हुम्लामा थपिए २ मतदान केन्द्र- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

हुम्लामा थपिए २ मतदान केन्द्र

जनकबहादुर शाही

हुम्ला — आगामी वैशाख ३० गते हुने स्थानीय तहको निर्वाचनका लागि २ वटा उपकेन्द्र थपिँदा हुम्लामा ५४ वटा मतदान केन्द्र हुने भएका छन् । मतदाता संख्याका आधारमा एक हजारभन्दा बढी मतदाता संख्या रहेको सिमकोट गाउँपालिका ७ को टुलिङ र ताँजाकोट गाउँपालिका ३ थापागाउँमा २ वटा उपकेन्द्र थप्दा जिल्लामा ५४ मतदान केन्द्र भएको जिल्ला निर्वाचन आयोग हुम्लाले जनाको छ ।

एक हजारभन्दा बढी मतदाता संख्या रहेका ५ वटा मतदान केन्द्र भए पनि निर्वाचन आयोगले २ वटा केन्द्रमा मात्र उपकेन्द्र थप गरेको जिल्ला निर्वाचन कार्यालयका प्रमुख मुक्तिनन्द रावलले बताए ।

२०७४ सालको स्थानीय निर्वाचनभन्दा दुईवटा मतदान उपकेन्द्र थपिएको हो‚ जसमा एक हजारभन्दा बढी मतदाता संख्या रहेको सिमकोट गाउँपालिका ७ को टुलिङ र ताँजाकोट गाउपालिका ३ कैलाश आधारभूत विद्यालय थापागाउँमा मतदान उपकेन्द्र थप गरिएको प्रमुख रावलले बताए ।

आयोगले जिल्लाको मागअनुसार उपकेन्द्र थप गरिएको आयोगले जनाएको छ । यसपटकको स्थानीय निर्वाचनका लागि गाउँपालिकाका अनुसार निर्धारण गरिएका मतदान केन्द्रको संख्यामा नाम्खा गाउँपालिकामा १० वटा, सिमकोटमा ९ वटा, खार्पुनाथमा ५ वटा, सर्केगार्डमा ११ वटा, चंखेलीमा ७ वटा, अदानचुलीमा ६ वटा र ताँजाकोटमा ६ वटा गरी जम्मा ५४ मतदान केन्द्र रहेको कार्यालयले जनाएको छ ।

अहिले हुम्लाको मतदाता संख्या ३२ हजार ५ सय ८१ पुगेको छ । निर्वाचन आयोगले सार्वजनिक गरेको अन्तिम मतदातामा सार्वजनिक गरिएको छ । अन्तिम रुपमा सार्वजनिक भएको मतदाता नामावलीअनुसार यसअघिका निर्वाचनमा २९ हजार ३ सय ८८ मतदाता रहेको हुम्ला जिल्लामा ३ हजार १ सय ९३ मतदाता बढेर ३२ हजार ५ सय ८१ कायम रहेको छ । जसमा महिलाको मतदाता १५ हजार ६ सय ७ छन् भने पुरुषको संख्या १६ हजार ९ सय ७४ रहेको निर्वाचन कार्यालयले जनाएको छ ।

अहिले जिल्लाका ७ वटा गाउँपालिकामा नाम्खामा ३ हजार १ सय ८२, सिमकोटमा ६ हजार ६ सय ३६, खार्पुनाथमा ४ हजार ४७, सर्केगार्डमा ६ हजार ६ सय ८०, चंखेलीमा ३ हजार ५ सय ४८, अदानचुलीमा ४ हजार ७ सय २० र ताँजाकोट गाउँपालिकामा ३ हजार ७ सय ६८ मतदाता रहेका छन् । गत माघ २४ गतेसम्म अन्तिम मतदाता नामावली सङ्कलन गर्ने काम भएको थियो । अघिल्लो निर्वाचनभन्दा यस पटक तीन हजार १९३ मतदाता थपिएका छन् ।

