रोल्पामा कोरोना रोक्न सतर्कता, सिमानामा कडाइ- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

रोल्पामा कोरोना रोक्न सतर्कता, सिमानामा कडाइ

काशीराम डाँगी

रोल्पा — कोरोना संक्रमण बढ्न थालेपछि रोल्पास्थित जिल्ला कोभिड–१९ संकट व्यवस्थापन केन्द्र (डीसीसीएमसी) ले सचेतना फैलाउँदै जिल्ला प्रवेश गर्ने नाकाहरूमा जाँच बढाउने भएको छ ।

केन्द्रका संयोजक निमित्त प्रमुख जिल्ला अधिकारी श्रीनाथ पौडेलले नयाँ भेरिएन्ट फैलनसक्ने भएकाले रोकथामका लागि स्थानीय तहसँग समन्वय गरेर योजना बनाउने बताए । ‘जिल्लामा भित्रिने नाकाहरूका जाँच प्रणाली राख्ने तथा यातायातका साधनमा सवार गर्दासमेत ध्यान पुर्‍याउने गरी नयाँ योजना अघि सारिएको छ,’ उनले भने ।

सरकारले जारी गरेको सूचना अनुसार रोल्पाका अधिकांश तहमा विद्यालय बन्द भइसकेका छन् । बजार, सहर तथा गाउँमा समेत भीड नगर्न प्रशासनले निर्देशन जारी गरेको छ ।

रोल्पा प्रवेश गर्ने मुख्य तीन नाका छन् । पूर्वमा प्युठान हुँदै खुङ्ग्री, दक्षिणको दाङ हुँदै होलेरी र दक्षिण पश्चिमको सल्यान हुँदै निगालपानीबाट यातायातका साधन रोल्पा प्रवेश गर्छन् । ती क्षेत्रमा सवारी साधन मार्फत र पैदल आउने व्यक्तिहरूको स्वास्थ्य जाँच बढाउने, कोरोनाबारे जानकारी दिने तथा घर फर्केपछि क्वारेन्टाइनमा बस्ने वातावरण सिर्जना गर्न स्थानीय तहलाई निर्देशन दिइएको स्थानीय प्रशासनले जनाएको छ ।

केन्द्रको बैठकले बजार क्षेत्रमा भीडभाड नगर्न, भेला, सम्मेलन तथा कार्यक्रम आयोजना नगर्न सूचना जारी गरेको निमित्त प्रजिअ पौडेलले बताए । उनका अनुसार स्वास्थ्य क्षेत्र, यातायात व्यावसायी, स्थानीय तह तथा सुरक्षाकर्मीसँग समन्वय गरी कोरोना विरुद्धको गतिविधि बढाउन आह्वान गरिएको छ । कोरोना संक्रमण वृद्धि रोक्न सरकारले गरेको निर्णयका आधारमा राजनीतिक दलको अधिवेशन, रोल्पा उद्योग वाणिज्य संघको अधिवेशन, रेडक्रसको अधिवेशन लगायतका भेला स्थगित गरिएको छ ।

जिल्लामा हालसम्म आधा दर्जन कोरोना संक्रमित भेटिएका छन् । रोल्पा अस्पतालका सूचना अधिकारी कुलबहादुर डाँगीले कोरोनासँग मिल्ने लक्षण भएका बिरामी अस्पतालमा आउने क्रम बढेको बताए । अघिल्लो वर्ष करिब ६ हजारमा कोरोना परीक्षण गरिएको थियो । त्यसबेला करिब २ हजार ५ सयमा संक्रमण देखिएको थियो । कोरोनाबाट २१ जनाको मृत्यु भएको थियो ।

प्रकाशित : माघ १, २०७८ १८:०१
प्रतिक्रिया
पठाउनुहोस्

सरकारलाई साँचो बुझाउने मेडिकल कलेज संचालकको चेतावनी

कान्तिपुर संवाददाता

काठमाडौँ — निजी मेडिकल कलेजहरुको छाता संस्था एसोसिएसन अफ प्राइभेट मेडिकल एन्ड डेन्टल कलेज अफ नेपालले मेडिकल कलेज र तीनका संचालकहरुमाथि निरन्तर राज्यकै संरक्षणमा विभिन्न किसिमका आक्रमण भइरहेको जनाएको छ ।

एसोसिएनका अध्यक्ष बसरुद्दीन अन्सारीले शनिबार विज्ञप्ति जारी गरेर यस्तो अवस्था कायमै रहे कलेज बन्द गरेर सरकारलाई साँचो बुझाउन बाध्य हुने बताएका छन् । एसोसिएनका महासचिव तथा नोबेल र काठमाडौं मेडिकल कलेजका संचालक सुनिल शर्मामाथि शुक्रबार सिंहदरबार परिसरमा कालोमोसो दलेर गरिएको दुर्व्यवहारको संलग्न दोषीलाई कारबाही गर्नसमेत उनले माग गरेका छन् ।

‘एक दशकयता निजी मेडिकल कलेज र त्यहाँका सञ्चालकहरुमाथि विभिन्न तवरबाट आक्रमण हुने, भौतिक कारबाहीको धम्की दिने, गाली बेइज्यती गर्नेक्रम भइरहेकोमा निजी क्षेत्रबाट सञ्चालित कुनै पनि मेडिकल कलेज, अस्पतालहरुमा क्षति पुगेको खण्डमा तथा मेडिकल कलेज व्यवसायीहरुमाथि भएका आक्रमणहरुको जिम्मेवारी राज्यले लिनुपर्दछ भन्ने हाम्रो माग छ,’ अन्सारीद्वारा जारी विज्ञप्तिमा भनिएको छ, ‘निजी क्षेत्रले सम्मानित रुपमा व्यवसाय गर्न/गराउन पाउनु नैसर्गिक अधिकार हो । हामीले शान्तिपूर्णरुपमा पटक–पटक राज्यका अंगहरुसँग श्रृंखलाबद्ध रुपमा मेडिकल कलेज व्यवसायीहरुमाथि भइरहेको आक्रमण रोक्न आग्रह गरे पनि कुनै संबोधन नगरेको ठहर गरेका छौं ।'

धैर्यताको बाँध फुटिसकेको जनाउँदै अब सबै मेडिकल कलेजहरुमा ताला लगाउनुको विकल्प व्यवसायीहरुसँग नभएको उल्लेख गरिएको छ । 'निजी क्षेत्रबाट सञ्चालित मेडिकल व्यवसायीसँग धैर्यताको बाँध फुटिसकेको अवस्थामा अब हाम्रा सबै मेडिकल कलेजहरुमा ताला लगाउनुको विकल्प देखिएन । तसर्थ, कोरोना भाइरसको तेस्रो चरणको महामारी सन्निकट रहेको समयमा हामीले हाम्रा स्वास्थ्य संस्थाहरुमा ताला लगाएर चाबी सरकारलाई बुझाउने परिस्थिति सिर्जना नहोस् ।’


प्रकाशित : माघ १, २०७८ १७:५६
पूरा पढ्नुहोस्
प्रतिक्रिया
पठाउनुहोस्
×