जुम्लामा बिजुलीको विकल्पमा सौर्य ऊर्जा- कर्णाली - कान्तिपुर समाचार

जुम्लामा बिजुलीको विकल्पमा सौर्य ऊर्जा

डीबी बुढा

जुम्ला — जुम्लामा नियमित रुपमा विद्युत् आपूर्ति हुन नसकेपछि विकल्पका रुपमा सौर्य ऊर्जाको व्यवस्थापन गर्न लागिएको छ । १५ सय किलोवाट क्षमताको सोलार प्लान्ट राख्न थालिएको छ‚ जसको स्थान छनोटसमेत भइसकेको छ । 

चन्दननाथ नगरपालिका ३ स्थित खोपचौर र घुघुत्ती पावरहाउस नजिकको जग्गामा सोलार पलान्ट राख्न लागिएको नेपाल विद्युत् प्राधिकरण वितरण केन्द्र जुम्लाका प्रमुख नरेशदत्त रावलले जानकारी दिए ।

सोलार प्लान्टबाट बिजुली निकाल्नका लागि अन्तिम प्रयत्न भइराखेको छ । नेपाल विद्युत् प्राधिकरण काठमाडौंबाट पीएमडी शाखाको तीन जनाको इन्जिनियर टोली जुम्ला पुगेर फर्किसकेको छ । केन्द्र प्रमुख रावलले भने, ‘प्लान्ट राख्न दुई स्थानको छनोट गरिएको थियो । टोलीले दुईमध्ये एक स्थान छानेर फर्किएको छ ।’

जुम्ला चन्दननाथ नगरपालिकामा ७ सय किलोवाट बिजुली खपत हुन्छ । १५ सय किलोवाट सोलार प्लान्ट स्थापना भए पनि नगरबासीलाई बिजुली आपूर्तिमा निकै राहत मिल्ने केन्द्र प्रमुख रावलले बताए ।

जुम्ला सदरमुकाम खलंगासम्म विद्युत्‌को राष्ट्रिय प्रसारणलाइन जडान भइसकेको छ । तर‚ नियमित विद्युत् आपूर्ति हुन सकेको छैन । दैलेख, दुल्लु, कालिकोट हुँदै जुम्ला पुगेको विद्युत् प्रसारण लाइन भरपर्दो छैन । महिनामा दुई हप्ता पनि बिजुली बाल्न पाइँदैन ।

बिजुलीको लाइन भिरपाखा हुँदै आएको छ । बाढीपहिरो, वर्षात्, हावाहुरीले बिजुलीको पोलमा क्षति हुने गरेको छ । नियमित बिजुली आपूर्ति नहुँदा बिजुलीबाट चल्ने उपकरण थन्किँदै आएका छन् ।

सोलार प्लान्ट राख्न सुरु भएपछि नियमित रुपमा बिजुली बाल्ने जुम्लावासीको धोका पूरा हुने भएको छ । स्थानीय दलबहादुर खत्रीले कहिलेकाहीँ जुम्ला बिजुलीविहीन हुने गरेको दुखेसो पोखे । उनले भने, ‘राष्ट्रिय प्रसारण लाइन भरपर्दो छैन । जुम्लाबासीसँग उज्यालोको कुनै विकल्प छैन । सौर्य ऊर्जाको व्यवस्थापन हुन सकेमा विद्युत् अभाव हट्ने निश्चित छ ।’

सदरमुकाम खलंगामा राष्ट्रिय प्रसारण लाइन पुगेपछि गाउँका विकट बस्ती अझै पनि अँध्यारोमै बस्न बाध्य छन् । सदरमुकाम खलंगामा राख्न लागिएको सौर्य ऊर्जाका लागि पूर्वआन्तरिक मामिला तथा कानुनमन्त्री नरेश भण्डारीले विद्युत् प्राधिकरणसँग पहल गरेका थिए ।

