गठबन्धन भत्किँदै, बन्दै- कर्णाली - कान्तिपुर समाचार

गठबन्धन भत्किँदै, बन्दै

हरिहरसिंह राठौर

जाजरकोट — सत्ता गठबन्धनको प्रदेशस्तरीय संयन्त्रले झन्डै २ साताअघि कर्णालीका सुर्खेत र रुकुम पश्चिमबाहेक ८ जिल्लाका पालिकाहरूमा उम्मेदवारको भागबन्डा टुंग्यायो । तर सत्ता साझेदार दलहरू कांग्रेस र माओवादीका जिल्ला समितिहरूले त्यसलाई नमान्ने निर्णय गरी एक्काएक्लै उम्मेदवारी दर्ता गराए ।

एक्लाएक्लै निर्वाचनमा गए पराजित हुन सक्ने आशंकामा अन्ततः गठबन्धनका दलहरू कांग्रेस र माओवादीले अर्को सहमति गरी फेरि गठबन्धन गरेका छन् । दुई दलबीच शिवालय गाउँपालिकामा कांग्रेसका उम्मेदवारलाई र सदरमुकामस्थित भेरी नगरपालिकामा माओवादीका उम्मेदवारलाई समर्थन गर्ने सहमति बनेको छ । शिवालयमा कांग्रेसका अध्यक्षका उम्मेदवार शेरबहादुर शाही र भेरी नगरपालिका प्रमुखमा माओवादी केन्द्रका उम्मेदवार गगनबहादुर खड्कालाई समर्थन गर्ने दलहरूबीच सहमति भएको हो । भेरी नगरपालिकामा आफ्नो जनाधार बलियो रहेको अडान राख्दै आएको माओवादीले सदरमुकाममा उपप्रमुखमा कांग्रेसका उम्मेदवारलाई समर्थन गर्ने विज्ञप्ति सार्वजनिक गरेको छ ।

जाजरकोटमा ३ पालिकामा कांग्रेस र माओवादी केन्द्रले चुनावी तालमेल गरेका छन् । भेरी, नलगाड नगरपालिका र शिवालय गाउँपालिकामा चुनावी तालमेल गरेर जाने दुवै पार्टीको सहमति छ । यसभन्दा पहिले भएको सत्ता गठबन्धन दलहरूको निर्णयले भेरी नगरपालिकामा नेकपा (एकीकृत समाजवादी) लाई प्रमुख र कांग्रेसलाई उपप्रमुख दिने निर्णय गरेको थियो । तर सहमति जुट्न नसकेपछि बाँकी रहेका स्थानीय तहमा कांग्रेस र माओवादीबीच गठबन्धन भएको हो ।

पछिल्लो निर्णयले भेरी नगरपालिकामा माओवादी केन्द्रबाट प्रमुख, कांग्रेसको उपप्रमुख, नलगाडमा माओवादीका प्रमुख र कांग्रेसका उपप्रमुख तथा शिवालयमा कांग्रेसका अध्यक्ष र माओवादीका उपाध्यक्षका उम्मेदवारलाई सघाउने निर्णय भएको कांग्रेस जिल्ला सभापति वेदराज सिंहले बताए । ‘यसअघि भएको गठबन्धनको निर्णय कार्यान्वयन नभएपछि फेरि सहमति गरेर कार्यान्वयनमा लगिएको छ,’ उनले भने । कार्यकर्ताहरूलाई पछिल्लो सहमतिअनुसार अभियानमा जुट्न आग्रह गरिएको उनले जानकारी दिए । कुशे गाउँपालिकामा भने माओवादी केन्द्र र एकीकृत समाजवादीबीच चुनावी तालमेल भएको छ ।

प्रकाशित : वैशाख २३, २०७९ ०८:३३
प्रतिक्रिया
पठाउनुहोस्

गठबन्धनले जाजरकोटका ७ पालिकामा टुंग्यायो सिट भागबन्डा 

हरिहरसिंह राठौर

जाजरकोट — सत्ता गठबन्धनले जाजरकोटमा स्थानीय तह निर्वाचनका लागि सिट बाँडफाँट टुंगो लगाएको छ । गठबन्धन सुर्खेतमा बसेको प्रदेशस्तरीय गठबन्धन संयन्त्रले आइतबार जाजरकोटका ३ नगरपालिकासहित ७ वटा स्थानीय तहको उम्मेदवारी र पद बाँडफाँट गरेको हो । जिल्ला संयन्त्रले नसकेपछि प्रदेश संयन्त्रलाई जिम्मा लगाइएको थियो । 

पश्चिमको छेडागाड नगर प्रमुखमा नेपाली कांग्रेसका रत्नबहादुर खड्कालाई उम्मेदवार बनाइने भएको छ । अघिल्लो निर्वाचनका प्रत्यासी खड्काले दोस्रो स्थान पाएका थिए । सोही नगरको उपप्रमुख भने नेकपा माओवादी केन्द्रको भागमा परेको छ । माओवादीले उम्मेदवार टुंग्याएको छैन ।

यस्तै जिल्लाको पूर्वीभेग नलगाड नगरपालिका प्रमुखमा माओवादी केन्द्र र उपप्रमुख पदमा कांग्रेसले साझा उम्मेदवार खडा गर्ने भएको छ । भेरी नगरपालिकामा भने नेकपा (एकीकृत समाजवादी) का कमानबहादुर खड्कालाई गठबन्धनले अघि सारेको छ । उक्त नगरमा कांग्रेसले उपप्रमुखमै चित्त बुझाएको छ ।

शिवालयमा माओवादी केन्द्रले अध्यक्ष र उपाध्यक्षमा कांग्रेसले भाग पाएको छ। वारेकोट गाउँपालिका प्रमुखमा कांग्रेस र माओवादीलर् उपाध्यक्ष पदमा उम्मेदवार उठाउने छ ।

कुशे गाउँपालिका उपाध्यक्षमा माओवादी केन्द्रले उम्मेदवार उठाउने निर्णय भएको छ । कुशे गाउँपालिकाको अध्यक्ष र अन्य वडास्तरको गठबन्धनका लागि बैठक जारी रहेको नेताहरुले जनाएका छन् ।

प्रकाशित : वैशाख ११, २०७९ १५:५८
पूरा पढ्नुहोस्
प्रतिक्रिया
पठाउनुहोस्
x
×