प्रकाशित : चैत्र २२, २०७८ १३:१४
प्रतिक्रिया
पठाउनुहोस्

हुम्लाका २४ हजार बालबालिकालाई टाइफाइडविरुद्धको खोप लगाइने

जनकबहादुर शाही

हुम्ला — हुम्लाका २४ हजार बालबालिकालाई टाइफाइडविरुद्धको खोप लगाइने भएको छ । सातवटा स्थानीय तहका १५ महिनादेखि १५ वर्षमुनिका २४ हजार १ सय ४९ जना बालबालिकालाई टाइफाइड खोप लगाइने स्वास्थ्य सेवा कार्यालय हुम्लाका प्रमुख प्रेमबहादुर सिंहले बताए ।

स्वास्थ्य सेवा कार्यालय हुम्लाद्वारा सोमबार सदरमुकाम सिमकोटमा आयोजित एक दिने गोष्ठीमा चैत २५ गतेदेखि वैशाख पाँच गतेसम्म सबै पालिकाका बालबालिकालाई टाइफाइड रोगविरुद्धको खोप लगाउन अभियान सञ्चालन गरिने भएको हो । कार्यालयका प्रमुख सिंहका अनुसार देशैभरि एक चरणमा यही चैत २५ गतेदेखि आगामी वैशाख १८ गतेभित्र सम्पन्न गर्ने गरी तय भएको मितिअनुसार खोप लगाइने भए पनि हुम्ला भौगोलिक आधारमा विकट भएका कारण चैत २५ देखि वैशाख पाँच गतेसम्म खोप लगाएर सम्पन्न गरिने भएको हो ।

जिल्लाको उत्तरी नाम्खा गाउँपालिकाको लिमीमा रहेका बालबालिकाका लागि स्वास्थ्यकर्मी खटाइएका स्वास्थ्यकर्मी यदि हिमपातले र विविध समस्याले त्यहाँ जान नसके दोस्रो पटकको अभियानमा पुनः पठाइने भएको कार्यालयका प्रमुख सिंहले बताए ।

हुम्लाका सातवटा गाउँपालिकामा नाम्खामा १८, सिमकोटमा २५, खार्पुनाथमा १८, सर्केगाडमा २५, चंखेलीमा २५, अदानचुलीमा १९ र ताजकोटमा २० गरेर १५० वटा खोप केन्द्रबाट यहाँका बालबालिकालाई टाइफाइड रोगविरुद्धको खोप लगाइने भएको हो । खोप पाउने बालबालिकाको संख्या नाम्खा गाउँपालिकामा एक हजार ९१, सिमकोट ५ हजार २ सय ८३, खार्पुनाथ २ हजार ९सय ३०, सर्केगाड ४ हजार ९ सय ९०, चंखेली २ हजार ८ सय ५५, अदानचुली ३ हजार ९ सय २२ र ताँजकोटमा ३ हजार ७८ गरि २४ हजार बालबालिकालाई खोप लगाइने भएको छ ।

हुम्ला भौगोलिक रुपमा विकट जिल्ला भएर चैत २५ देखि वैशाख ५ सम्म नेपाल सरकारको यो अभियान सम्पन्न गर्ने लक्ष्य रहेको छ । टाइफाइड रोगविरुद्धको खोप अभियान सफल पार्न जिल्ला खोप समन्वय समिति र सञ्चार क्षेत्रको अभिमुखीकरण कार्यक्रम सञ्चालन गरिएको छ । उक्त कार्यक्रममा प्रमुख जिल्ला अधिकारी सीता परियार जिल्लास्थित सुरक्षा निकायका प्रमुख लगायत सञ्चारकर्मीको सहभागिता थियो ।

प्रकाशित : चैत्र २२, २०७८ ०८:४५
पूरा पढ्नुहोस्
प्रतिक्रिया
पठाउनुहोस्
×