ठेकेदार कम्पनीको बहानाबाजी, काम नसकिँदै भत्कियो कालोपत्र

२०७४ असार २० गते सुरु भएर २०७८ असार २० मा सम्पन्न गर्नुपर्नेमा अहिलेसम्म ठेकेदार कम्पनीले दाङ र सल्यानको सिमाना पर्ने एक्लेवरबाट कालिमाटी गाउँपालिकाको केन्द्र पुतलीबजारसम्म १० किलोमिटर कालोपत्रे सम्पन्न गरेको थियो । २७ किलोमिटर सडक सम्पन्न गर्नुपर्नेमा अहिले पनि १७ किलोमिटर कालोपत्रे गर्न बाँकी रहेको छ । सम्बन्धित निकायले एकपटक म्याद थप गरेर पुनः अर्कोपटक थप गर्ने तयारी गरेको छ । तर, ठेकेदार कम्पनीको कालोपत्रेको काम भने कछुवा गतीमा छ ।

सडक डिभिजन कार्यालय दाङले उक्त सडक कालोपत्रे गर्न ४४ करोड विनियोजन गरेको थियो । कार्यालयले गरेको टेण्डर अनुसार कालिका जेभी कन्ट्रक्सनले कामको जिम्मेवारी पाएको थियो । एकातिर ठेकेदार कम्पनीले गरेको कालोपत्रे उप्किएको र अर्कोतिर अझै १७ किलोमिटरभन्दा बढी कालोपत्रेको काम गर्न बाँकी रहेकाले वर्षातको समयमा हिलाम्मे र हिउँदमा धुलाम्मे हुने गर्दा स्थानीयले सास्ती भोग्दै आएका छन् ।

मदनभण्डारी राजमार्ग अन्तर्गत ठेकदार कम्पनीले दाङको क्षेत्रमा कालोपत्रेको काम राम्रो गरेपनि सल्यानको क्षेत्रमा राम्रो काम नगरेको कालिमाटी गाउँपालिकाका माओवादी केन्द्रका पालिका ईन्चार्ज पुरुषोत्तम भटराईले बताए । सल्यानकै एक्लेवर क्षेत्रमा सबैभन्दा बढी कालोपत्रे उप्किएको उनले जानकारी गराए । ‘सडक डिभिजन कार्यालयका ईन्जिनियरले नियमित अनुगमन गर्दैनन् । जिम्मेवार रहेको स्थानीयतहले ताकेता गर्दैन । कसरी हुन्छ राम्रो काम ?’ उनले भने, ‘हामीले ताकेता गरिरहेका छौं । तर, हाम्रो कुरा ठेकेदार कम्पनीले सुन्दैन ।’

जिम्मेवार निकायको गैरजिम्मेवारीकै कारण ठेकेदार कम्पनीले लापरबाही गरेको र त्यसका कारण सर्वसाधारणले धेरै कष्ट उठाउँदै आएको सुरेशकुमार गाहामगरले बताए । ठुलो वर्षा भएमा अझै धेरै स्थानमा गरेको पिच बगाउने देखिएको उनले दाबी गरे । उनले सम्बन्धित निकाय समक्ष गुणस्तरमापनमा समेत ध्यान दिन आग्रह गरेका छन् ।

‘कालोपत्रे भएमा गाडीमा एक घण्टामा सुर्खेत जान सकिन्थ्यो । पिचको काम अधुरै रहेको छ । जसका कारण सुर्खेत जाँदा कालीमाटी गाउँपालिका ३ सिमलकुनादेखि सल्यान–सुर्खेतको सीमामा पर्ने काल्चेडा“डासम्म वर्षातको बेला सबैभन्दा बढी समस्या हुने गरेको छ,’ उनले भने, ‘नियमित गाडी नचल्दा हिँडेर आउजाउ गर्नुपर्ने बाध्यता छ ।’ ठेकेदार कम्पनीले विभिन्न बहाना बनाएर काम प्रति अटेर गरेको र काम नगरी सामान थन्काई राखेको उनको भनाइ थियो ।

