‘सरकारले वादी समुदायको माग कार्यान्वयन गर्छ’- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

‘सरकारले वादी समुदायको माग कार्यान्वयन गर्छ’

ज्योति कटुवाल

सुर्खेत — कर्णाली प्रदेश सरकाले वादी समुदायसँग भएको सहमति कार्यान्वयनमा लैजाने भएको छ । २०७७ सालमा आफ्ना विभिन्न मागसहित धर्नामा बसेका वादी समुदायसँग कर्णाली प्रदेश सरकारले गरेका पाँच बुँदे सहमतिहरू कार्यान्वयनमा लैजाने भएको हो ।

कर्णाली प्रदेश सरकारलाई आफ्ना समस्या सुनाउन मुख्यमन्त्री तथा मन्त्रिपरिषद् कार्यालय अगाडि कर्णालीका वादी समुदायले १७ दिनसम्म धर्ना दिएका थिए । अन्ततः प्रदेश सरकारसँग उनीहरूको ५ बुँदे सहमति भयो । वि.सं. २०७७ फागुन २६ गते प्रदेशका तत्कालीन मुख्यमन्त्री महेन्द्रबहादुर शाहीको रोहवरमा भूमि व्यवस्था, कृषि तथा सहकारी मन्त्रालयका तत्कालीन सचिव डा. राजेन्द्र मिश्रले कर्णाली प्रदेश सरकारका तर्फबाट सहमतिपत्रमा हस्ताक्षर गरेका थिए ।

हालसम्म पनि वादी समुदायसँग भएका सम्झौता प्रदेश सरकारले पूरा गर्न सकेको छैन । कर्णालीका मुख्यमन्त्री जीवनबहादुर शाहीले भने, ‘हाल हामी समुदायका बालबालिकाको शिक्षाका लागि काम गर्दैछौं । त्यसपछि वादी समुदायसँग भएका अन्य सहमतिहरू सबै प्याकेजका रुपमा कार्यान्वयनमा ल्याउँछौं ।’ वीरेन्द्रनगरमा हाल वादी समुदायका एक सय २६ जना बालबालिका आश्रित रुपमा रहँदै आएका छन् ।

वादी समुदायसँग भएको सहमतिमा प्रदेश सरकारले जमिन उपलब्ध गराइदिन नेपाल सरकारलाई अनुरोध गरी आवश्यक समन्वय गर्ने; उत्थान र विकासका लागि दुई महिनाभित्र यथार्थपरक प्रतिवेदन पेस गर्न तीन सदस्यीय कार्यदल गठन गर्ने; खाना, नाना र छाना कार्यक्रमअन्तर्गत थप कार्यक्रम सञ्चालन गर्ने; युवाहरूलाई सीपमूलक तालिम तथा घुम्ती कोष खडा गरी १० लाखसम्म ऋणमा ब्याज अनुदान दिनेलगायत सहमति गरेको थियो ।

कर्णाली प्रदेश सरकारले समुदायसँग भएको सहमति कार्यान्वयन गर्ने भएपछि आफूहरूमा आशा पलाएको वादी संघर्ष समितिका संयोजक हिक्मत वादीले बताए ।

प्रकाशित : असार १३, २०७९ ११:१८
प्रतिक्रिया
पठाउनुहोस्

फोहोर माग्दै वडाध्यक्ष टोलटोलमा

साँघुरो गल्लीमा समेत फोहोर उठाउन सजिलो हुने ‘कन्टेनर सफारी’ सञ्चालन
भरत जर्घामगर

सिरहा — लहान नगरपालिकामा फोहोर व्यवस्थापनको समस्या बर्सेनि बल्झिरहन्छ । फोहोर नउठाएको भन्दै पटकपटक स्थानीयले नगरपालिका कार्यालय घेराउ गर्दै आएका छन् । गत वर्ष डम्पिङ साइट विवादका कारण बजार क्षेत्रको फोहोर १८ दिनसम्म नउठाएको भन्दै स्थानीयले पालिका कार्यालय परिसरमा फोहोर फालेका थिए । 

नगरपालिकाको मुख्य बजार क्षेत्र वडा नम्बर ७ मा पर्छ । यो क्षेत्रमा बर्सेनि फोहोरकै समस्या र नगरवासीले विरोधमा उत्रिनुपरेको घटना देखेका वडाध्यक्ष रामअवतार शर्मा आफैं व्यवस्थापनमा सक्रिय भएका छन् । पालिकाको ट्र्याक्टर र टिपरले फोहोर नउठाउँदा समस्या बल्झिने भयले यसपटक वडाध्यक्ष शर्माले नयाँ जुक्ति निकाले । गल्लीमा समेत फोहोर उठाउन सजिलो हुने ‘कन्टेनर सफारी’ वडामा किनेर ल्याए । अनि आफैं फोहोर माग्न साँघुरो गल्लीमा पनि पुग्न थालेका छन् । अहिले फुर्सद हुनेबित्तिकै उनी सहयोगी लिएर घरदैलोमै फोहोर उठाउन पुग्छन् ।

उनी सफारी चलाउँछन्, सहयोगीले फोहोर कन्टेनरमा हाल्छन् । ‘फराकिलो सडकको फोहोर मात्रै उठाउने गरेको जनगुनासो वडाभरि थियो,’ शर्माले भने, ‘त्यसैले टोलको फोहोर उठाउने माध्यम बनाएँ कन्टेनर सफारीलाई ।’ यात्रु बस्ने गरेको चालक पछाडिको सिटी सफारीको भागलाई हटाई त्यसको साटो दुईवटा कन्टेनर जडान गरी उनले दुई भागमा विभाजन गर्न लगाई एउटालाई सड्ने फोहोर र अर्कोलाई नसड्ने फोहोरको भण्डारणका रूपमा प्रयोग गर्दै आएका छन् ।

उनको यही सक्रियता देखेर पहिलो कार्यपालिकाको बैठकले शर्मालाई सरसफाइ संयोजकका रूपमा छनोटसमेत गरेको छ । भित्री टोलको फोहोर नउठाउँदा नालामै थुप्रिने र वर्षायाममा निकास अवरुद्ध हुने समस्या थियो । नगरपालिकासँग समन्वय गरी सरसफाइकै बजेटबाट दुईवटा सिटी सफारी खरिद गरी त्यसलाई कन्टेनर बनाइएको हो । ‘अब यो सानो कन्टेनरमा कमसेकम सानो गल्लीभित्र रहेको एउटा बस्तीको फोहोर राम्ररी उठाउन सकिन्छ’, शर्माले भने, ‘यसबाट फोहोर उठाउने समस्या टरेको छ ।’

वडा नम्बर ६ ले पनि सिटी सफारीलाई कन्टेनर बनाएर फोहोर संकलन सुरु गरेको छ । हरेक टोलबस्तीका लागि फोहोर उठाउन सजिलो माध्यम सफारी कन्टेनर बनेपछि नगरपालिकाले २४ वटै वडामा यसको प्रयोग गर्ने निर्णय समेत गरेको वडाध्यक्ष शर्माले जानकारी दिए ।

प्रकाशित : असार १३, २०७९ १०:५२
पूरा पढ्नुहोस्
प्रतिक्रिया
पठाउनुहोस्
x
×