प्रकाशित : जेष्ठ १०, २०७९ १६:०४
प्रतिक्रिया
पठाउनुहोस्

चितवनका सबै पालिकाको मत परिणाम सार्वजनिक

जिससका लागि एमाले र गठबन्धनको बराबर मत
रमेशकुमार पौडेल

चितवन — एक महानगरपालिका, पाँच नगरपालिका र एक गाउँपालिका गरेर सात स्थानीय तह रहेको चितवनमा मंगलबार सबै पालिकाको अन्तिम मत परिणाम आएको छ । मत परिणामअनुसार जिल्ला समन्वय समिति (जिसस) गठनका लागि एमाले र सत्तारुढ गठबन्धनको बराबर सात सात मत भएको छ । पालिकाका प्रमुख र उपप्रमुखले जिससको प्रमुख, उपप्रमुख र सात जना सदस्य चयन गर्न मतदान गर्ने छन् ।

जिससका लागि एमाले एक्लैसँग सात मत रहँदा सत्तारुढ गठबन्धनमा नेपाली कांग्रेससँग पाँच र माओवादी केन्द्र तथा नेकपा एकीकृत समाजवादीसँग एक एक मत रहेको छ । चितवनका सातवटै पालिकामा वडा तहसम्म गठबन्धन गरेर चुनावमा होकिएको सत्तारुढ दलहरूले जिससको निर्वाचनसम्म पनि गठबन्धन कायम राख्ने निर्णय गरेका छन् । गठबन्धनबाट जिसस प्रमुख नेपाली कांग्रेसले पाउने सहमति छ ।

कांग्रेसले पूर्णबहादुर रानाभाटलाई जिसस प्रमुखमा अगाडि सार्ने तयारी गरेको छ । उनी भरतपुर-८ बाट वडा सदस्यमा निर्वाचित भएका छन् । यसैगरी एमालेबाट नारायण अधिकारीको नाम चर्चामा छ । उनी इच्छाकामना गाउँपालिका ३ बाट वडा सदस्यमा निर्वाचित भएका छन् । सातवटा पालिकामध्ये एमालेले कालिका नगरपालिका र इच्छाकामाना गाउँपालिकामा प्रमुख उपप्रमुख दुवै जितेको छ ।

त्यसै गरी एमालेले माडी नगरपालिकामा मेयर जितेको छ । रत्ननगर र खैरहनी नगरपालिकामा उपमेयर जितेको छ । नेपाली कांग्रेसले रत्ननगर र खैरहनीमा मेयर तथा भरतपुर महानगरपालिका, माडी र राप्ती नगरपालिकामा उपमेयर जितेको छ । माओवादीले भरतपुर महानगरपालिकामा मेयर र नेकपा एकीकृत समाजवादीले राप्ती नगरपालिकामा मेयर जितेको छ ।

जिससका लागि अघिल्लो पटक एमाले एक्लैसँग ९ मत थियो । यसैगरी कांग्रेससँग तीन र माओवादी केन्द्रसँग दुई मत थियो । एमालेले यो पटक राप्ती नगरपालिकामा मेयर उपमेयर दुवै गुमायो भने रत्ननगर र खैरहनीमा मेयर गुमाए पनि उपमेयर जोगायो । अघिल्लो पटक उपमेयर जितेको माडीमा यो पटक मेयर जित्यो । अघिल्लो पटक गुमाएको इच्छाकामना गाउँपालिकामा यो पटक प्रमुख र उपप्रमुख दुवै जित्यो ।

त्यसै गरी अघिल्लो पटक मेयर उपमेयर दुवै जितेको कालिका नगरपालिका एमालेले यस पटक पनि जोगायो । कांग्रेसले यो पटक इच्छाकामना गाउँपालिका गुमाए पनि रत्ननगर र खैरहनीमा मेयर जित्यो । माडी र राप्तीमा उपमेयर थप्यो । अघिल्लोपटक झैं कांग्रेसले यसपटक पनि भरतपुरमा उपमेयर जित्यो । नेकपा एकीकृत समाजवादीले राप्तीमा मेयर जित्दा माओवादी केन्द्रले माडीको मेयर गुमाएर समाजवादीसँग बराबरी गर्‍यो ।

प्रकाशित : जेष्ठ १०, २०७९ १५:५४
पूरा पढ्नुहोस्
प्रतिक्रिया
पठाउनुहोस्
×