कोहलपुर–सुर्खेत १३२ केभीए प्रसारणलाइनका लागि रूख काट्न बाटो खुला

आयोजना कार्यालयका अनुसार सुर्खेतको भेरीगंगा नगरपालिका र वीरेन्द्रनगर नगरपालिका तथा बाँकेको कोहलपुर नगरपालिकामा जग्गा अधिग्रहण सम्पन्न गरी जग्गा प्राप्ति भइसकेको छ । आयोजना प्रमुख रविकुमार चौधरीले बाँकेको केही क्षेत्रमा विवादका कारण जग्गा अधिग्रहणमा अझै केही समय लाग्ने देखिएको बताए ।

‘बाँकेको बैजनाथ गाउँपालिका–१ र ४ मा जग्गा अधिग्रहणका विषयमा विवाद छ,’ उनले भने, ‘विवादकै बीच कोहलपुर र सुर्खेतमा सबस्टेसन निर्माणका लागि टेन्डर प्रक्रिया सुरु गरेका छौं ।’ वीरेन्द्रनगर–११ को सुब्बाकुनामा सबस्टेसन बनाउन टेन्डर प्रक्रिया अघि बढाइएको उनले बताए । अहिले उक्त क्षेत्रमा सबस्टेसनका विषयमा योजना निर्माणलगायत काम भइरहेका छन् ।

यो प्रसारण लाइन बनाउँदा १३ हजार ५६ वटा रूख काटिने छन् । आयोजना क्षेत्रमा पर्ने सुर्खेतको वीरेन्द्रनगर, भेरीगंगा र लेकबेसी नगरपालिका, बर्दिया राष्ट्रिय निकुञ्ज, बाँकेको कोहलपुर नगरपालिका र बैजनाथ गाउँपालिका क्षेत्रभित्रका रूख कटान गर्ने गरी मन्त्रिपरिषद् बैठकले निर्णय गरेको हो ।

‘आयोजना निर्माणका लागि निर्माण कम्पनी आरएस इन्फ्राप्रोजेक्ट प्रालिले तयार पारेको प्रतिवेदनअनुसार कटान हुने रूखको संख्या १३ हजार ५६ रहेको छ,’ आयोजना प्रमुख चौधरीले भने, ‘जसमध्ये सुर्खेतमा ६ हजार ८ सय २०, बर्दियामा ३ हजार ३ सय २० र बाँकेमा २ हजार ९ सय १६ वटा रुख कटान हुनेछन् ।’

आयोजना क्षेत्रमा पर्ने रुख काट्न ऊर्जा, जलस्रोत तथा सिँचाइ मन्त्रालय र वन तथा वातावरण मन्त्रालयमा अनुमतिका लागि फाइल पेस भएको थियो । अब नेपाल विद्युत् प्राधिकरण र वन विभागबीच रुख कटानका लागि सम्झौता हुनेछ । सम्झौतापछि निकुञ्ज क्षेत्रका रुखहरू निकुञ्ज कार्यालय, राष्ट्रिय वनमा पर्ने रुख सम्बन्धित जिल्ला वन कार्यालय तथा सामुदायिक वनका रुख भने सामुदायिक वनले नै कटान गर्नेछन् । यी सबै प्रक्रिया सकिन कम्तीमा कात्तिकसम्म लाग्ने आयोजनाले जनाएको छ ।

विद्युत् प्रसारण लाइन विस्तार गर्दा १ सय ६० पोल निर्माण हुनेछन् । तीमध्ये १ सय ३० वटा पोल सार्वजनिक तथा राष्ट्रिय निकुञ्ज र बाँकी ३० वटा पोल व्यक्तिको जग्गामा पर्ने आयोजना निर्माण कम्पनीले जनाएको छ । विवाद नभएका क्षेत्रमा अहिलेसम्म ४० वटा टावरका लागि फाउन्डेसन निर्माण गरिसकिएको छ । प्रसारण लाइनका लागि करिब ९९ हेक्टर जमिनमा टावर निर्माण हुनेछन् भने विभिन्न ठाउँमा सबस्टेसन बनाइनेछ । वातावरणीय प्रभाव मूल्यांकन प्रतिवेदनका अनुसार प्रसारण लाइनले ७० हेक्टर जमिन वनको क्षेत्र ओगट्नेछ ।

कोहलपुर–सुर्खेत १३२ केभीए विद्युत् प्रसारण लाइनको भारतीय निर्माण कम्पनी आरएस इन्फ्राप्रोजेक्ट प्रालिले ७० करोड रुपैयाँमा ठेक्का पाएको हो । डबल सर्किट रहने आयोजनाको लम्बाइ करिब ५१.४६२ किमि रहने प्रस्ताव गरिएको छ । हाल सुर्खेतसहित कर्णालीमा ३२ केभीए विद्युत् प्रसारण लाइन सञ्चालनमा छ । विद्युत् प्राधिकरणले २०४५ सालमै सुर्खेतमा १३२ केभीए प्रसारण लाइन विस्तार गर्ने योजना बनाएको थियो । त्यसको झन्डै २६ वर्षपछि आयोजनाको काम अघि बढेको हो । २ वर्षभित्र सुर्खेतमा १३२ केभी प्रसारण लाइन पुर्‍याउने आयोजनाको लक्ष्य छ ।