चौरजहारीमा कांग्रेस र माओवादी कार्यकर्ताबीच झडप, ५ घाइते
रुकुम पश्चिम — चौरजहारी नगरपालिका–१० मा मौन अवधिमै झडप भएको छ । बुधबार राति कांग्रेस र माओवादी कार्यकर्ताबीच झडप भएको हो ।
झडपमा परी माओवादीको तर्फबाट वडा सदस्यका उम्मेदवार तुल्सीराम बुढा लगायत ५ जना घाइते भएका छन् । झडपपछि दुवै पार्टीका वडाध्यक्षका उम्मेदवारलाई प्रहरीले नियन्त्रणमा लिएर छाडेको छ ।
कांग्रेसका उम्मेदवार गणेशमान डाँगी र माओवादी केन्द्रको तर्फका उम्मेदवार विरेन्द्र रोकायलाई फेरि झडप नगर्न भन्दै छाडेको प्रहरीले जनाएको छ । कांग्रेसले माओवादीहरु पैसा बाँड्दै हिडेकाले त्यो रोक्न प्रयास गरेको बताएको छ ।
माओवादीले भने अन्य वडाबाटसमेत मान्छे बोलाएर आफ्ना उम्मेदवार कार्यकर्तामाथि कुटपिट गरेको बताएको छ ।
घाइतेको नगर अस्पताल चौरजहारी अस्पतालमा उपचार भइरहेको छ । घाइते वडा सदस्यका उम्मेदवार बुढाले आफूहरुमाथि कांग्रेस कार्यकर्ताले कुटपिट गरेको र वडाअध्यक्षका उम्मेदवार विरेन्द्र रोकाय र सौगात रोकायलाई केही समय बन्धक समेत बनाएको बताए ।
प्रकाशित : वैशाख २९, २०७९ ०९:३६