कालीमाटी गाउँपालिका अध्यक्ष दानबहादुर खत्रीले ठेकेदार कम्पनीलाई बारम्बार ताकेता गर्दै आए पनि कामलाई निरन्तरता नदिएको बताएका छन् । कालिमाटी गाउँपालिकाको केन्द्र पुतलीबजार क्षेत्रमा पनि ठाउँठाउँमा छाड्दै कालोपत्रे गरेको र त्यो पनि खासै गतिलो नभएको उनले बताए ।

सडक डिभिजन कार्यालय दाङका साइट ईन्चार्ज ईन्जिनियर अमिर सुवेदीले ठेकेदार कम्पनीले चार वर्षको अवधीमा २७ किलोमिटर सडक कालोपत्रे गर्नुपर्नेमा झन्डै १० किलोमिटर मात्र सम्पन्न गरेको बताए । कालोपत्रे उप्किएको स्थानमा कम्पनीलाई बनाउन ताकेता गरेको उनले जानकारी गराए ।

‘२०७४ असारदेखि सुरु भएको योजनाको २०७८ असारमा म्याद सकिएपछि कार्यालयले गत वर्ष पुस ६ गतेसम्म छ महिनाको लागि म्याद थप गरेको थियो । ठेकेदार कम्पनीले खासै काम गरेको देखिएन । म्याद थप नगर्दा काम गर्ने सम्भावना कम देखिएकाले अहिले फेरी थप गर्ने तयारी छ,’ उनले भने ।

ठेकेदार कम्पनीलाई काम गर्न बारम्बार ताकेता गरिरहेको र अहिलेसम्म १० पटक पत्र काटिसके पनि विभिन्न बहाना बनाउँदै काम गर्न नमानेको उनले बताए । उनका अनुसार दाङदेखि नेपालगन्ज हुँदै सुर्खेत जानु पर्दा २ सय ५० किलोमिटर पर्ने र तुलसिपुर–कालीमाटी हुँदै सुर्खेत जाँदा झन्डै १ सय ५० किमी मात्र पर्ने भएकाले धेरै छोटो पर्ने ह“ुदा सरकारले उक्त सडक एक दशक पहिलेदेखि कालोपत्रे गर्न सुरु गरेको थियो । तुलसिपुरदेखि सुर्खेतको बोटेचौरसम्म चार प्याकेज बनाएर झन्डै एक अर्ब बजेट विनियोजन गरेर सरकारले ठेकेदार कम्पनीमार्फत काम गराएको थियो ।

कालिका जेभी कन्ट्रक्सनले नै सुरुदेखि उक्त सडक कालोपत्रेको काम पाएको थियो । तीन प्याकेजमा काम सम्पन्न भइसकेको र अहिले चौथो प्याकेज अन्तर्गत सल्यान खण्डमा काम काम बाँकी रहेको छ । कार्यालयले ठेकेदार कम्पनीलाई जरिवाना तिराउने भन्दा अन्य कुनै कारबाही गर्न नसक्ने उनको भनाइ थियो ।

कालिका जेभि कन्ट्रक्सनका ठेकेदार ठाकुर कँडेलले लगातार दुई वर्ष कोरोनाका कारण काम गर्न नसकेको र पछिल्नो समयमा शारदा नदिबाट गिटी बालुवा उत्खनन गर्न नदिएको र सम्बन्धित निकायले क्रसर संचालन बन्द गराएका कारण कच्चा पदार्थको अभावमा काम गर्न नसकेको बताएका छन् । अत्यधिक वर्षातका कारण पहिरो जाँदा कालोपत्रे केही स्थानमा उप्किएको र उक्त स्थानमा पुनः काम गर्ने जानकारी दिए ।