदस्यहरू धनसरा शाही, चित्रबहादुर शाही, कल्दर सिंहसहित १५ जना छन् ।

प्रकाशित : श्रावण २९, २०७९ ०८:२१
प्रतिक्रिया
पठाउनुहोस्

सडक अवरुद्धले हिँड्नै सकस

मनोज बडू

दार्चुला — दुहु र ब्यास गाउँपालिकालाई सदरमुकाम जोड्ने खलंगा–टिंकर सडक ठाउँ–ठाउँमा अवरुद्ध छ । सडक अवरुद्ध हुँदा यातायात ठप्प भएर यहाँका स्थानीय जोखिम मोलेर सदरमुकाम आवतजावत गर्न बाध्य छन् ।

बाढीपहिरोले बाटोघाटोमा क्षति पुग्दा पैदल हिाड्नसमेत समस्या छ । असारको सुरुकै वर्षाले ग्रामीण सडकहरू बन्द भइसकेका छन् । सडक तथा पैदल हिड्ने बाटोमा बाढी र पहिरोले धेरै ठाउँमा क्षति पुगेको स्थानीयले बताएका छन् । वर्षाका कारण सडकमा पहिलो खस्दा यस क्षेत्रमा स्थानीयबासिन्दाहरू गाउँदेखि जिल्ला सदरमुकाम खलंगा जान समस्या झेल्न बाध्य बनेका हुन् ।

दुहु गाउँपालिकाका सबै बस्तीको सदरमुकाम आउने सडक तथा पैदल मार्ग टिंकर सडक नै हो । ब्यास गाउँपालिकाका केही बस्तीका मानिसहरू मात्र टिंकर सडकको प्रयोग गरेर जिल्ला सदरमुकाम पुग्छन् । ‘दुहु गाउँपालिकाका सबै ठाउँका मानिसहरू टिकर सडकबाट नै खलंगा जानुपर्छ’ दुहु गाउँपालिका–१ पिपलचौरीका तोयराज जोशीले भने, ‘यो मार्गको ठाउँ–ठाउँमा पहिरो खसेको तथा सडक भासिएको छ ।’ यातायातको साधन त परै जाओस्, पैदल हिड्नलाई समेत समस्या भईरहेको छ । गाउँदेखि सदरमुकाम पुग्न भिरको बाटो भएकोले जोखिम मोलेर आवतजावत गर्नुपरेको उनको भनाई छ ।

यस सडकको दुहु र ब्यास गाउँपालिकाका विभिन्न ठाउँमा पहिरो खसेपछि पैदल हिँड्नसमेत अप्ठ्यारो भएको स्थानीयले बताएका छन् । जोशीका अनुसार माथिबाट ढुङगा खस्ने र हतारले हिड्दा चिप्लिएर तल खस्ने डर उत्तिकै छ । स्थानीय उत्पादन नपुगेर सबै चिज सदरमुकामबाट नै ल्याएर आपूर्ति गर्नुपर्ने भएकोले ब्यास र दुहु गाउँपालिकाले स्थानीयले सदरमुकाम आवतजावत गर्न धेरै ठाउँमा जोखिम मोल्नुपरेको हो, उनले भने । उनले स्थानीय सरकारलाई खसेको पहिरो पञ्छाई आवतजावतमा सहजता ल्याउन भनिए पनि चासो नदेखाएको गुनासो गरे ।

‘टिंकर सडक विभिन्न ठाउँमा अवरुद्ध हुँदा सामान ढुवानी भएको छैन’ दुहुका स्थानीय व्यापारी शिवराज जोशीले भने, ‘सुरुमा स्थानीयबाट नै सामान ढुवानी हुँदै आएको र अहिले सडक अवरुद्ध हुँदा सामान बोक्ने साधन नहुदा धेरैजसो सामान सकिन लागेको छ ।’

शिवराजका अनुसार दुहु गाउँपालिकाको हिकिला, पिपलचौरी क्षेत्रमा सामान ढुवानी गर्ने ट्याक्टर लगायतका सवारीसाधन नचल्दा चामल, तेललगायत दैनिक उपभोग्य सामान संकट बढ्दै गएको छ । चाडै सडक संचालन नभए केहि दिनमै खाद्यान्न संकटको अवस्था सृजना हुन सक्ने सम्भावना रहेको उनले बताए । ढुवानीको समस्या देखाएर स्थानीय व्यापारीहरूले महंगोमा सामान बेचिरहेका छन् । स्थानीयलाई आवश्यक परेको सामानको बढी भाउ भने पनि किन्नुपर्ने बाध्यता रहेको छ । त्यस्तै गाउघरमा बाटो बन्द भएर औषधी उपचारका लागि सदरमुकाम पुग्नसमेत समस्या भएको दुहु गाउपालिका १ पिपलचौरीका चक्रदेव भट्टले बताए ।

प्रकाशित : श्रावण २९, २०७९ ०८:२०
पूरा पढ्नुहोस्
प्रतिक्रिया
पठाउनुहोस्
x
×