सल्यानमा ७० प्रतिशत रोपाइँ सम्पन्न- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

सल्यानमा ७० प्रतिशत रोपाइँ सम्पन्न

विप्लव महर्जन

सल्यान — यस वर्ष असारको तेस्रो सातासम्म सल्यानमा ७० प्रतिशत मात्र रोपाइँ सम्पन्न भएको कृषि विकास कार्यालय सल्यानले जनाएको छ ।

समयमै वर्षा नभएका कारण सिँचाइको समस्या हुँदा अहिलेसम्म ७० प्रतिशत मात्र रोपाइँ सम्पन्न भएको बताइएको छ । जिल्लाको ७ हजार ७८ हेक्टर खेतीयोग्य जग्गामा किसानले धान खेती गर्दै आएकामा अहिले प्रतिशतका आधारमा ५ हजार हेक्टर क्षेत्रफल जग्गामा किसानले धान रोपाइँ गरिसकेको कृषि विकास कार्यालय सल्यानका प्रमुख भरतकुमार बस्नेतले बताएका छन् ।

कृषि विकास कार्यालयका अनुसार अझै २ हजार बढी हेक्टरमा रोपाइँ गर्न बाँकी नै रहेको छ । यस्तै गत वर्ष असारको दोस्रो सातामा जिल्लाभरका सबै स्थानमा रोपाइँ सम्पन्न भइसकेको थियो ।

मनसुन सुरु भएको धेरै साता बितिसक्ता पनि पर्याप्त वर्षा नभएकाले सिँचाइमा समस्या भएकै कारण सल्यानमा धान रोपाइँमा ढिलाइ भएको बताइएको छ । वर्षाकै अभावमा जिल्लाको बन्गाड कुपिण्डे नगरपालिकाका केही क्षेत्रमा र साउने झरीमा सिँचाइ लाग्ने खेतमा किसानले भर्खर मात्र जोतेर सकेको कृषि विकास कार्यालयका प्रमुख बस्नेतको भनाइ छ ।

सल्यानका १० स्थानीय तह अन्तर्गत सिँचाइ भएका क्षेत्र शारदा, बाग्चौर नगरपालिका, छत्रेश्वरी, त्रिवेणी, दार्मा, कुमाख र सिद्धकुमाख गाउँपालिकामा भएका खेतमा लगभग रोपाइँ सम्पन्न भइसकेको कृषि कार्यालय सल्यानका सूचना अधिकारी रेसमबहादुर बस्नेतले बताए ।

सल्यानमा कुल ७ हजार ७८ हेक्टर क्षेत्रफल जग्गामा वार्षिक २९ हजार ७ सय ३५ मेट्रिक टन धान उत्पादन हुने गरेको र यसबाट जिल्लावासीलाई झन्डै ६ महिना खान पुग्ने उनले जानकारी गराए । पछिल्लो समयमा किसानले स्थानीय जात भन्दा बढी उत्पादन हुने हाईब्रिड धान लगाउँदै आएका छन् ।

प्रकाशित : असार १८, २०७९ १५:५१
प्रतिक्रिया
पठाउनुहोस्

इरानमा शक्तिशाली भूकम्प : ५ को मृत्यु, १९ घाइते

एजेन्सी

काठमाडौँ — इरानको दक्षिणी क्षेत्रमा ६ म्याग्निच्युडको भूकम्प जाँदा कम्तीमा पाँच जनाको मृत्यु भएको छ । साथै १९ जना घाइते भएका छन् ।

स्थानीय मिडियाका अनुसार होर्मोज्गान प्रान्तस्थित बन्दर अब्बस सहर नजिकै भूकम्प गएको थियो ।

होर्मोज्गान प्रान्तका गभर्नर महदी दोस्तीले भूकम्पमा पाँच जनाको मृत्यु भएको र १९ जना घाइते भएको जानकारी दिएका छन् । भूकम्पको केन्द्रबिन्दु मानिएको गाउँ साए खोस्तसँगै आसपासका कतिपय घर र अन्य भौतिक संरचना भत्किएको पनि बताइएको छ ।

होर्मोज्गान प्रान्तमा यसअघि गत वर्षको नोभेम्बरमा भूकम्प जाँदा एक जनाको मृत्यु भएको थियो । इरानमा १९९० मा ७ दशमलब ४ म्याग्निच्युडको शक्तिशाली भूकम्प जाँदा ४० हजारको मृत्यु भएको थियो ।

प्रकाशित : असार १८, २०७९ १५:३३
पूरा पढ्नुहोस्
प्रतिक्रिया
पठाउनुहोस्
×