हुम्लाबाट तीन महिनामा पाँच लाख केजी जडिबुटी निकासी- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

हुम्लाबाट तीन महिनामा पाँच लाख केजी जडिबुटी निकासी

जनकबहादुर शाही

हुम्ला — जडिबुटीको खानी मानिने हिमाली जिल्ला हुम्लाबाट गत पुसयता पाँच लाख केजीभन्दा बढी जडिबुटी निकासी भएको छ । हुम्ला जिल्लावासीको मुख्य आयस्रोत नै जडिबुटी हो ।

हुम्लाबाट यस वर्ष १३ प्रकारका जडिबुटी निकासी भएका छन् । सबै प्रकारका जडिबुटी गरी ५ लाख केजीभन्दा बढी जडिबुटी निकासी भएको डिभिजन वन कार्यालय हुम्लाका वन अधिकृत रेणु न्यौपानेले बताइन् ।

जिल्लाबाहिर निकासी गरिएको जडिबुटी हुम्ला जिल्लामा रहेका राष्ट्रिय तथा सामुदायिक वनबाट सङ्कलन गरिएको हो । तीन महिनाको अवधिमा तीन लाख ४० हजार केजी जटामासी, ४९ हजार पाँच सय केजी कुट्की, ४८ हजार ६ सय केजी सेतक चिनी, २० हजार केजी सुगन्धवाल, १४ हजार ६ सय केजी अतीस, एक हजार केजी चिराइतो, पाँच केजी सिलाजित, चार हजार केजी धुपी, पाँच सय १० केजी कालादाना, एक हजार दुई सय ५० केजी वन लसुन, पाँच सय २० केजी अल्लो, एक हजार केजी वीस र ४५ केजी गुच्ची च्याउसहित अन्य जडिबुढी जिल्लाबाट निकासी भएको अधिकृत न्यौपानेले बताइन् ।


कार्यालयको पञ्चवर्षीय योजना अनुसार जडिबुटी निकासी गरिएको बताइएको छ । जटामासीबाहेक अन्य जडिबुटीको सङ्कलन पुर्जी डिभिजन वन कार्यालय हुम्लाले दिएको हो भने जटामसीको सङ्कलन पुर्जी वन विभागबाट दिइएको न्यौपानेले बताइन् । स्थानीयले जंगलबाट संकलन गरेको जडिबुटीलाई जिल्लामा दर्ता भएका ४० भन्दा बढी जडिबुटी फर्मका व्यापारीहरुले जिल्लाबाट निकासी गरेका हुन् ।

जडिबुटी व्यापारीहरुले जिल्लामा जडिबुटी संकलन दस्तुर वापत एक करोड ८७ लाख १६ हजार पाँच सय राजश्व उठेको डिभिजन वन कार्यालय हुम्लाले जनाएको छ । जसमा जटामासी संकलन अनुमति वन विभागले दिने भएकाले जटामसी संकलन दस्तुर एक करोड ७० लाख विभागमा र अन्य जडिबुटीको संकलन अनुमति डिभिजन वन कार्यालय हुम्लाले दिने भएकाले जटामासीबाहेक अन्य जडिबुटीको संकलन दस्तुर वापत १७ लाख १६ हजार पाँच सय रुपैयाँ जिल्लामा राजश्व जम्मा भएको अधिकृत न्यौपानेले बताइन् ।


प्रकाशित : चैत्र २०, २०७८ १४:१८
प्रतिक्रिया
पठाउनुहोस्

कर्णाली विकासका लागि ६ वटा ‘ब’लाई ध्यान दिऔं : मुख्यमन्त्री शाही

जनकबहादुर शाही

हुम्ला — कर्णालीका मुख्यमन्त्री शाहीले समृद्धि र विकास हेर्न चाहने हो भने प्रदेशका सबै निकायहरूले ६ वटा ‘ब’लाई ध्यान दिनुपर्ने बताएका छन् । ‘समृद्ध कर्णाली विकासका पाँच वर्ष’ विषयक बहस कार्यक्रममा मुख्यमन्त्री शाहीले राज्यका सबै निकायले ६ वटा ‘ब’लाई ध्यान दिए कर्णाली समृद्ध हुने बताएका हुन् ।


जहिले पनि केन्द्रिय सरकारले गरिबी, भोक, रोग र पिछडिएको उपमा दिएको कर्णालीको मुहार फर्नका लागि ६ वटा ‘ब’ (बाटो, बिजुली, विचार, वन, बजार र व्यवस्थापन) लाई ध्यान दिन आवश्यक रहेको मुख्यमन्त्री शाहीले बताए । कर्णालीको विकासका लागि ६ ‘ब’ लाई प्राथमिकतामा राखेर काम गर्ने हो भने सोचेअनुसारको कर्णाली बनाउन सकिने उनले बताए ।

सुर्खेतमा संचालन भएको ‘समृद्ध कर्णाली विकासका पाँच वर्ष’ विषयक बहस कार्यक्रममा बोल्दै मुख्यमन्त्री शाहीले कर्णालीमा हुने सबै खाले नराम्रा कामको दोष आफू लिने र प्रदेशमा बनेका बाटो, बिजुुली, सिँचाई, सडक, भवन, सरसफाइ लगायत नयाँ र राम्रा कार्य भए त्यसको जस जनतालाई दिने तर आफू प्रदेश सरकार सञ्चालनको मुख्य जिम्मेवारीमा भएकाले कर्णालीमा हुने सबै खाले नराम्रा कामको जिम्मा लिन आफू तयार रहेको बताए ।

कर्णालीमा गरिबीको समस्या नभएर मानसिक गरिबी मुख्य समस्या भएकाले जबसम्म कर्णालीवासीको मानसिकतामा रहेको गरिबीलाई हटाउन सकिँदैन तबसम्म कर्णालीको समृद्धि र विकास नहुनेसमेत उनले बताए ।

प्रकाशित : चैत्र २०, २०७८ १२:२१
पूरा पढ्नुहोस्
प्रतिक्रिया
पठाउनुहोस्
×